રાજકોટઃ શહેર સિવિલ હોસ્પિટલમાં ગુરુ અને શિષ્યના પવિત્ર સંબંધને સાર્થક કરતી ઘટના સામે આવી છે. જેમાં રાજકોટ નજીકના સરધાર ગામની સ્કૂલના પ્રિન્સીપાલ તરીકે નિવૃત થયેલા વિનુભાઈ જોશીને કોરોના થતા રાજકોટ કોવિડ હોસ્પિટલમાં દાખલ કરવામાં આવ્યા હતા. ત્યારે આ વૃદ્ધ દર્દીની કોવિડ હોસ્પિટલમાં નર્સ ખુબ જ સાર સંભાળ રાખતી અને સેવા કરતી હતી. જે કે નર્સે PPE કિટ પહેરી હોવાથી વૃદ્ધ પણ તેમને ઓળખી શક્યા નહોતા. પરંતુ આ નર્સ જે તેમની સારવાર કરતી હતી તે એક સમયે તેમની પાસે અભ્યાસ કરી ચુકી હતી. એટલે જે આ વૃદ્ધ તેના ગુરુ હતા.
કોવિડ વોર્ડમાં નર્સ આટલી સેવા કરતા અચાનક વિનુભાઈએ નર્સને પૂછ્યું કે તું કેમ મારી આટલી સેવા કરે છે અને તારે અને મારે શું સંબંધ છે. આ સાંભળીને નર્સ કૃપાબેન ભટ્ટ પોતાના મો પર લગાવેલું માસ્ક દૂર કરે છે. ત્યારે વિનુભાઈ તરત જ પોતાની શિષ્યાને ઓળખી જાય છે. જો કે નર્સે તેમના ગુરુ એવા વિનુભાઈને કોરોના દરમિયાન વધુ પીડા ન થાય તે માટે ઊંઘની દવા આપે છે. પરંતુ વિનુભાઈ ઊંઘની જગ્યાએ સમાધિની વાત કરે છે અને અંતે ગંગાજલ અને તુલસી લીધા બાદ મૃત્યુ પામે છે. જે દ્રશ્ય જોઈને કોવિડ હોસ્પિટલનો સ્ટાફ પણ ભાવુક થઈ જાય છે.
જો કે કૃપાબેને પણ હોસ્પિટલમાં પોતાના ગુરુજી સારવાર દરમ્યાન અન્ય સ્ટાફને પણ કહ્યું નહોતું કે આ વૃદ્ધ તેમના ગુરુ છે. પરંતુ જ્યારે તેમનું મોત થાય છે. ત્યારે સમગ્ર હકીકત સામે આવે છે. ઉલ્લેખનીય છે કે કૃપાબેન છેલ્લા 20 વર્ષથી રાજકોટ સિવિલ હોસ્પિટલમાં કાર્યરત છે અને કોરોનાની કામગીરી દરમિયાન તેઓ પણ પોઝિટિવ આવ્યા છે. પરંતુ તેમની તબિયત સારી થતા ફરી તેઓ પોતાના કાર્યમાં લાગી ગયા છે.
