રાજકોટઃ શહેરમાં ગાંધીજીની યાદોને જીવંત રાખવા માટે મહાનગરપાલિકા દ્વારા જે આલ્ફ્રેડ સ્કૂલમાં ગાંધીજીએ અભ્યાસ કર્યો હતો, તે સ્કૂલને મ્યુઝિયમમાં ફેરવવા અંગેનો નિર્ણય લેવામાં આવ્યો હતો. અંદાજીત 1 વર્ષ બાદ અહીં ગાંધી મ્યુઝિયમ બનાવવામાં આવ્યું હતું. આ ગાંધી મ્યુઝિયમ આધુનિક અને વિશ્વકક્ષાનું મ્યુઝિયમ છે. મનપા દ્વારા અંદાજીત રૂ 26 કરોડના ખર્ચે આ મહાત્મા મ્યુઝિયમ બનાવવામાં આવ્યું છે. તેમજ આ મ્યુઝિયમનું વડાપ્રધાન નરેન્દ્ર મોદીના હસ્તે 30 સપ્ટેમ્બર 2018ના દિવસે લોકાર્પણ કરવામાં આવ્યું હતું.
આ મ્યુઝિયમની વિશેષતા એ છે કે, અહીં ગાંધીજીના જીવન સંઘર્ષથી માંડી આઝાદી સુધીની સફર, ગાંધીજીના જીવન ચરિત્ર, તેમના વિચારોને લોકો ખૂબ જ સહેલાઈથી સમજી શકે, તે માટેના પ્રયાસો કરવામાં આવ્યા છે. જે પણ મુસાફરો રાજકોટની મુલાકાતે આવે, તે અચૂક ગાંધી મ્યુઝિયમની મુલાકાત લે છે. હાલ આ મહાત્મા મ્યુઝિયમ રાજકોટ મનપા હસ્તક છે. જેની દેશ-વિદેશના ઘણા લોકો મુલાકાત લઈ ચુક્યા છે.
