- રાજ્યમાં બુધવારથી ટેકાની ભાવે મગફળીની કરાશે ખરીદી
- રાજકોટમાં 94 હજાર ખેડૂતોએ રજિસ્ટ્રેશન કરાવ્યું
- જિલ્લાના 11 તાલુકાના 22 સ્થળોએ ખરીદી કરાશે
રાજકોટઃ રાજયમાં ટેકાના ભાવે મગફળીની ખરીદી માટે 1 ઓક્ટોબરથી 20 ઓક્ટોબર સુધી રજિસ્ટ્રેશનની પ્રક્રિયા હાથ ધરવામાં આવી હતી. જેમાં સૌરાષ્ટ્રના પાટનગર રાજકોટ જિલ્લામાં અત્યાર સુધીમાં 94 હજાર ખેડૂતોએ રજિસ્ટ્રેશન કરાવ્યું છે. જેને લઈને જિલ્લામાં ગત વર્ષ કરતા 15 હજાર વધુ ખેડૂતોએ ચાલુ વર્ષે રજિસ્ટ્રેશન કરાવ્યું છે. ટેકાના ભાવે મગફળી ખરીદીના રજિસ્ટ્રેશનના માત્ર 6 દિવસમાં જ જિલ્લાના 50 હજાર કરતા વધુ ખેડૂતોઓએ પોતાનું રજિસ્ટ્રેશન કરવી દીધું હતું. જો કે, જિલ્લામાં 1 લાખ ખેડૂતો રજિસ્ટ્રેશન કરાવે તેવી શક્યતાઓ હતી.
90 દિવસ સુધી મગફળીની ખરીદીની પ્રક્રિયા ચાલશે
જિલ્લામાં 11 તાલુકાના 22 સ્થળોએ બુધવારથી ટેકના ભાવે મગફળીની ખરીદી શરૂ કરવામાં આવશે. જેને લઈને તંત્ર દ્વારા પણ તમામ તૈયારીઓ પૂર્ણ કરી લેવામાં આવી છે. તેમજ મગફળીનો જથ્થો રાખવા માટે 150 ગોડાઉન પણ ભાડે રાખવામાં આવ્યા છે. આ ગોડાઉનમાં CCTV કેમેરાની પણ વ્યવસ્થા રાખવામાં આવી છે. આ સાથે જ ખરીદી કેન્દ્ર પર પણ CCTV કેમેરાથી સત્તત મોનીટરીંગ કરવામાં આવશે. આગામી 90 દિવસ સુધી મગફળી ખરીદીની પ્રક્રિયા ચાલશે, જેથી જો જરૂર જણાય તો વધારે ગોડાઉન પણ ભાડે રાખવાની તંત્રએ તૈયારીઓ દર્શાવી છે.
ટેકાના ભાવે મગફળીની ખરીદીને લઈ તંત્ર દ્વારા તમામ તૈયારીઓ પૂર્ણ કરાઈ
મગફળીની ખરીદીને લઈને ખેતીવાડી અધિકારી આર.આર.ટીલવાએ વિશેષ માહિતી આપતા જણાવ્યું હતું કે, તંત્ર દ્વારા મોટાભાગની તૈયારીઓ પૂર્ણ કરવામાં આવી છે. દરેક મગફળી કેન્દ્ર પર કલાસ-2 ના એક અધિકારી મોનીટરીંગમાં જશે, સાથે જ વર્ગ-3 ના અધિકારીઓ અને એક નિગમનો કર્મચારી પણ ખરીદી કેન્દ્ર પર હાજર રહેશે. તેમજ એક કેન્દ્ર પર 8 કર્મચારીઓ કામ કરશે. આ ઉપરાંત જિલ્લામાં 200 કર્મચારીઓ હાલ ટેકના ભાવે મગફળીની કામગીરી માટે રાખવામાં આવ્યાં છે.
ખેડૂતોને SMS દ્વારા જાણ કરવામાં આવશે
રાજ્યમાં મગફળીની ખરીદી બુધવારથી શરૂ કરવામાં આવશે. ત્યારે જે તે વિસ્તારના ખેડૂતોને કેન્દ્ર પરથી જ SMS દ્વારા જાણ કરવામાં આવશે કે તેમને કેટલા વાગ્યે કેન્દ્ર ખાતે આવવાનું છે. શરૂઆતમાં કોરોના ગાઈડલાઈન પ્રમાણે થોડા ખેડૂતોને બોલવામાં આવશે, ત્યારબાદ જો બધું બરોબર ચાલશે તો અંદાજીત 100 ખેડૂતોને દરરોજ અલગ-અલગ કેન્દ્ર પર બોલવામાં આવશે. આ સાથે જ ખરીદી કેન્દ્ર પર કોઈ અવ્યવસ્થા ન સર્જાય તે માટે પોલીસ બંદોબસ્તની પણ વ્યવસ્થા કરાશે.
