જૂનાગઢ: આ બજેટમાં સફાઈને અગ્રીમતા મળી રહે અને લોકો સફાઈ પ્રત્યે વધુ જાગૃત થાય તે માટે ગાર્બેજ ચાર્જીસમાં 1 રૂપિયા સુધીનો વધારો કરવાની દરખાસ્ત કરવામાં આવી છે. આ ઉપરાંત જૂનાગઢ મનપા વિસ્તારમાં પાણીવેરો હાલ 700 રૂપિયા લેવામાં આવી રહ્યા છે, જેને લગભગ બમણાથી પણ વધુ કરીને 1500 રૂપિયા સુધીનો કરવાની દરખાસ્ત કરવામાં આવી હતી.
જૂનાગઢ મનપા વિસ્તારમાં કોઈ મોટા ઉદ્યોગો આવેલાં નથી જેને લઈને મનપાની આવકમાં ખૂબ જ ધીમા પગલે વધારો થઈ રહ્યો છે. જેને ધ્યાને રાખીને ઔદ્યોગિક વસાહતોમાં આવેલા ખુલ્લા પ્લોટમાં હાલ 3 રૂપિયાનો વહીવટી ચાર્જ લેવામાં આવતો હતો, જેમાં વધારો કરીને 5 રૂપિયા સુધી કરવાની દરખાસ્ત કરવામાં આવી છે.
આ ઉપરાંત રહેણાક મિલકતો પર પ્રતિ ચોરસ મીટર 22ના બદલે 30 અને બિન રહેણાક મિલકતો પર 40ની જગ્યા પર 50 રૂપિયા સુધીનો કરવેરો સૂચવવામાં આવ્યો છે. જે કરદાતાઓ 2020 સુધીમાં પાછલી કરની બાકી રકમ જમા કરાવે તો તેમાં તેને 10 ટકાનું વળતર અને આ કરદાતા તેનું ટેક્સ ઓનલાઇન ભરે તો તેમાં 12 ટકા સુધીનું વળતર આપવાની જોગવાઈ બજેટમાં કરવામાં આવી છે. આ ઉપરાંત જો કરદાતા તેની બાકી રહેતો તમામ કર એક સાથે ભરપાઈ કરવાની તૈયારી દર્શાવે તો આવા તમામ કરદાતાઓને વ્યાજમાં 50 ટકા માફી આપવાની ભલામણ પણ કરવામાં આવી છે
આ ઉપરાંત જૂનાગઢ મહાનગરમાં બગીચા, ટ્રાફિક આયર્લેન્ડ વેલિંગ્ટન, ડેમ સહિતના કેટલાક લોક ઉપયોગી અને પ્રવાસન સ્થળોના વિકાસ કરવાની દરખાસ્ત બજેટમાં કરવામાં આવી છે. આ ઉપરાંત જૂનાગઢ મનપા વિસ્તારમાં કેટલીક જગ્યા પર આસામીઓ દ્વારા વૃક્ષ છેદન કરવામાં આવી રહ્યું છે, જેની પરવાનગી માટેનો વહીવટી ચાર્જ પણ વસૂલ કરવાની દરખાસ્ત આ બજેટમાં કરવામાં આવી છે.
