કેશોદ નગરપાલિકામાં પ્રમુખ અને ઉપપ્રમુખની બિનહરીફ વરણી

કેશોદ નગરપાલિકાના સભાખંડમાં યોજાયેલી એક ખાસ બેઠકમાં પ્રમુખ તરીકે ભાજપના લાભુબેન પીપળીયા અને ઉપપ્રમુખ તરીકે ગૌરાંગ વ્યાસની બિનહરીફ સર્વાનુમતે વરણી કરવામાં આવી હતી. નવનિયુક્ત પ્રમુખે તમામ સદસ્યોને એક સાથે રાખીને આગામી સમયમાં કેશોદ નગરપાલિકાનું શાસન ચલાવવાનો કોલ આવ્યો હતો.

• જૂનાગઢની કેશોદ નગરપાલિકાના પ્રમુખ અને ઉપપ્રમુખ તરીકેની વરણી
• પ્રમુખ અને ઉપપ્રમુખની સર્વાનુમતે બિનહરીફ વરણી કરવામાં આવી
• લાભુબેન પીપળીયાની પ્રમુખ તરીકે વરણી

જૂનાગઢ : જિલ્લાની કેશોદ નગરપાલિકામાં આજે ગુરુવારે પ્રમુખની અને ઉપપ્રમુખની વરણી હાથ ધરવામાં આવી હતી. સવારે 11:00 વાગે કેશોદ નગરપાલિકાના સભાખંડમાં ચૂંટાયેલા પ્રતિનિધિઓની હાજરીમાં પ્રમુખ અને ઉપપ્રમુખની વરણી હાથ ધરવામાં આવી હતી. ભાજપમાંથી ચૂંટાયેલા લાભુબેન પીપળીયા પ્રમુખ તરીકે અને ભાજપના જ ગૌરાંગ વ્યાસ ઉપપ્રમુખ તરીકે કેશોદ નગરપાલિકામાં બિનહરીફ રીતે ચૂંટાયેલા જાહેર કરવામાં આવ્યા હતા. જેને ઉપસ્થિત ભાજપના કાર્યકરો અને અધિકારીઓએ શુભેચ્છાઓ પાઠવી હતી.

મહિલા પ્રમુખે લોકોની સમસ્યાને પોતાની સમસ્યા ગણાવી
આજે ગુરુવારે કેશોદ નગરપાલિકાના મહિલા પ્રમુખ તરીકે લાભુબેન પીપળીયાએ પદ ગ્રહણ કર્યું હતું. ગ્રહણ કરતાની સાથે જ તેમણે જણાવ્યું હતું કે, કેશોદ નગરપાલિકાના લોકોની સમસ્યાએ તેમની પોતાની સમસ્યા છે. જલ્દી જ તેમનું નિરાકરણ કરવામાં આવે તે દિશામાં તેઓ વધુ કામ કરશે.

પૂર્વ મુખ્યપ્રધાન આનંદીબેન પટેલનો પણ આભાર માન્યો

પૂર્વ મુખ્યપ્રધાન આનંદીબેન પટેલનો પણ આભાર માનતા લાભુબેન પીપળીયા જણાવ્યું હતું કે, આનંદીબેનના સમયગાળા દરમિયાન મહિલા અનામતનો કાયદો ગુજરાતમાં અમલમાં આવ્યો હતો. જેનો લાભ આજે તેમને મળી રહ્યો છે. આનંદીબેનની સરકાર વખતે નગરપાલિકામાં મહિલા અને પુરુષ સમાન ધોરણો જાળવવા માટે કાયદામાં ફેરફાર કરવામાં આવ્યો હતો. પ્રત્યેક વોર્ડમાં બે મહિલા અને બે પુરુષ ઉમેદવારોને કોર્પોરેટર બનાવવાની દિશામાં આનંદીબેન પટેલની સરકારે મહત્વનું યોગદાન આપ્યું હતું. જેના થકી આજે તેઓ કેશોદ નગરપાલિકાના પ્રમુખ પદ સુધી પહોંચવા માટે સફળ રહ્યા હતા.