જૂનાગઢઃ ઉત્તર પ્રદેશના હાથરસમાં યુવતી પર સામુહિક દુષ્કર્મ આચર્યા બાદ તેનું મોત થતા આ મામલાના પડઘા દેશભરમાં સંભળાયા હતા. ત્યારે સોમવારના રોજ જૂનાગઢ શહેરમાં કોંગ્રેસી કાર્યકરો દ્વારા સામુહિક દુષ્કર્મની ઘટનાને આકરા શબ્દોમાં વખોડી કાઢી હતી અને આરોપીઓ વિરુદ્ધ પણ આકરી કાર્યવાહી થાય તેવી માગ કરીને એક દિવસના પ્રતિક ધરણા યોજયા હતા.
કોંગ્રેસ દ્વારા સમગ્ર રાજ્યમાં ધરણાનો કાર્યક્રમ કરવામાં આવ્યો હતો. જેમાં જૂનાગઢ જિલ્લા અને શહેર કોંગ્રેસ કાર્યાલય ખાતે પણ ધરણા યોજવામાં આવ્યા હતા. જેમાં જૂનાગઢ અને વિસાવદરના ધારાસભ્યના ભીખાભાઈ જોશી અને હર્ષદ રિબડિયાએ ધરણામાં ભાગ લીધો હતો અને ઘટનાને આકરા શબ્દોમાં વખોડી કાઢી હતી.
દુષ્કર્મ બાદ પીડિતાને ગંભીર હાલતમાં હોસ્પિટલમાં સારવાર માટે ખસેડવામાં આવી હતી, જ્યાં તેનું સારવાર દરમિયાન મોત થયું હતું. જે અંગે કોંગ્રેસ આક્રમક મૂડમાં જોવા મળી રહી છે, ત્યારે આગામી દિવસોમાં તમામ આરોપીઓ વિરુદ્ધ આકરી કાર્યવાહી કરવામાં આવે તેવી માગ સાથે સોમવારના રોજ પ્રતિક ધરણા યોજવામાં આવ્યા હતા.
