આનંદ ભયોઃ જામનગર શહેરની જીવાદોરી રણજિતસાગર ડેમ ઓવરફ્લો

વરસાદી પાણી પર નભતો વિસ્તાર હોય અને સારા વરસાદને લઇને જીવાદોરી જેવા ડેમ છલોછલ થઈ જાય તો આનંદ આનંદ જ થાય. જામનગરવાસીઓમાં આજે આવી જ લાગણી ફેલાઈ છે. વાત એમ છે કે જામનગરને બારેમાસ પાણી પૂરું પાડતાં રણજિતસાગર ડેમમાં નવા નીરની આવકથી ડેમ છલોછલ ભરાઈ ગયો છે. રણજિતસાગર ડેમમાં જળસપાટી 27.5 ફૂટની સપાટી વટાવી દીધી છે.ઉપરવાસના ભારે વરસાદના કારણે ડેમમાં પાણીનો આવરો વધ્યો છે.

જામનગરઃ સમગ્ર જામનગર જિલ્લામાં મેઘરાજા મન મૂકીને વરસ્યાં છે ત્યારે જામનગર શહેરનો રણજિતસાગર ડેમ ઓવરફલો થયો છે. મહત્વનું છે કે શહેરને પીવાનું પાણી પુરૂં પાડતો ડેમ ઓવરફલો થયો છે. 27 ફૂટની ઉંડાઈ ધરાવતો ડેમ 3 ફૂટ ઓવરફલો થયો હતો. શહેરીજનો માટે પીવાના પાણીની તંગી એક જ વરસાદમાં દૂર થઈ ગઈ છે.

રાજાશાહીના સમયથી બનેલો રણજિતસાગર ડેમ આજે પણ જામનગરવાસીઓની પ્યાસ બૂઝાવે છે. જામનગરની જીવાદોરી સમાન રણજિતસાગર ડેમ એક જ દિવસમાં ઓવરફ્લો થતાં શહેરીજનોમાં ખુશી જોવા મળી રહી છે. જામનગરમાં સતત ત્રીજા દિવસે પણ મેઘરાજા મહેરબાન બન્યાં છે. રાત્રે પણ મેઘરાજા મન મૂકીને વરસ્યાં હતાં. તો દિવસ દરમિયાન પણ સતત વરસાદ ચાલુ જોવા મળી રહ્યો છે. તો જિલ્લા કલેક્ટર દ્વારા નીચાણવાળા ગામોને એલર્ટ કરાયાં છે. લોકો ઘરની બહાર બિનજરૂરી ન નીકળે તેવી એડવાઇઝરી પણ જાહેર કરવામાં આવી છે.