ગાંધીનગરઃ માર્ચ મહિનાથી રાજ્યમાં તમામ સાધનિક કાર્યો પર પ્રતિબંધ લગાવી દેવામાં આવ્યો છે ત્યારે રાજ્યના મંદિરોના પૂજારીઓ અને કર્મકાંડી બ્રાહ્મણોને રાહત પેકેજ અને આર્થિક સહાય આપવા અંગે સરકાર વિચારી રહી છે. રાજ્ય સરકારે તમામ કલેકટરોને ગુજરાત પવિત્ર યાત્રાધામ વિકાસ બોર્ડ દ્વારા પત્ર લખીને તમામ જિલ્લાઓના પૂજારી તેમ જ કર્મકાંડી બ્રાહ્મણોની યાદી તૈયાર કરવાની સૂચના આપી છે. અગાઉ બિહાર અને પશ્ચિમ બંગાળની સરકાર કર્મકાંડી બ્રાહ્મણો માટે આર્થિક સહાય આપવાની જાહેરાત કરી ચૂકી છે.
ગુજરાત પવિત્ર યાત્રાધામ વિકાસ બોર્ડ દ્વારા લખવામાં આવેલા પત્રમાં જણાવવામાં આવ્યું હતું કે, મંદિરોના પૂજારીઓ તેમ જ પૂજાપાઠ અને કર્મકાંડ ઉપર નભતા બ્રાહ્મણોને કોરોનાની મહામારીના કારણે આર્થિક નુકસાનનો સામનો કરવો પડ્યો છે. આર્થિક નુકસાનને પહોંચી વળવા અને રાહત પેકેજ આપવાની અનેક રજૂઆત રાજ્ય સરકારને મળી છે. આ રજૂઆતના સંદર્ભે સરકારે તમામ જિલ્લાઓના મંદિરોમાં કામ કરતા પૂજારીઓ અને જિલ્લામાં પૂજાપાઠ અને કર્મકાંડી બ્રાહ્મણોની સંખ્યા કેટલી છે તેની તાલુકાવાર વિગતો મગાવી છે. આ વિગત મેળવ્યા બાદ રાજ્ય સરકાર કર્મકાંડી બ્રાહ્મણો માટે ટૂંક સમયમાં આર્થિક સહાય જાહેર કરે તેવી શક્યતા છે. હવે રાજ્ય સરકાર કર્મકાંડી બ્રાહ્મણો માટે આર્થિક પેકેજ જાહેર કરશે કે કેમ તે હવે જોવું રહ્યું.
