વડાપ્રધાન મોદીએ કેવડિયા માટેની ટ્રેનોને આપી લીલી ઝંડી, કેવડિયા રેલવે સ્ટેશનનું પણ લોકાર્પણ

વડાપ્રધાન નરેન્દ્ર મોદીએ આજે દેશના વિવિધ પ્રદેશો સાથે કેવડિયા સ્થિત સ્ટેચ્યૂ ઓફ યુનિટીને જોડતી 8 ટ્રેનોને વીડિયો કોન્ફરન્સના માધ્યમથી લીલીઝંડી આપી પ્રસ્થાન કરાવ્યું હતું. આ ઉપરાંત રાજ્યમાં રેલવેને લગતા અન્ય કેટલાંક પ્રોજેક્ટસનું પણ આ પ્રસંગે ઉદ્ઘાટન કરાયું હતું.

• વડાપ્રધાન નરેન્દ્ર મોદી દ્વારા ગુજરાતને વધુ એક ભેટ
• દેશના વિવિધ પ્રદેશો સાથે કેવડિયા સ્થિત સ્ટેચ્યૂ ઓફ યુનિટીને જોડતી ટ્રેનને અપાઇ લીલીઝંડી
• ગુજરાતમાં રેલવે ક્ષેત્રને લગતા અનેક પ્રોજેકટ્સનું ઉદ્ઘાટન પણ કરાયું

ગાંધીનગર: વડાપ્રધાન નરેન્દ્ર મોદીએ આજે સવારે દેશના વિવિધ પ્રદેશો સાથે કેવડિયા સ્થિત સ્ટેચ્યૂ ઓફ યુનિટીને જોડતી 8 ટ્રેનોને વીડિયો કોન્ફરન્સના માધ્યમથી લીલીઝંડી આપી પ્રસ્થાન કરાવ્યું હતું. આ ટ્રેનોએ સ્ટેચ્યૂ ઓફ યુનિટીને સીમલેસ કનેક્ટિવિટી પ્રદાન કરી છે. આ ઉપરાંત દેશના સૌપ્રથમ ગ્રીન બિલ્ડીંગ રેલ્વે સ્ટેશનનું પણ આ પ્રસંગે ઉદ્ઘાટન થયું હતું.

મુખ્યપ્રધાન રૂપાણી અને રેલવે પ્રધાન પિયૂષ ગોયલ પણ કેવડિયા ખાતે ઉપસ્થિત રહ્યા

આ પ્રસંગે કેવડિયા ખાતેથી રાજ્યના મુખ્યપ્રધાન વિજય રૂપાણી અને કેન્દ્રીય રેલવેપ્રધાન પિયૂષ ગોયલ પણ કેવડિયામાં ઉપસ્થિત રહ્યા હતા. પીએમ મોદી દ્વારા ડભોઇ-ચાંદોદ રૂપાંતરિત બ્રોડ ગેજ રેલવે લાઈન, ચાંદોદ- કેવડિયા નવી બ્રોડગેજ રેલવે લાઈન, પ્રતાપનગર- કેવડિયા નવા વિદ્યુતીકરણ રેલ ખંડ તથા ડભોઇ, ચાંદોદ અને કેવડિયા સ્ટેશનોની નવી ઈમારતોનું પણ ઉદ્ઘાટન કરવામાં આવ્યું હતું. આ ઇમારતોને સ્થાનિક તેમજ આધુનિક પ્રવાસીઓની સુવિધાઓને ધ્યાને રાખીને તૈયાર કરવામાં આવી છે. ઉલ્લેખનીય છે કે, કેવડિયા ગ્રીન બિલ્ડિંગ સર્ટિફિકેટ ધરાવતું ભારતનું સૌપ્રથમ રેલવે સ્ટેશન છે.

નવી રોજગારીનું નિર્માણ થશે

આ પ્રોજેક્ટસના નિર્માણ થકી નવી રોજગારી અને વ્યવસાયની તકો ઉપલબ્ધ થશે. જેના પરિણામે નજીકના આદિવાસી વિસ્તારોમાં વિકાસની પ્રવૃત્તિઓને વેગ મળશે. નર્મદા નદીના કાંઠે મહત્વપૂર્ણ ધાર્મિક અને પ્રાચીન તીર્થ સ્થળો સાથે પણ આ ટ્રેનો જોડશે. જેના લીધે આ ક્ષેત્રના સામાજિક-આર્થિક વિકાસ માટે પ્રેરક બની રેહશે અને સ્થાનિક-આંતરરાષ્ટ્રીય પર્યટનમાં પણ વધારો થશે.

જૂઓ ટ્રેનની ખાસ સુવિધા...

8 ટ્રેનોની વિગતો નીચે મુજબ છે

1. ટ્રેન નં- ૦૯૧૦૩/૦૪- કેવડિયાથી વારાણસી- મહામના એક્સપ્રેસ (સાપ્તાહિક)
   
2. ટ્રેન નં- ૦૨૯૨૭/૨૮- દાદરથી કેવડિયા-દાદર-કેવડિયા એક્સપ્રેસ (દૈનિક)
   
3. ટ્રેન નં- ૦૯૨૪૭/૪૮- અમદાવાદથી કેવડિયા-જનશતાબ્દી એક્સપ્રેસ (દૈનિક)
   
4. ટ્રેન નં- ૦૯૧૪૫/૪૬- કેવડિયાથી હઝરત નિઝામુદ્દીન-નિઝામુદ્દીન-કેવડિયા સંપર્ક ક્રાંતિ એક્સપ્રેસ (દ્વિ-સાપ્તાહિક).
   
5. ટ્રેન નં- ૦૯૧૦૫/૦૬- કેવડિયાથી રીવા-કેવડિયા-રીવા એક્સપ્રેસ (સાપ્તાહિક)
   
6. ટ્રેન નં- ૦૯૧૧૯/૨૦- ચેન્નઈથી કેવડિયા- ચેન્નઈ-કેવડિયા એક્સપ્રેસ (સાપ્તાહિક)
   
7. ટ્રેન નં- ૦૯૧૦૭/૦૮- પ્રતાપનગરથી કેવડિયા- મેમૂ ટ્રેન (દૈનિક)
   
8. ટ્રેન નં- ૦૯૧૦૯/૧૦- કેવડિયાથી પ્રતાપનગર- મેમૂ ટ્રેન (દૈનિક)
   
   જણાવી દઇએ કે, જનશતાબ્દી એક્સપ્રેસમાં નવીનતમ “વિસ્ટા-ડોમ ટૂરિસ્ટ કોચ” બનાવવામાં આવ્યો છે. જેમાં બેસીને પર્યટકો પ્રવાસમાં કુદરતી દ્રશ્યોનો નયનરમ્ય નજારો માણી શકશે.