બે દિવસથી બિન સચિવાલય ક્લાર્કની પરીક્ષા રદ કરવાની એકમાત્ર માગને લઇને ચાલી રહેલા આંદોલનમા આજે પંચર પડ્યું હતું. ગુરૂવારના દિવસે ત્રણ વખત ગાંધીનગર જિલ્લા SP ગાંધીનગર રેન્જ IG અને કલેક્ટર દ્વારા સતત આંદોલનકારી નેતાઓને સાથે રાખીને બેઠકો કરવામાં આવી હતી.
સાંજે ગૃહરાજ્ય પ્રધાન પ્રદિપસિંહ જાડેજા ઉમેદવારોના પ્રતિનિધિ યુવરાજસિંહ જાડેજા, યુવરાજસિંહ ગોહિલ, હાર્દિક પ્રજાપતિ, ભાવસિંહ સરવૈયાને સાથે રાખી SITની જાહેરાત કરતી પ્રેસ કોન્ફરન્સ સંબોધી હતી. જો કે, સવારથી જ ચાલતા વાટાઘાટાને પગલે યુવરાજસિંહ સહિતના લોકોએ ઉમેવાદરો સમક્ષ SITની જાહેરાત અને 10 દિવસમાં પરિણામની વાત કરી આંદોલન સમેટવા ઈચ્છા વ્યક્ત કરી હતી. જેથી ઉમેદવારોએ SITને લોલીપોપ ગણાવી આંદોલન યથાવત જ રાખ્યું છે.
ઉમેદવારોના નેતા બનેલા યુવરાજસિંહ જાડેજા મીડિયા સામે જવાબ પણ આપી શક્યા ન હતા અને પ્રેસ કોન્ફરન્સ પૂર્ણ કર્યા બાદ રફૂચક્કર થઇ ગયા હતા. આંદોલન મુદ્દે ઉમેદવારોના નેતાઓનું સરકારના નિર્ણય તરફનું હકારાત્મક વલણ અને ઉમેદવારોના વિરોધને જોતા પોલીસ દ્વારા આ ચારેય નેતાઓને કલેક્ટર કચેરીથી મીડિયા અને લોકોની નજરથી બચાવીને લઈ જવાયા હતા. તો બીજી તરફ પ્રદર્શનમાં બેઠેલા ઉમેદવારોની સંખ્યા પણ રાત્રે અડધી થઈ ગઈ હતી. આંદોલનકારી નેતાઓ ફૂટી ગયા હોવાની ઉમેદવારોમાં ચર્ચા વહેતી થઈ હતી. બીજી તરફ આંદોલન કરી રહેલા ઉમેદવારોએ પોતાનુ વલણ એક જ રાખ્યું હતું અને જ્યાં સુધી પરીક્ષા રદ કરવામાં નહીં આવે ત્યાં સુધી તેમનું આંદોલન ચાલુ જ રહેશે તેવું આહવાન કર્યું હતું.
ગત બે દિવસથી પ્રદર્શન કરી રહેલાં ઉમેદવારોએ આંદોલન રાજકીય રંગ ન પકડે તે માટે ખાસ ધ્યાન રાખ્યું હતું. જેને પગલે હાર્દિક પટેલ પોતાના સમર્થકો સાથે પહોંચ્યો ત્યારે રીતસરની ધક્કામુકી કરી મુકી હતી. બીજી તરફ તેઓના સમર્થનમાં પહોંચેલા પૂર્વ મુખ્યપ્રધાન શંકરસિંહ વાઘેલા અને કોંગ્રેસ પ્રદેશ પ્રમુખ અમિત ચાવડાને પક્ષની રીતે નહીં વ્યક્તિગત રીતે સમર્થન આપવા અપીલ કરી હતી. ગુરૂવારની મોડી રાત્રે વિપક્ષના નેતા પરેશ ધાનાણી ઉમેદવારોને મળવા પહોંચ્યા હતા તો પ્રદેશ કોંગ્રેસના પ્રમુખ ગુરૂવારે બે વખત પહોંચ્યા હતા સવારે ચર્ચા કર્યા બાદ પક્ષના નેતા પરેશ ધાનાણીની સાથે અમિત ચાવડા પણ પહોંચ્યા હતા અને તેમણે ઉમેદવારોને નિરાશ નહીં થવા અને તેમની સાથે જ હોવાની વાત કરી હતી
સરકારે SITની રચના કરી છે, જેમાં ચેરમેન તરીકે સામાન્ય વહીવટ વિભાગના અગ્ર સચિવ કમલ દયાનીની નિમણૂંક કરી છે. જ્યારે સભ્ય તરીકે IPS મનોજ સાધારણ IPS મયંકસિંહ ચાવડા અને સભ્ય સચિવ તરીકે સામાન્ય વહીવટ વિભાગના જલવંત ત્રિવેદીની નિમણૂંક કરવામાં આવી છે. ગૃહપ્રધાન પ્રદિપસિંહ જાડેજાએ કહ્યું કે, SIT દસ દિવસમાં તમામ તપાસ પૂર્ણ કરશે. સવાલ એ થાય કે, દસ દિવસમાં રાજ્ય માંથી મળેલી 40 જેટલી ફરિયાદો અને CCTV કેમેરા કેવી રીતે તપાસ કરશે ?
