પેથાપુર મામલે દંપતિને ગાંધીનગર લાવવામાં આવ્યા, પૂછપરછ હાથ ધરાઈ

ત્યજેલા બાળક સ્મિત કેસમાં ગૃહપ્રધાન હર્ષ સંઘવીએ પત્રકાર પરીષદ સંબોધી જણાવ્યું હતું કે, ગઇકાલે બાળકને મુકીને તેના પિતા ભાગી ગયા હતાં. અને તેને રાજસ્થાનથી ઝડપી પાડવામાં આવ્યો હતો. તેને ગુજરાત લાવવામાં આવી રહ્યો છે. તેની પુછપરછ બાદ આ કેસમાં વધુ વિગતો સામે આવશે.

• બાળકને દત્તક લેવા અનેક પરિવારો તૈયાર થયા
• ભાગેડું પિતાને રાજસ્થાનથી ઝડપી પાડવામાં આવ્યો
• તપાસ દરમ્યાન CCTVમાં એક શંકાસ્પદ સેન્ટ્રો કાર દેખાતા ભાંડો ફુટ્યો

ગાંધીનગર: પેથાપુરની ચકચારી બનેલી ઘટનામાં બાળકના માતા પિતાને રાજસ્થાનથી ગાંધીનગર લાવવામાં આવ્યા છે. મળતી માહિતી પ્રમાણે આરાધના બંગલોમાં પૂછપરછ હાથ ધરવામાં આવી છે. હાલ પત્નીની LCB દ્વારા પૂછપરછ કરવામાં આવી રહી છે આ બાદ SOG દ્વારા પૂછપરછ હાથ ધરવામાં આવશે.

બાળક સચિનની પત્નીનું નથી : ગૃહ પ્રધાન

ગૃહપ્રધાને જણાવ્યું હતું કે, ગતરાતના 11:30 વાગ્યાથી હું પોલીસના સંપર્કમાં હતો. મીડિયાની ટીમ, ગાંધીનગર પોલીસ અને નાગરિકો પણ માતા પિતાની શોધવા માટે મહેનત કરી હતી. જેના કારણે બાળકના પિતાની ઓળખ થઇ ગઇ છે. આ બાળકનું નામ શિવાંશ છે, અને તેની ઉંમર 8 થી 10 માસ હોઇ શકે છે. બાળકના પિતા ઉત્તરપ્રદેશના છે અને વડોદરાની એક કંપનીમાં કામ કરે છે. ગાંધીનગરના સેક્ટર 6માં તે પોતાના માતા-પિતા સાથે રહે છે. જો કે આસપાસના લોકો સાથે વાત કરતાં સામે આવ્યું છે કે, આ બાળક સચિનની પત્નીનું નથી. સચિનને માત્ર એક 4 વર્ષનો દિકરો છે. હવે આ ઘટનામાં શું હકીકત છે તે સચિનની પુછપરછથી જ સામે આવી શકે છે. જો કે સચિનને રાજસ્થાનના કોટાથી ઝડપી પાડવામાં આવ્યો છે અને તેની ગાંધીનગર લાવવામાં આવી રહ્યો છે ત્યારે આ અંગે વધુ વિગતો સામે આવી છે.

બાળકને દતક લેવા માટે અનેક પરિવારોના ફોન આવ્યા - ગૃહપ્રધાન હર્ષ સંઘવી

ગૃહપ્રધાન હર્ષ સંઘવીએ જણાવ્યું હતું કે, આ બાળકના માતા પિતાને શોધવા માટે જૂદા જૂદા વિભાગની 14 જેટલી ટીમ બનાવવામાં આવી હતી. આ ટીમ દ્વારા CCTV, ટેકનિકલ બાબતોને લઈને આસપાસના શહેરો અને ગામડાઓમાં તપાસ હાથ ધરવામાં આવી હતી અને આખરે પોલીસ, પત્રકારો, અને જનતાના સહિયારા પ્રયાસોથી આ બાળકના માતા પિતાને શોધવામાં સફળતા મળી છે. વધુમાં તેમણે જણાવ્યું હતું કે, મીડિયામાં અને સોશિયલ મીડિયામાં બાળકના ફોટા વાયરલ થતાં, બાળકને દતક લેવા માટે ગુજરાતભર માંથી અનેક પરિવારોના મારી ઓફિસમાં કુલ 190 થી વધુ ફોન આવ્યા હતા.

આ બાળકને અમે ક્યારેય જોયું નથી : સચિનના પાડોશી

આ બાળકને લઈને અનેક તર્ત વિતર્કો સામે આવ્યા હતા, ત્યારે પોલીસ વિભાગની સફળ કામગીરીને કારણે બાળકના પિતા સુધી પહોંચી શકાયું હતું. આ દરમિયાન સચિનના પાડોશીઓએ કહ્યું હતું કે, આ બાળક સચિનનું નથી અને અમે આ બાળકને આ પહેલા અહિયા જોયું નથી.

કેવી રીતે કોઈ બાળકને દત્તક લઈ શકાય?

સૌ પ્રથમ જે તે પરિવાર દ્વારા રાજ્ય સરકારના મહિલા અને બાળ વિભાગમાં લેખિત અરજી કરવાની હોય છે, આ સાથે જ બાળકના નામે ૨૫ ટકા જેટલી પ્રોપર્ટી આપવી આપવી પડે છે. આ સમગ્ર પ્રક્રિયા ૪ થી ૬ મહિના સુધી ચાલે છે અને દત્તક લીધા બાદ રાજ્ય સરકારના બાળ વિભાગ દ્વારા અમુક સમયના અંતરે બાળકની પરિસ્થિતિ અને બાળકની સારસંભાળ પરિવાર કઇ રીતે કરી રહ્યું છે, તે બાબતે પણ તપાસ હાથ ધરવામાં આવે છે.

CCTV માંથી સામે આવી સચિનની વિગતો

મહત્વનું છે કે, મોડી રાત્રે પેથાપુરથી બાળક મળી આવ્યું હોવાનું સામે આવતા સ્થાનિક પોલીસ અને મીડિયાની ટીમે માતા-પિતાની શોધખોળ આદરી હતી. તપાસ દરમ્યાન સીસીટીવીમાં એક શંકાસ્પદ સેન્ટ્રો કાર દેખાઇ આવી હતી. આ ગાડી અંગે વધુ તપાસ કરતાં આ કારનો નંબર GJ01KL7363 હોવાનું સામે આવ્યું હતું. કાર માલિક ગુજરાત છોડીને રાજસ્થાન ચાલ્યો ગયો હોવાનું પણ સામે આવ્યું હતું.