- મુખ્યપ્રધાનની અધ્યક્ષતામાં બુધવારે કેબિનેટ બેઠક યોજાશે
- 10 કલાકે કેબિનેટ બેઠકનુ આયોજન થશે
- 6થી 8ના ઓફલાઈન વર્ગ શરૂ કરવાની વિચારણા
ગાંધીનગર : ગત ગુરુવારે રાજ્ય સરકારની કેબિનેટ બેઠક યોજાઈ હતી, ત્યારે બુધવારે સવારે 10 વાગ્યે મુખ્યપ્રધાન વિજય રૂપાણી ( CM Vijay Rupani ), નાયબ મુખ્યપ્રધાનની અધ્યક્ષતામાં કેબિનેટ બેઠક ( Cabinet meeting )યોજાશે. કોરોનાનું સંક્રમણ ઘટ્યું છે, ત્યારે સ્કૂલોમાં અન્ય ધોરણના વિદ્યાર્થીઓને ઓફલાઇન ભણવાની પરમિશન આપવી કે નહીં તેને લઈને ખાસ ચર્ચા કરવામાં આવશે. કોર કમિટીમાં તેનો અંતિમ નિર્ણય કરવામાં આવશે. જો કે સંભવિતતા એવી પણ છે કે, ધોરણ 6થી 8 ના વિદ્યાર્થીઓની ઓફલાઈન સ્કૂલો શરૂ થાય. આ ઉપરાંત રૂપાણી સરકારના 5 વર્ષની ઉજવણીના તેમજ કોરોનાની સંભવીત ત્રીજી લહેર પહેલા વેક્સિન પ્રક્રિયા વેગવંતી બનાવવા અંગે પણ ચર્ચા કરવામાં આવશે.
આ પણ વાંચો: રાજ્યમાં શાળાઓ અને કૉલેજો અંગે નિર્ણય લેશે, સરકાર બનાવશે SOP
રૂપાણી સરકારના 5 વર્ષની ઉજવણી
CM વિજય રૂપાણીએ મુખ્યપ્રધાન પદે 5 વર્ષ પૂર્ણ કર્યા છે, જેથી ઓગસ્ટ મહિનામાં વિજય રૂપાણી સરકારના 5 વર્ષની ઉજવણી કરવાનું આયોજન સરકાર દ્વારા કરાયું છે. જેને લઇને એક કમિટી પણ બનાવવામાં આવી છે. મળેલી માહિતી અનુસાર, ઓગસ્ટ મહિનાનાની શરૂઆતમાં આ 5 વર્ષની ઉજવણી કોરોનાને જોતા કઈ રીતે કરવી તેને લઈને ખાસ ચર્ચા કરાશે. જો કે આ પહેલા રાજ્યના તમામ પ્રધાનો પાસેથી છેલ્લાં 5 વર્ષની સારી કામગીરીની વિગતો મંગાવવામાં આવી હતી. જેથી આ અંતિમ તૈયારીઓ ક્યા પ્રકારની કરવી તેને લઈને ચર્ચા થશે.
આ પણ વાંચો: દાહોદની ઘટનાના પડઘા કેબિનેટમાં, સરકારે કડક કાર્યવાહીની આપી સૂચના, કોંગ્રેસે સરકાર પર સાધ્યું નિશાન
ઓફલાઈન સ્કૂલો શરૂ કરવા વિચારણા
સૂત્રોના જણાવ્યા અનુસાર, ધોરણ 6થી 8 ના વર્ગો શરૂ કરવા શિક્ષણ વિભાગે તૈયારી શરૂ કરી દીધી છે. ઓગસ્ટ માસની શરૂઆતથી ધોરણ 6થી 8 ના વર્ગ શરૂ કરવાની વિચારણા પર કેબિનેટમાં ભાર આપવામાં આવશે. 15 ઓગસ્ટ બાદ ધોરણ 1થી 5 શરૂ કરવા બાબતે વિચારણા થશે. 50 ટકા કેપિસિટી સાથે વર્ગો શરૂ થઈ શકે છે. કોરોનાની બીજી લહેર બાદ પ્રાઇમરી સ્કૂલના વિદ્યાર્થીઓ ઓનલાઈન એજ્યુકેશન મેળવી રહ્યા છે, ત્યારે વિદ્યાર્થીઓના હિતને ધ્યાનમાં લઇ ઓફલાઈન શાળાઓ શરૂ કરવા અંગે કમિટીમાં નિર્ણય લેવાઈ શકે છે.
