વલસાડઃ જિલ્લા સહિત સંઘપ્રદેશ દાદરા નગર હવેલીમાં ચોમાસુ બેસી ગયા બાદ પણ હજુ સુધી જોઈએ તેવો વરસાદ વરસ્યો નથી. આ વિસ્તારમાં મોટાભાગે ડાંગરની ખેતી થાય છે. એ સિવાય તુવેર, અડદ જેવા કઠોળનું વાવેતર કરવામાં આવે છે. જૂનના પ્રથમ અઠવાડિયામાં જ રાજ્યની આફત સમા વાવાઝોડાને કારણે વરસાદ વરસતા મોટાભાગના ખેડૂતોએ વાવણીની શરૂઆત કરી હતી. પરંતુ તે બાદ વરસાદ વરસ્યો નથી.
વલસાડ જિલ્લામાં વરસાદની સ્થિતિ
- ચોમાસાની સિઝનમાં આ વર્ષે 50 ટકા ઓછો વરસાદ નોંધાયો
- વલસાડ જિલ્લા સહિત દમણ અને દાદરા નગર હવેલીમાં પણ આ જ પરિસ્થિતિ
- રાજ્યમાં વાવાઝોડાને કારણે થયેલા વરસાદને લીધે ખેડૂતોએ કરી હતી વાવણી
- વરસાદ ખેંચાતા ખેડૂતો મુશ્કેલીમાં મૂકાયા
રાજ્યમાં વલસાડ જિલ્લો ચેરાપૂંજીનું બિરુદ પામ્યો છે. દર વર્ષે જૂન માસની 29મી જૂન સુધીમાં અહીં સરેરાશ 358.6 mm વરસાદ વરસે છે. જ્યારે આ વખતે માત્ર 177 mm વરસાદ વરસ્યો છે. એ જ રીતે દાદરા નગર હવેલીમાં અને દમણમાં 29 જૂન સુધીમાં સરેરાશ 330 mmથી 268 mm વરસાદ વરસે છે. જે આ વખતે અનુક્રમે 208.7 mm અને 122 mm વરસાદ જ વરસ્યો છે. એક તરફ 29મી જૂને વાદળછાયા વાતાવરણ વચ્ચે મેઘરાજાએ પોતાની છડી પોકારી છે અને જિલ્લાના કેટલાક વિસ્તારમાં વરસાદે ધીમીધારે વરસવાનું શરૂ કર્યું છે. જેને કારણે ખેડૂતોમાં હરખની હેલી છવાઈ છે અને લોકોએ ગરમીમાંથી રાહત મેળવી છે.
વલસાડ જિલ્લામાં ચાલુ ચોમાસુ સિઝનની વાત કરીએ તો 29 જૂન 2020 સુધીમાં તાલુકા મુજબ કપરાડામાં સૌથી વધુ 344 mm વરસાદ નોંધાયો છે. જ્યારે પારડી તાલુકામાં સૌથી ઓછો માત્ર 20 mm વરસાદ નોંધાયો છે. અન્ય તાલુકામાં વાપીમાં 94mm, ધરમપુરમાં 241 mm, ઉમરગામમાં 108 mm અને વલસાડમાં 92 mm વરસાદ વરસી ચૂક્યો છે.
ગત વર્ષે 2019માં 29 જૂન સુધીમાં વલસાડ તાલુકામા સિઝનનો કુલ 231mm વરસાદ નોંધાયો હતો. પારડીમાં 290mm, ધરમપુરમાં 217mm, કપરડામાં 318mm, વાપીમાં 311 mm, ઉમરગામમાં 224.5mm વરસાદ નોંધાયો હતો. જ્યારે સંઘપ્રદેશ દમણમાં 192.5mm અને દાદરા નગર હવેલીમાં 300 mm વરસાદ નોંધાયો હતો.
રવિવારે દિવસભર વાદળછાયું વાતાવરણ રહ્યું હતું. જે બાદ સોમવારે સવારે અસહ્ય બફારા સાથે મેઘરાજાએ મેઘના મંડાણ કર્યા હતાં. વાપીમાં મેઘરાજા મન મૂકીને વરસ્યા હતા. વાપીમાં વરસાદને કારણે ઠેકઠેકાણે પાણી ભરાવાના બનાવો બન્યાં હતાં. એમાં પણ દર વર્ષની જેમ આ વર્ષે પણ વાપીના ઇસ્ટ-વેસ્ટ વિસ્તારને જોડતો રેલવે અન્ડરપાસ પાણીમાં તરબોળ થયો હતો. એ સિવાય વિવિધ વિસ્તારોમાં ગટર અને પાણીની પાઇપલાઇન માટે કરેલા ખોદકામની નરમ માટીમાં કેટલાક વાહનો ફસાયા હતા.
ગત વર્ષે વલસાડ જિલ્લામાં 7 ઓગસ્ટ 2019 સુધીમાં અનરાધાર વરસાદ વરસ્યો હતો. ગત વર્ષે જિલ્લામાં કુલ મોસમના વરસાદની વાત કરીએ તો, ઉમરગામમાં 2034 mm, કપરાડામાં 3208 mm, ધરમપુરમાં 2474, પારડીમાં 2427 mm, વલસાડમાં 2045 mm અને વાપીમાં 2903 mm વરસાદ નોંધાયો હતો.
કન્ટ્રોલરૂમ તરફથી મળેલી વિગતો મુજબ 2018માં જૂન-જુલાઈ અને 7 ઓગસ્ટ 2018 સુધીમાં વલસાડના કપરાડામાં 2104 mm, ઉમરગામમાં 2062 mm, દાદરા નગર હવેલીના પાટનગર સેલવાસમાં 2002 mm, ધરમપુરમાં 1971 mm, વલસાડમાં 1955 mm, પારડીમાં 1748 mm, વાપીમાં 1702 mm જ્યારે દમણમાં 1607 mm વરસાદ નોંધાયો હતો. જે સરેરાશ ઇંચમાં ગણતરી કરીએ તો, જિલ્લામાં 63થી 83 ઇંચ જેટલો વરસાદ વરસ્યો હતો.
