વલસાડ: વાપીમાં બિહાર વેલફેર એસોસિએશન દ્વારા શાળામાં સ્ટેશનરીનું વિતરણ કરવામાં આવ્યું હતું. આ અંગે બિહાર વેલફર એસોસિએશનના પ્રમુખ વિપુલ સિંઘે જણાવ્યું હતું કે, સંસ્થાના ચેરમેન અને સભ્યોએ નિર્ધાર કર્યો છે કે, સંસ્થા દ્વારા આદિવાસી વિસ્તારની શાળાઓમાં બાળકો માટે સેવાના કાર્યો કરવામાં આવે. આ ઉદ્દેશ્યને ધ્યાનમાં રાખી શાળામાં નોટબુક, પેન્સિલ આપવાનું નક્કી કરવામાં આવ્યું હતું. આ શાળામાં 271 વિદ્યાર્થીઓને બુક, પેન્સિલ, પેન અને બિસ્કિટનું વિતરણ કરી જરૂરી મદદ પૂરી પાડી છે.
આ ઉપરાંત આગામી દિવસોમાં પણ સંસ્થાએ નિર્ધાર કર્યો છે કે, જે અનાથ બાળકો છે તેમને બનતી મદદ કરવામાં આવશે. સંસ્થા તરફથી દર વર્ષે ધાબળા, પુસ્તકોનું વિતરણ કરવામાં આવે છે. આ ઉપરાંત આવનારા દિવસોમાં મેડિકલ ચેકઅપ કેમ્પ કરવાનું પણ આયોજન કરવામાં આવ્યું છે. વાપીમાં ઉનાળાની સિઝનમાં લોકોને પીવાનું શુદ્ધ પાણી મળે તે માટે પેયજળ પરબની વ્યવસ્થા કરવાનું પણ એસોસિએશન દ્વારા નક્કી કરવામાં આવ્યું છે.
સંસ્થાના ચેરમેન ડૉ.કે.પી. સિન્હાએ જણાવ્યું હતું કે, સંસ્થા દ્વારા અનાથ બાળકોને દત્તક લઇ તેને બનતી મદદ કરવાનો નિર્ધાર કરવામાં આવ્યો છે. ગરીબ બાળકોને મદદ કરીશું, તો તે દેશનું ભવિષ્ય બની સારા નાગરિક તરીકે દેશનું અને સમાજનું નામ રોશન કરી શકશે. જેને ધ્યાનમાં રાખીને અમે આ સામાજિક પ્રવૃત્તિઓ કરી રહ્યાં છીએ.
ઉલ્લેખનીય છે કે, બિહાર વેલ્ફેર એસોસિએશન દ્વારા કાકડકોપર ગામની પ્રાથમિક શાળામાં અભ્યાસ કરનારા 271 બાળકોને પુસ્તકો, પેન, પેન્સિલ અને બિસ્કીટ આપતા તમામ વિદ્યાર્થીઓના ચહેરા પર ખુશીની ઝલક જોવા મળી હતી.
