વાપીમાં દમણગંગા ખાડીમાંથી મળી આવ્યો M-crox સિરપની બોટલોનો જથ્થો

વાપીના હરિયા પાર્ક નજીક આવેલ દમણગંગા ખાડીની ખનકીમાં કોઈ શખ્સો M-crox સિરપની બોટલોનો જથ્થો ફેંકી ગયું છે. મોટી માત્રામાં મળી આવેલી બોટલો પર S. N. ફાર્માનું લેબલ મારેલું છે. આ અંગે ડ્રગ વિભાગ તરફથી મળેલી વિગતો મુજબ S. N. ફાર્મા નામની એજન્સી એક મહિલા ચલાવતી હતી. જેનું લાયસન્સ રદ્દ કરી દીધું છે. એટલે સિરપની બોટલો કોણે જાહેરમાં ફેંકી છે તે અંગે તપાસ હાથ ધરી આગળની કાર્યવાહી કરવામાં આવશે.

• દમણગંગા નદી નજીક ખાડીમાંથી મળ્યો M-crox બોટલનો જથ્થો
• બોટલો એસ. એન. ફાર્માની લેબલ વાળી છે
• એજન્સી સંચાલક અને ડ્રગ વિભાગની એકબીજા પર ખો

વાપી : વાપીના હરિયા પાર્ક વિસ્તારમાં દમણગંગા નદીની ખનકીમાં S. N. ફાર્માના લેબલ ધરાવતી M-crox નામની સિરપની બોટલોનો મોટો જથ્થો મળી આવતા આ અંગે ડુંગરા પોલીસે તપાસ હાથ ધરી છે. દમણગંગા નદીની ખનકીમાં ફેંકેલી બોટલો અંગે મળતી વિગતો મુજબ આ M-crox નામની સીરપ છે. જેના પર આ જ વિસ્તારમાં એજન્સી ધરાવતી શીતલ નામની મહિલાની S. N. ફાર્માના લેબલ મારેલા છે. જોકે, તેના પર એજન્સીનું એડ્રેસ જૂનું છે. જ્યારે એસ. એન. ફાર્માની સંચાલક શીતલ સાથે આ અંગે ટેલિફોનિક વાત કરતા તેમણે આ જથ્થો ફેંક્યો નથી તેવું જણાવી તેમના દ્વારા કોઈને અપાયા બાદ તેમણે તે ફેંક્યો હોવાની વાત કરી છટકવાની કોશિશ કરી છે.

વાપીમાં દમણગંગા ખાડીમાંથી મળી આવ્યો M-crox સિરપની બોટલોનો જથ્થો

જાહેરમાં કોઈપણ પ્રકારની દવા ફેંકી નથી શકાતી

આ અંગે ડ્રગ વિભાગના અધિકારી પ્રકાશ પુરસનાની સાથે ટેલિફોનિક વાત કરતા તેમણે આ અંગે તપાસ કરી જણાવ્યું હતું કે, આ રીતે કોઈ જાહેરમાં દવાનો જથ્થો ખાલી કરી શકતું નથી. હાલમાં મળી આવેલ દવાની બોટલો પર જે એજન્સીનું નામ છે તે એજન્સીનું 2 વર્ષથી લાયસન્સ સસ્પેન્ડ કરી દેવામાં આવ્યું છે. એટલે આ જથ્થો ક્યાંથી આવ્યો અને કોણે ખાલી કર્યો તે અંગે તપાસ હાથ ધરી કાયદેસરની કાર્યવાહી કરવામાં આવશે. જોકે, ઘણીવાર મેડિકલ સ્ટોરવાળા કે એજન્સીવાળા એક્સપાયરી ડેટના ત્રણેક મહિના પહેલા દવાનો જથ્થો ડિસ્ટ્રોય કરતા હોય છે. પરંતુ તે જાહેરમાં નથી કરી શકતા. હાલમાં આ જથ્થો એકત્ર કરી નિયમ મુજબ ડિસ્ટ્રોય કરવાની કામગીરી હાથ ધરી હોવાનું જણાવ્યું હતું.

વાપીમાં દમણગંગા ખાડીમાંથી મળી આવ્યો M-crox સિરપની બોટલોનો જથ્થો

એજન્સીનું લાયસન્સ 2 વર્ષ પહેલાં ડ્રગ વિભાગે સસ્પેન્ડ કર્યું છેજોકે, એજન્સીની સંચાલક મહિલા અને ડ્રગ વિભાગ આ સમગ્ર મામલે એક બીજા પર ખો આપી રહ્યા છે. એમાંય જે મહિલાની એજન્સીનું એડ્રેસ ફેંકેલી સિરપની બોટલો પર છે તે સ્થળે એજન્સીની ઓફિસને બદલે કરિયાણાની દુકાન છે. તે સ્થળે 2 વર્ષ પહેલાં મહારાષ્ટ્ર ડ્રગ વિભાગે રેઇડ કરી હતી. જે બાદ એજન્સીની ઓફીસ મકાન માલિકે ખાલી કરાવી નાખી હતી. તો, છેલ્લા 2 વર્ષથી તે મહિલા એ જ વિસ્તારમાં મેડિકલ સ્ટોર ધરાવે છે.

2 વર્ષ પહેલાં એસ. એન. એજન્સી પર મહારાષ્ટ્ર ડ્રગ વિભાગે કરી હતી રેડ

મતલબ કે, એક સસ્પેન્ડ એજન્સીની સંચાલક મહિલાએ મેડિકલ સ્ટોર ખોલી નાખ્યો છે. તેમ છતાં તે અંગે ડ્રગ વિભાગ અંધારામાં હોય તેમ કોઈ કાર્યવાહી કરવાને બદલે તેને છાવરતા હોવાનું ફલિત થયું છે. તો, ડ્રગ વિભાગે સિરપની બોટલો એકત્ર કરવા અન્ય એજન્સીને આદેશ આપ્યા બાદ સાંજ સુધી દવાનો જથ્થો લેવા કોઈ આવ્યું નહોતું. આખરે ડુંગરા પોલીસે તમામ બોટલને એકત્ર કરી કબ્જે લઈ વધુ તપાસ હાથ ધરી છે.