ભાવનગર શહેરની આ કોલેજે વિદ્યાર્થી- વાલી માટે વેક્સિનેશન યોજયું : 700 લોકોએ લીધી રસી

ભાવનગર શહેરની પ્રથમ નંદકુવરબા મહિલા કોલેજે પોતાની કોલેજની વિદ્યાર્થીનીઓ અને વાલી માટે વેક્સિનેશન કેમ્પ યોજ્યો હતો. મહાનગરપાલિકાના હેલ્થ સેન્ટરના સહયોગથી અને વિભાવરીબેનના પ્રયાસથી વેક્સિનેશન કેમ્પ શિક્ષણ ક્ષેત્રે પ્રથમ વખત યોજાયો. પહેલા દિવસે 700 લોકોએ પ્રથમ વેક્સિનનો ડોઝ લીધો હતો.

• સૌથી પહેલી કોલેજ ભાવનગરની બની વેક્સિનેશનમાં અગ્રેસર
• 700 લોકોએ વેક્સિનેશન કેમ્પમાં લીધો પ્રથમ ડોઝ
  

ભાવનગર: શહેરની નંદકુંવરબા મહિલા કોલેજ દેવરાજનગર ખાતે કોરોના વેક્સિનેશનના કેમ્પનું આયોજન કરવામાં આવ્યું હતું. ભાવનગરની પ્રથમ એવી કોલેજ જેને વિદ્યાર્થી અને તેના વાલી માટે કેમ્પ યોજવામાં આવ્યો છે. મહાનગરપાલિકાના હેલ્થ સેન્ટરનો સહયોગ લઈને વેક્સિનેશન કરવામાં આવ્યું હતું અને વેક્સિન લીધા બાદ દરેકને શુભેચ્છાઓ આપવામાં આવી હતી.

વેક્સિનેશન કેમ્પમાં 700 લોકોએ પહેલો ડોઝ લીધો
ભાવનગરમાં રાષ્ટ્રીય સેવા યોજનાના ઉપક્રમે કોલેજમાં અભ્યાસ કરતી વિદ્યાર્થીનીઓ અને તેના પરિવાર માટે ભાવનગર પૂર્વ વિધાનસભા બેઠકના ધારાસભ્ય અને ગુજરાત રાજ્યના શિક્ષણ અને મહિલા બાળ કલ્યાણ વિભાગના મંત્રી વિભાવરીબેન દવેના પ્રયાસ અને મહાનગરપાલિકાના સહયોગથી દેવરાજનગર મહિલા કોલેજના હોલ ખાતે વેક્સિનેશન કેમ્પનું આયોજન કરવામાં આવ્યું હતું. આ કોરોના મહામારીમાં નંદકુંવરબા મહિલા કોલેજ દેવરાજનગર દ્વારા ઉકાળા વિતરણ, કીટ વિતરણ, કોરોનાના વિશે સાચી જાણકારી માટે જાગૃતિના કાર્યક્રમો વર્ષ દરમિયાન કરવામાં આવ્યા હતા. ત્યારે હવે કોલેજના વિદ્યાર્થીઓ, અધ્યાપકો, કર્મચારીઓ વાલીઓ અને શુભેચ્છકો સહિત 700થી વધુ રસીનો પહેલો ડોઝ લઈ કોરોના સામે લડવા સક્ષમ બન્યા હતા.

આ પણ વાંચો: વડોદરામાં રસીકરણ ઘટતા કોર્પોરેશન દ્વારા રીક્ષા ચાલકો અને વેપારીઓનું કરાઈ રહ્યું છે રજિસ્ટ્રેશન

વધારે વેક્સિનેશનથી કોરોના સામે લડી શકાશે
ભાવનગરની નંદકુંવરબા મહિલા કોલેજના ટ્રસ્ટી ભરતસિંહ ગોહિલએ જણાવ્યું હતું કે છેલ્લા એક વર્ષથી કોરોનાની વૈશ્વિક મહામારી ચાલી રહી છે. આ કોરોનાને હરાવવા માટે ફરજીયાત માસ્ક, સેનેટાઈઝર અને સોશિયલ ડિસ્ટનસ રાખવું જોઈએ. વધારેને વધારે પ્રમાણમાં વેક્સિનેશન થાય તો જ કોરોના સામે લડી શકીશું. વિશ્વમાં ભારત દેશમાં સૌથી વધુ યુવા વર્ગ ધરાવતો દેશ છે. આ કોલેજમાં અભ્યાસ કરતી દીકરીઓ અને તેના પરિવારજનોને વેક્સિનેશન કરવામાં આવ્યું હતું.