- યુવકના ગુસ્સાએ યુવકને બનાવ્યો આરોપી
- ઉશ્કેરાયેલા યુવકે ATM મશીનને પથ્થર માર્યો અને બની ગયો આરોપી
- પોલીસે આરોપીની અટકાયત કરી વધુ તપાસ હાથ ધરી
અમદાવાદ: વેજલપુર પોલીસના સકંજામાં દેખાતા આરોપી ફેઝલ શેખની કહાની કંઈક અજીબ છે. પહેલી નજરે તો આ વ્યક્તિ ATM તોડી અને ચોરી કરવા આવ્યો હોય એવી હકીકત CCTV જોઈને માલુમ પડે છે પરંતુ જ્યારે ઉંડાણપૂર્વક તપાસ કરવામાં આવી ત્યારે બહાર આવ્યું કે, આ યુવક બેન્ક દ્વારા આપવામાં આવતી સર્વિસ બાબતે દાખવવામાં આવેલી ઘોર બેદરકારીના કારણે આજે કાયદાના કુંડાળામાં ફસાઈ ગયો છે.
આ પણ વાંચો: સુરતમાં ગેસ કટરથી ATM કાપી 14.51 લાખની ચોરી
ATM મશીનનો કાચ તોડી નાખ્યો
ફૈઝલને તેના પરિવારના કોઈ વ્યક્તિને તાત્કાલિક રૂપિયા ATM મશીનથી ટ્રાન્સફર કરવાના હતા. બેન્કના ATM મશીન રૂપિયા તો જમા કરી લીધા પછી ટ્રાન્સફર થવાને બદલે મશીનમાં ટેક્નિકલ ખામીની સૂચના આવવા લાગી. આરોપી ફૈઝલ શેખ દ્વારા બેન્કના ટોલ ફ્રી નંબર અને અધિકારીઓનો અવાર-નવાર સંપર્ક કરવામાં આવ્યો પરંતુ પરિણામે કોઈ મદદ ન મળી અને ફૈઝલ ઉશ્કેરાઈ ગયો. પોતાના સ્વજનને રૂપિયા ન પહોંચતા અને મશીનમાંથી રૂપિયા બહાર પણ ન નીકળતા યુવકે આખરે કંટાળીને ગુસ્સામાં આવી ATM મશીનનો કાચ તોડી નાખ્યો અને બની ગયો અપરાધી.
આ પણ વાંચો: ખેડાના ચકલાસીમાં એટીએમ તોડી ચોરી કરવાનો પ્રયાસ કરનારા ચાર આરોપીઓ ઝડપાયા
યુવક કરતાં વધારે કસૂરવાર બેન્કની બેદરકારી
હાલ તો આ યુવક ATM ચોરીના ગુનામાં જેલના સળિયા પાછળ પહોંચી ગયો છે પરંતુ હકીકતમાં જોવા જઈએ તો, યુવક કરતાં વધારે કસૂરવાર બેન્કની બેદરકારી છે. 24 કલાક અને 365 દિવસ ATM મશીન દ્વારા જનતાને સેવા ઉપલબ્ધ કરવાના દાવા કરતી બેન્કોની બેદરકારીના કારણે આજે એક યુવક તેનાં સ્વજનને રૂપિયા ટ્રાન્સફર પણ ના કરી શક્યો અને તેના રૂપિયા મશીનમાં ફસાઇ જતા તે બેબાકળો થઇ ગયો અને ATM મશીન તોડવાનો અપરાધ કરી બેઠો.
પોલીસે યુવક વિરૂદ્ધ ગુનો કર્યો દાખલ
વેજલપુરની આ ઘટનામાં યુવકનો ઈરાદો ATMમાંથી રૂપિયા ચોરી કરવા નહીં, પરંતુ તંત્રની બેદરકારી સામે ગુસ્સો ઠાલવવાનો હતો પણ કહેવાય છે ને કે, હકીકત ગમે તેવી હોય પણ નિયમોનો ભંગ થાય એટલે પોલીસને તો ગુનો દાખલ કરવો જ પડે અને એટલે જ આ નવયુવાન આજે પોતાના ગુસ્સાના કારણે જેલના સળિયા ગણતો થઈ ગયો છે.
