ક્રેડિટ કાર્ડ એક્ટિવ કરવાનું કહીને ડૉક્ટરના ખાતામાંથી 75 હજાર ઉપાડી લીધાં

સમગ્ર દેશ સહિત રાજ્યમાં ઑનલાઈન છેતરપિંડીના કિસ્સા વધી રહ્યાં છે, ત્યારે વધુ એક કિસ્સો સામે આવ્યો છે. જેમાં સિવિલ હોસ્પિટલના ડૉક્ટરને એક યુવતીએ ક્રેડિટ કાર્ડ એક્ટિવ કરવાનું કહીને તેમના ખાતામાંથી 75,750 રૂપિયા ઉપાડી લીધાં છે. જે મામલે ડૉકટરે શાહીબાગ પોલીસ સ્ટેશનમાં ફરિયાદ નોંધાવી છે.

અમદાવાદ: આ બનાવની વિગતે વાત કરીએ તો સિવિલ હોસ્પિટલમાં જનરલ સર્જરી વિભાગમાં ફરજ બજાવતાં ડૉક્ટર નિસર્ગ શાહે ફરિયાદ નોંધાવી છે કે, અસારવા બ્રાન્ચની એક્સિસ બેન્કમાં સેલેરી એકાઉન્ટ છે. ગત્ત 11 જુલાઈએ તેમના પર અજાણ્યા નંબર પરથી એક યુવતીનો ફોન આવ્યો હતો. જેણેે પોતાની ઓળખ એક્સિસ બેન્કની કોલ આસિસ્ટન્ટ પૂજા શર્મા તરીકે આપી હતી.

ફોન કરનારી યુવતીએ ડૉક્ટરને જણાવ્યું હતું કે, તેમનું ક્રેડિટ કાર્ડ એક્ટિવ કરવાનું છે. તો કાર્ડની વિગત જણાવું છું. તેમ કહીને કાર્ડની ઉપરનો નંબર, નામ, એક્સપાયરી ડેટ, સીવીવી નંબર જણાવ્યો હતો. જેથી તેમને વિશ્વાસ આવી ગયો હતો કે, ફોન કરનારી યુવતી બેન્કમાંથી જ વાત કરી રહી છે. જે બાદ ફોન કરનારી યુવતીએ જણાવ્યું હતું કે, તમારા કાર્ડની લીમીટ 2.5 લાખ છે જે ઘટાડીને 35 હજાર કરવાની છે તો મોબાઈલ નંબર પર જે પીન આવે તે આપવો.

ક્રેડિટ કાર્ડ એક્ટિવ કરવાનું કહીને ડોક્ટરના ખાતાંમાંથી 75 હજાર ઉપાડી લીધાં

જે બાદ ડૉકટરના મોબાઈલ પર આવેલા પીન યુવતીને આપ્યો હતો અને 35 હજાર જેટલી રકમ તેમના ખાતામાંથી ડેબિટ થઇ હતી. જે બાદ યુવતીએ કહ્યું કે, હજુ એક પીન આવશે તે આપવો પરંતુ ડૉક્ટરને શંકા જતા તેમને પીન આપ્યો ન હતો અને પોતાનું બેન્ક સ્ટેટમેન્ટ તપાસ્યું હતું. ત્યારે જાણવા મળ્યું હતું કે, 35,750 અને 40,400 એમ કુલ 75,750 રૂપિયાનું ટ્રાન્ઝ્ક્શિન તેમના એકાઉન્ટમાંથી થયું છે. આ સમગ્ર મામલે ડૉક્ટરને જાણ થઇ હતી કે, ફોન કરનારી યુવતીએ પીન લઈને તેમના ખાતામાંથી 75,750 ઉપાડી લીધા છે. જેથી તેમને સાયબર ક્રાઈમમાં અરજી કરી હતી અને શુક્રવારે આ મામલે શાહીબાગ પોલીસ સ્ટેશનમાં ફરિયાદ નોંધાવી હતી. પોલીસે ફરિયાદના આધારે કાર્યવાહી શરુ કરી છે.