કોર્ટે PSI શ્વેતા જાડેજાની ચાર્જશીટ બાદની જામીન અરજી ફગાવી

અમદાવાદના પશ્ચિમ મહિલા પોલીસ સ્ટેશનમાં ફરજ બજાવતાં PSI શ્વેતા જાડેજા દુષ્કર્મ આરોપી પાસેથી 35 લાખ રૂપિયા લાંચ માંગવામાં કેસમાં ચાર્જશીટ દાખલ થયાં બાદ ફરીવાર દાખલ કરાયેલી અરજી શુક્રવારે અમદાવાદ સિટી સિવિલ એન્ડ સેશન્સ કોર્ટ દ્વારા ફગાવી દેવામાં આવી છે. હવે જામીન મેળવવા માટે આરોપીએ હાઈકોર્ટમાં અરજી કરવી પડશે.

અમદાવાદઃ શ્વેતા જાડેજાએ હાઇકોર્ટના હુકમ બાદ ચાર્જશીટ દાખલ થયા બાદ ફરીવાર અમદાવાદ સેશન્સ કોર્ટમાં અરજી કરી હતી. જોકે કોર્ટ દ્વારા તેની અરજી ફરીવાર ફગાવી દેવામાં આવી છે. આ ગુનો ખૂબ જ ગંભીર પ્રકારનો હોવાથી અને જો જામીન મુક્ત કરવામાં આવે તો સાક્ષીઓ અને પુરાવવા સાથે ચેડાં કરી શકે છે, તેવી શક્યતાને ધ્યાનમાં રાખીને કોર્ટે આ નિર્દેશ આપ્યો છે.

કોર્ટે PSI શ્વેતા જાડેજાની ચાર્જશીટ બાદની જામીન અરજી ફગાવી

અમદાવાદ SOG દ્વારા PSI શ્વેતા જાડેજા કેસમાં દાખલ કરેલી ચાર્જશીટમાં જણાવ્યું હતું કે આરોપી શ્વેતા જાડેજાએ તેના બનેવી દેવેન્દ્ર ઓડેદરા મારફતે અલગ અલગ આંગડીયા પેઢી પાસેથી લાંચની રકમ સ્વીકારી હતી. એટલું જ નહીં, આરોપી PSI શ્વેતા જાડેજાએ દુષ્કર્મ કેસના આરોપી કેનિલ શાહના ભાઈ પાસે 1.12 લાખ રૂપિયાનો એપલનો ફોન પણ લાંચમાં પોતાના નામે ખરીદ્યો હતો.

અમદાવાદ શહેર પોલીસ કમિશનરે આરોપી પોલીસ અધિકારી સામે કેસ ચલાવવાની પરવાનગી આપી હતી. પીએસઆઇ શ્વેતા જાડેજાના બનેવી દેવેન્દ્ર ઓડેદરા હાલ ફરાર છે જેની શોધખોળ પોલીસ દ્વારા કરવામાં આવી રહી છે.આ સમગ્ર કેસની વિગત એવી છે કે દુષ્કર્મના આરોપી કેનિલ શાહ સામે IPCની કલમ 376 મુજબ ફરિયાદ દાખલ કરવામાં આવી હતી અને બે પોલીસ ફરિયાદ પૈકી એક ફરિયાદની તપાસ PSI શ્વેતા જાડેજા દ્વારા કરવામાં આવતી હતી ત્યારે આરોપીને પાસા હેઠળ નાખવાની ધમકી આપી લાંચ પેટે ટુકડે ટુકડે કુલ ૩૦ લાખ રૂપિયા વસૂલ્યાં હોવાનો તપાસમાં સામે આવ્યું છે. એટલું જ નહીં, આરોપી PSI દુષકર્મ આરોપી કેનિલ શાહને ત્રીજી ફરિયાદ ન નોંધવી હોય 10 લાખ રૂપિયાની માગ કરી હતી.