- ભાજપના પ્રદેશ અધ્યક્ષ સી. આર. પાટીલનું આ બ્રહ્માસ્ત્ર કોંગ્રેસનો સફાયો કરશે ?
- સ્થાનિક સ્વરાજ્યની ચૂંટણીમાં ફતેહ મેળવવા ટકોરાબંધ રણનીતિ
- જીતવી અશક્ય લાગતી બેઠકો પર જોરદાર પરિણામ આપતી રણનીતિ
અમદાવાદઃ સ્થાનિક સ્વરાજ્યની ચૂંટણીનું બ્યૂગલ ચૂંટણીપંચે તારીખો જાહેર કરવા સાથે ફૂંકી આપ્યું છે. સત્તા નાની સંસ્થાની હોય કે વિશાળ જનસંખ્યા પરની હોય, પોતાનો પક્ષ એમાં બાજી મારે એવી કયા રાજકીય પક્ષની મંશા નહી હોય ? 25 વર્ષથી ગુજરાતમાં ફૂલેલોફાલેલો ભારતીય જનતા પક્ષ સત્તાસ્થાને હોવાથી ટોચનું સ્થાન રાજ્યમાં પણ ધરાવે છે અને દેશમાં પણ મોદી સરકારના રુપમાં ધરાવે છે. ચૂંટણી જીતવી હોય તો ચૂંટણીની રણનીતિ કેવી રહી તેના પર રાજકીય પંડિતો દ્વારા ખૂબ ઊંડું વિચારભર્યું આકલન કરવામાં આવતું હોય છે. જેમાં નાના નાના મુદ્દાઓને ઇંગિત કરીને કહેવાતું હોય છે કે આ જે તે રણનીતિ છે જેના કારણે સો એન્ડ સો પક્ષે ભારે સફળતા હાંસલ કરી છે. નવેમ્બરમાં 8 વિધાનસભા પેટાચૂંટણીનું પરિણામ આવ્યું ત્યારે ગુજરાત કોંગ્રેસ સહિત અન્ય નાના પક્ષોના મોવડીઓને 440નો કરન્ટ લાગ્યો હતો. કારણ કે નવનિયુક્ત ભાજપ પ્રદેશ સી. આર. પાટીલની આગેવાનીમાં ભાજપ તમામ બેઠકો જીતી ગયું હતું. પક્ષપલટો કરીને આવેલા કોંગ્રેસી નેતાઓને ફરી જીતાડવામાં પણ તેઓ સફળ રહ્યાં. આ કેવી રીતે બન્યું તેની રણનીતિની શોધખોળ કરવામાં આવી ત્યારે લગભગ બધાં તારણ પણ આવ્યાં કે આ ભાજપની સંગઠનાત્મક કામગીરીનું પરિણામ છે.
ભાજપ માટે કયાં તારા તોડી લાવશે?
આ પીઠિકાનું પુનઃસ્મરણ કર્યાં પછી વાતને પાટે ચડાવીએ અને ભાજપ છેલ્લા એક દોઢ માસથી જે રીતે પેજ પ્રમુખ નામનો શબ્દ ગુંજારવ ફેલાવી રહ્યો છે, તેના પર ધ્યાન આપવાથી મામલો કઇ બાજુ જઈ રહ્યો છે તે સુપેરે સમજી લેવાશે. સી. આર. પાટીલે જ્યારે ફરજિયાત પણે પેજ પ્રમુખ જવાબદારી નિભાવવાની વાત ડીસેમ્બરમાં યોજાયેલી ચિંતન શિબિરમાં કરી હતી, ત્યારથી પેજ પ્રમુખની રણનીતિ પર ભાજપે સક્રિય રસ લઇને કામ શરુ કરી દીધું છે. શું છે આ વિચારશૈલી અને ભાજપ માટે કયાં તારા તોડી લાવશે એ તો તાજેતરમાં જ આવી રહેલી સ્થાનિક સ્વરાજ્યની ચૂંટણીઓના પરિણામો પરથી ખ્યાલ આવી જશે. બાય ધ વે. આ પેજ પ્રમુખ રણનીતિ ઘડવાનું ખરું કારણ તમે સ્થાનિક સ્વરાજ સંસ્થાઓની ચૂંટણીઓ માનતાં હો તો જરા ફરી વિચાર કરવો ખપે. કારણ કે સી. આર. પાટીલે પ્રદેશ અધ્યક્ષ પદ સ્વીકારતાં જ એક સિંહગર્જના કરી હતી કે, આગામી વિધાનસભા ચૂંટણીઓમાં ભાજપ ગુજરાત વિધાનસભાની તમામે તમામ 182 બેઠકો જીતી લેશે.
182 બેઠક જીતવાની સી.આર. પાટીલની એક ખાસ રણનીતિ
તો, આખરે સી આર પાટીલનો આ કયો આત્મવિશ્વાસ બોલી રહ્યો હતો? સી. આર. પાટીલને સારી રીતે જાણનારાંઓને એ ખબર છે કે, સી. આર. પાટીલ પોતે જંગી બહુમતીથી નવસારી બેઠક પરથી સાંસદ બન્યાં છે અને એ પહેલાં ધારાસભ્ય તરીકે પણ તેઓ પ્રથમ ક્રમની બહુમતી મેળવી ચૂ્કેલાં રાજકારણી છે. તો સ્વાભાવિક જ તેમનું બયાન સાવ કોરાણે મૂકી દેવા જેવું નથી. તેમની 182 બેઠક જીતવાની એક ખાસ રણનીતિ હવે ધીમેધીમે ઉપસી રહી છે અને તે જ છે પેજ પ્રમુખ રણનીતિ
કોંગ્રેસ સહિતના વિપક્ષો માટે અણુબોમ્બ બનશે આ રણનીતિ
પેજ પ્રમુખ રણનીતિ અંગે સ્વયં સી. આર. પાટીલે કયા શબ્દમાં પોતાનો આત્મવિશ્વાસ રણકાવ્યો છે તે જોઇએ. તેમણે વલસાડના એક કાર્યક્રમમાં કહ્યું હતું કે, તાલુકા અને જિલ્લા પંચાયતની તમામ બેઠકો ઉપર ભાજપનો ભગવો લહેરાશે. ચૂંટણીમાં ભાજપ દ્વારા કરવામાં આવેલું પેજ કમિટીનું આયોજન એ અણુબોમ્બ સમાન છે. જે કોંગ્રેસનો સફાયો કરશે. ભાજપ પાસે બે બ્રહ્માસ્ત્ર છે. જેમાં એક વડાપ્રધાન નરેન્દ્ર મોદીનું નામ અને બીજું પેજ કમિટીનું પ્લાનિંગ છે, જેનો કોઈ તોડ કોંગ્રેસ પાસે નથી. દરેક ઘર અને દરેક પેજ કમિટી અને પ્રમુખની કામગીરીનું માઈક્રો પ્લાનિંગ એ ભાજપનો અણુબોમ્બ છે. જે ચૂંટણી સમયે કોંગ્રેસ પર ભારે પડી જશે અને કોંગ્રેસનો સફાયો નિશ્ચિત છે.
15 લાખ પેજ કમિટી થકી સવા બે કરોડ મતદારો સુધી પહોંચવાની આ નવી સ્ટ્રેટેજી
ગુજરાતમાં 15 લાખ પેજ કમિટી થકી સવા બે કરોડ મતદારો સુધી પહોંચવાની આ નવી સ્ટ્રેટેજી ભાજપ પ્રમુખ સી.આર.પાટીલે બનાવી છે. ગુજરાત ભાજપના અધ્યક્ષ બન્યા બાદ પાટીલે એક પછી એક યોજનાઓ થકી ગુજરાત વિધાનસભાની 182 બેઠકો જીતવા માટેના લક્ષ્ય સાથે આ ચૂંટણી રણનીતિ ઘડી છે. પાટીલે આવતાં વેંત જ કાર્યકર્તાઓને એક્ટિવ કરવા પેજ પ્રમુખ અભિયાનને ગતિ આપીને નિશ્ચિત સમય મર્યાદામાં પૂર્ણ કરવા કાર્યકર્તાઓને ચેતવણી પણ આપી દીધેલી છે. તેમના માર્ગદર્શન હેઠળ ઝપાટાબંધ દરેક જિલ્લાના ભાજપ કાર્યાલયમાં પણ ધમધમાટ છે, જેમાં મતદારોના વિવિધ વર્ગોના અગ્રણીઓથી લઇ નાનામાં નાની સોસાયટીના મહત્ત્વના વ્યક્તિને ભાજપના સંભવિત મતદાર તરીકે વાળવાની પૂરજોર કોશિશ શરુ થઈ છે. પેજ કમિટી રણનીતિ દ્વારા ભાજપ રાજ્યના સવા બે કરોડ મતદારો સુધી સીધો સંપર્ક સ્થાપિત કરી શકશે. આ એક એવું માઈક્રો પ્લાનિંગ છે જેમાં ભાજપ પેજ પ્રમુખ એવું આઈકાર્ડ પણ આપવામાં આવશે. જિલ્લાવાર પેજ કમિટીઓ બની રહી છે અને તેનો ડેટા પણ બનાવાઈ રહ્યો છે. એક અંદાજ પ્રમાણે ભાજપે 50,000 પેજ પ્રમુખ આઈકાર્ડ બનાવી પણ લીધાં છે.
કઇ રીતે નક્કી થાય છે પેજપ્રમુખ પદભાર
પેજ પ્રમુખનું કાર્યક્ષેત્ર જાણીએ તો જોઇ શકાય કે પેજ પ્રમુખનો મુખ્ય ડેટા સોર્સ ખુદ ચૂંટણીપંચ દ્વારા પ્રાપ્ત થતી સત્તાવાર માહિતીઓ છે. ચૂંટણીપંચ મતદારોની યાદી બહાર પાડે છે તે જાણો છો ને! બસ, અહીંથી પાટીલની રણનીતિની શરુઆત થાય છે. આ મતદાર યાદીના દરેક પેજ અને તેના પર છપાયેલાં નામ -એટલે કે જે તે નાગરિક ભાજપને જ મત આપે તેવી જેની જવાબદારી છે તે છે પેજ પ્રમુખ. પોતાના ફાળે આવેલા મતદાર યાદીના પેજના નામના વીસપચીસ મતદારોને મળવું, ભાજપ તરફી વલણ ઊંભું કરવું, તે મતદાન કરે તે સુનિશ્ચિત કરવું વગેરે વગેરે જવાબદારી પેજ પ્રમુખે નિભાવવાની છે. ભાજપ સાથે જોડાઈને કોઇપણ એવો નાગરિક જે પોતાના વિસ્તારમાં લોકો પર પકડ ધરાવતો હોય, નામના ધરાવતો હોય તો તેવી વ્યક્તિ પેજ પ્રમુખ બની શકે છે. તો દરેક સંભવિત મતદારને ભાજપનો મતદાર બનાવવાની રણનીતિ એ જ છે પાટીલની પેજ પ્રમુખ રણનીતિ!
વડાપ્રધાન મોદી અને કેન્દ્રિય ગૃહપ્રધાન અમિત શાહ પણ કરે છે અભિવાદન
જો તમને કદાચ સ્મરણ થાય કે કોઇ મોટી જીત મેળવી હોય તે બાદ વડાપ્રધાન નરેન્દ્ર મોદી હોય કે કેન્દ્રિય ગૃહપ્રધાન અમિત શાહ, તેમના પક્ષને સંબોધિત થયેલાં ભાષણોમાં ખૂબ જ ભારપૂર્વક પક્ષના વિજય માટે પક્ષના કાર્યકરોને અને પેજ પ્રમુખોને અભિનંદન આપે છે. અશક્ય લાગતી જીતને પરિણામમાં ફેરવી જાણતી ભાજપની સંગઠનાત્મક રણનીતિનું આ બીજું નામ છે. જેના આધારે ભાજપે ગુજરાત જ નહીં ભારત પણ સર કરી લીધું છે.
પેજ પ્રમુખના આઈકાર્ડની સ્ટ્રેટેજીમાં HM, CM, DyCM સહિત તમામ પ્રધાનો અને પક્ષ હોદ્દેદારો
હવે ગુજરાતમાં સ્થાનિક સ્વરાજ્યની ચૂંટણીઓ અને પછી આવતા વર્ષે 2022માં ગુજરાત વિધાનસભાની સામાન્ય ચૂંટણીઓ આવનાર છે. ત્યારે સ્થાનિક સ્વરાજ સંસ્થાઓમાં જે પક્ષનું પલડું નમશે તેનું જોર વિધાનસભા ચૂંટણીઓમાં પણ ભારે રહે તેવું ગણિત માંડી શકાય છે. જેને લઇને કહી શકાય કે ભાજપે ખરેખર તો 2022માં ગુજરાતમાં પુનઃ સત્તાપ્રાપ્તિનું લક્ષ્ય મેળવવા પેજ પ્રમુખ નામનું ચૂંટણી રણનીતિનું તીર સજાવી લીધું છે. આ વિભાવના ભાજપે બહુ આયોજનપૂર્વક તરતી મૂકી છે અને તેમાં ખુદ કેન્દ્રીય ગૃહપ્રધાન અમિત શાહ અને રાજ્યના મુખ્યપ્રધાન વિજય રુપાણી તેમ જ તમામ પ્રધાનો અને પક્ષના મહત્ત્વના હોદ્દેદારો પણ પેજ પ્રમુખ તરીકેની જવાબદારી સંભાળવાના છે. તમે માધ્યમોના અહેવાલોમાં જાણ્યું પણ હશે કે મુખ્યપ્રધાન વિજય રુપાણી અને તેમનાં પત્ની અંજલિ રુપાણીને પેજ પ્રમુખના આઈકાર્ડ પણ આપવામાં આવ્યાં છે. મુખ્યપ્રધાન રુપાણીએ આઈકાર્ડ મેળવતી વખતે કહ્યું હતું કે, ભારતીય જનતા પાર્ટીની આ કાર્ય પદ્ધતિ રહી છે કે પાર્ટી જે નક્કી કરે તે યોજના બધા કાર્યકર્તાઓને લાગુ પડે છે. પછી ભલે તે મુખ્યપ્રધાન હોય કે, બૂથનો કાર્યકર્તા હોય. પ્રદેશ અધ્યક્ષ સી. આર. પાટીલે તેમના સહિત સમગ્ર પ્રદેશમાં 50 હજાર બૂથના કાર્યકર્તાઓની યાદી અને પેજના એક-એક પ્રમુખ સંગઠનની દરેક વ્યવસ્થાનો અભિગમ સાથે પ્રારંભ કર્યો છે. તો મારા વિસ્તારમાં હું પણ પહેલા કાર્યકર્તા છું, ત્યારબાદ મુખ્યપ્રધાન છું. મારા વિસ્તારમાં એક પેજની જવાબદારી મારી છે અને પેજ પ્રમુખ તરીકે મેં પણ મારી સમિતિ સબમિટ કરી છે. દરેક પેજ પ્રમુખને ઓળખકાર્ડ આપવામાં આવ્યાં છે. આજે મને પણ આવી જ રીતે પાર્ટી તરફથી ઓળખકાર્ડ આપવામાં આવ્યું છે. મારી પત્નીને પણ પેજ પ્રમુખનું ઓળખકાર્ડ આપવામાં આવ્યું છે. તો, આ રીતે આ સંગઠન શાસ્ત્રની નવી પદ્ધતિ થકી સી આર પાટીલે કોંગ્રેસ સહિતના વિપક્ષો પર બ્રહ્માસ્ત્ર છોડવાની પૂર્વતૈયારીઓ કરી લીધી છે.
મતદાર યાદીમાં એક પેજમાં 30 મતદારો હોય છે
વડોદરામાં સતત બે ટર્મ કોર્પોરેટર રહેલા અને ત્યારબાદ વડોદરા બેઠકના સાંસદ રંજનબેન ભટ્ટે ETV Bharatને જણાવ્યું કે, મતદાર યાદીમાં એક પેજમાં 30 મતદારો હોય છે. જેમાંથી દરેક પેજમાંથી ઓછામાં ઓછા 5 મતદારોના ફોટો સાથે પેજ સમિતિનું નિર્માણ કરવામાં આવે છે. જેમાં ઘણા કિસ્સામાં 5 થી વધારે સભ્યો સાથેની પેજ સમિતિ બનાવવામાં આવતી હોય છે. ભાજપા સંગઠન અને કાર્યકરોએ મતદાર યાદીના પેજ પ્રમાણે પેજ સમિતિ દ્વારા સંગઠન મજબૂત કરવા માટે અને સીધા મતદારો સુધી પહોંચવામાં સરળતા ઉભી કરવાના તાત્પર્યથી પેજ સમિતિનું નિર્માણ કરવામાં આવી રહ્યું છે. રંજન બેને વધુમાં જણાવ્યું હતું કે, દેશમાં સૌથી પહેલા 25156 મહિલાઓને પેજ સમીતીમાં આવરી લઈને પ્રદેશમાં મોકલી આપવામાં આવી હતી.
પેજ સમિતિના સભ્ય બનવા લોકોએ આતુરતા બતાવી
ભરુચ નગરપાલિકાના કોર્પોરેટર રહી ચુકેલા અને વર્તમાન ધારાસભ્ય દુષ્યંત પટેલે ETV Bharatને જણાવ્યું કે, ભાજપમાં પેજ પ્રમુખ અને પેજ સમિતિના સભ્ય બનવા લોકોએ આતુરતા બતાવી છે.
પેજ પ્રમુખ અને સભ્યો બનાવવાની આ રીત સાવ નવી નથી
જાણીતાં રાજકીય વિશ્લેષક દિલીપ ગોહિલે ETV Bharat સાથેની વાતચીતમાં જણાવ્યું હતું કે, પેજ પ્રમુખ અને સભ્યો બનાવવાની આ રીત સાવ નવી નથી. ભાજપ પહેલા બૂથ મેનેજમેન્ટ બૂથ કમિટી બનાવીને કરતું હતું, તેમાં આ વખતે નવો ઉમેરો કરીને પેજ પ્રમુખ અને પેજ સભ્યો બનાવવાની સ્ટ્રેટેજી અપનાવી છે. તેનો હેતુ સંગઠનને વધુ મજબૂત બનાવવાનો છે અને પ્રચારાત્મક પદ્ધતિએ છે. પેજ પ્રમુખ અને પેજ સભ્યો પોતાની વાત પોતાની સોસાયટીમાં કમ્યૂનિકેટ કરી શકે છે. 30 વ્યક્તિએ પેજ પ્રમુખ અને ચાર સભ્યો હોય તો ભાજપને 20 મત મળે, તેવા ઉદ્દેશ સાથે પેજ સભ્યો બનાવાયા છે. જેમાં 66 ટકા સુધી મતદાનનો શેર મળે. પણ જે વોર્ડમાં વિપક્ષો હોય ત્યા પેજ પ્રમુખ કે પેજ સભ્યો ન હોય તો તે વિસ્તારોમાં ભાજપ કશુ કરી શકતો નથી. ભાજપ હમેશા માટે ચૂંટણીમાં રણનીતિ બદલતો આવ્યો છે. પેજ પ્રમુખ અને પેજ સભ્યો મતદાન વધુ કરાવે અને પોતાના પક્ષને મત અપાવી શકે તે માટે જ છે. પણ પેજ પ્રમુખ અને પેજ સભ્યોને ભાજપે આઈ કાર્ડ આપ્યાં છે, તેનો દુરુપયોગ ન થાય તે પણ ભાજપ પક્ષે જોવું પડશે.
ભાજપે 6 મહાનગરપાલિકાની ચૂંટણી જીતવા માટે માઈક્રો મેનેજમેન્ટ કર્યું
અન્ય રાજકીય વિશ્લેષક પાલા વરુએ ETV Bharat ને જણાવ્યું હતું કે, ભાજપે 6 મહાનગરપાલિકાની ચૂંટણી જીતવા માટે માઈક્રો મેનેજમેન્ટ કર્યું છે, અને તેમાં તે સફળ થશે. પહેલા 50 સભ્યોનું બૂથ મેનેજમેન્ટ થતું હતું, હવે તે સંખ્યા ઘટાડીને 30ની કરી છે. માઈક્રો મેનેજમનેન્ટથી અર્બન મતદારને મતદાન બૂથ સુધી ખેંચી લાવવામાં તે કામયાબ નીવડશે કે કેમ તે તો સમય કહેશે. પણ ભાજપની રણનીતિ આવી હશે કે અર્બન મતદારો વધુને વધુ મતદાન કરે. ભાજપ સારી રીતે જાણે છે કે અર્બન મતદાર ભાજપના જ છે. પણ તેઓ મતદાન કરવા આવતાં નથી. પણ પેજ પ્રમુખ અને પેજ સભ્યોને કારણે આ વખતની ચૂંટણીમાં રંગ જામશે. જોઈએ મતદાનની ટકાવારી વધે તો ભાજપને ફાયદો થશે તે થીયરી કેટલી સાચી છે.
