- નર્સ ઝેબા ચોખાવાલાએ આખાય રમઝાન માસમાં તમામ રોઝા કર્યાં
- રોઝાની સાથે જ કોરોનામાં ફરજ પણ બજાવી
- ઝેબા ચોખાવાલાના શબ્દો લાખો કોરોના વોરિયર્સ માટે પ્રોત્સાહનરૂપ
અમદાવાદ: આજે શુક્રવારે પવિત્ર રમઝાન માસ પૂર્ણ થઈ રહ્યો છે અને આખો દેશ રમઝાન ઇદની ઉજવણી કરી રહ્યો હશે. આખુ વિશ્વ કોરોનાની મહામારીનો એક સંપ થઈને સામનો કરી રહ્યું છે. સૌ માણસ આજે પરસ્પર વેર-ઝેર કે ઉંચ-નીચમાં પડ્યા વગર માનવતાની સેવામાં રત થયો છે, ત્યારે અમદાવાદ સિવિલ હોસ્પિટલના સ્ટાફ નર્સ ઝેબા ચોખાવાલાને આખા પવિત્ર રમઝાન માસ દરમિયાન દરરોજ ચાલુ રોઝાએ 7 કલાક સુધી P.P.E. કીટ પહેરીને દર્દીઓની સેવા કરીને સાબિત કર્યું છે કે, જ્યારે મદદ કરનારાનો ઇરાદો મહાન હોય ત્યારે ઇશ્વર પણ તેની મદદે આવે જ છે.
અલ્લાહે પણ ફરજ દરમિયાન શક્તિ આપી
અમદાવાદ સિવિલ હોસ્પિટલના સ્ટાફ નર્સ ઝેબા ચોખાવાલાએ આખાય રમઝાન માસમાં તમામ રોઝા કર્યાં. રોઝાની સાથે જ કોરોનામાં ફરજ પણ બજાવી. ઝેબાનું કહેવું છે કે, “રોઝા રાખ્યા હોય ત્યારે શારીરિક નબળાઇ ઘણી આવે છે પરંતુ તેના કારણે હું સ્ટાફ નર્સ તરીકેની મારી ફરજથી પાછીપાની ન કરી શકું. મેં રોઝા રાખીને અલ્લાહની બંદગી કરી છે તો અલ્લાહે પણ મને ફરજ દરમિયાન શક્તિ જરૂરથી આપી છે.”
આ પણ વાંચો: અમદાવાદમાં સિવિલ હોસ્પિટલમાં 1,574 નર્સિંગ સ્ટાફ સતત દર્દીઓની સેવામાં તહેનાત
પરિવારથી વિખૂટા રહેવાનું પસંદ કર્યું અને પોતાના મૂલ્યોને પ્રાથમિકતા આપી
અમદાવાદ સિવિલમાં ઓપરેશન થિયેટરમાં સ્ટાફ નર્સ તરીકે ફરજ બજાવતા ઝેબા ચોખાવાલાના શબ્દો લાખો કોરોના વોરિયર્સ માટે પ્રોત્સાહનરૂપ બની રહ્યાં છે. 30 વર્ષીય ઝેબાને સાડા ત્રણ વર્ષની દિકરી છે અને ઝેબાની માતા કેન્સરગ્રસ્ત છે. તેમના પતિ સાબરકાંઠા જિલ્લાના પ્રાંતિજ શહેરમાં વ્યવસાય કરે છે. આવામાં તેમનું પરિવાર પાસે રહેવું જરૂરી બની રહે છે, પરંતુ ઝેબાએ કોરોનાની બીજી લહેરમાં પરિવારથી વિખૂટા રહેવાનું પસંદ કર્યું અને પોતાના મૂલ્યોને પ્રાથમિકતા આપી. કોઇ પણ પડકારોને ગણકાર્યા વિના જુસ્સાભેર પોતાની ફરજનું પાલન કર્યું.
ગરમીમાં 8 કલાક PPE કીટ પહેરીને ડ્યુટી કરવી અત્યંત પડકારજન
ઝેબા ચોખાવાલા રોઝા સાથે PPE કીટ પહેરીને કામ કરવાનો અનુભવ જણાવ્યો હતો. “સામાન્ય દિવસોમાં પણ ગરમીમાં 8 કલાક PPE કીટ પહેરીને ડ્યુટી કરવી અત્યંત પડકારજનક છે. ત્યારે રમઝાન માસમાં તો જેણે રોઝા કર્યા હોય એ માણસ 17 કલાક પાણી અને ભોજન વગર રહે છે. જેથી શરીરમાં ડિહાઇડ્રેશનનુ પ્રમાણ ઘણું વધી જતું હોય છે. એવામાં PPE કીટ પહેરીની ડ્યુટી કરવી અત્યંત જોખમી અને મુશ્કેલ બની રહે છે. પરંતુ આવી પરિસ્થિતિમાં મેં પાછીપાની કરી નથી. મારા માટે દર્દીનો જીવ પહેલા. મેં પોતે જ આ નોકરી પસંદ કરી છે અને દર્દીઓના જીવ બચાવવામાં હું નિમિત્ત બની શકું છું ત્યારે સ્વને ભૂલીને પોતાની પીડાને ભૂલીને અમે બધા કોરોનાના સેવાયજ્ઞમાં જોડાઇ ગયા છીએ.”
આ પણ વાંચો: વિશ્વ નર્સ દિવસ નિમિતે પોરબંદરમાં નૌસેનાની ટીમે નર્સ સ્ટાફનું કર્યું સન્માન
રમઝાનના મહિનામાં પણ સતત સેવારત રહીને ઝેબાએ અનેક જીવ બચાવ્યા
“સિવિલ હોસ્પિટલમાં માર્ગ અકસ્માત કે અન્ય કોઇપણ પ્રકારની ઇમરજન્સીમાં આવતા દર્દીઓ કે જેમની સર્જરી કરવી અતિ આવશ્યક હોય, જીવન અને મરણ વચ્ચે ઝઝૂમતા દર્દીઓના જીવ બચાવવા એ જ તમામ હોસ્પિટલ સ્ટાફની પ્રાથમિકતા હોય ત્યારે કોરોના સંક્રમણના ભય, શંકા તમામને નેવે મૂકીને માત્રને માત્ર દર્દીની સારવારમાં લાગી જવું પડે.” આ જ જુસ્સા સાથે ઝેબાબહેન રમઝાનના મહિનામાં પણ સતત સેવારત રહીને ઝેબા અનેક દર્દીઓના જીવ બચાવવામાં નિમિત બન્યા છે.
તમામ ધર્મોમાં સેવા અને એકબીજાની મદદ કરવાની ભાવનાને એક સ્થાન મળેલું છે
વિશ્વના તમામ ધર્મોમાં સેવા અને એકબીજાની મદદ કરવાની ભાવનાને એક સ્થાન મળેલું છે. આપણે પોતાની શક્તિ પ્રમાણે બીજાની મદદ કરીએ, આપણી ઇચ્છાશક્તિના અભાવે કોઇ પીડાય નહીં અને લોકોની જીવનજરૂરી જરૂરિયાત સંતોષવી એ ઇશ્વરીય કાર્ય ગણાય છે, ત્યારે ઝેબા જેવા કર્મઠ લોકોના કિસ્સા અનેકને આવી સુંદર માનવસેવા કરવા પ્રેરણા આપતા રહેશે.
