- ભારતીય ટીમનો ફેન અરૂન રહે છે અમદાવાદમાં
- અરૂનના શરીર પર એક તરફ ભારત અને એક તરફ ઇંગ્લેન્ડના રાષ્ટ્રધ્વજનું ચિત્ર
- ભારતીય ક્રિકેટ ટીમમાં વિરાટ કોહલી તેનો મનપસંદ ખેલાડી
અમદાવાદઃ ભારત અને ઈંગ્લેન્ડ વચ્ચે રમાઈ રહેલી ટેસ્ટ મેચ જોવા અરૂન વિશ્વના સૌથી મોટા ક્રિકેટ સ્ટેડિયમ નરેન્દ્ર મોદી સ્ટેડિયમમાં આવ્યો હતો. પીઠના ભાગથી લઇને માથાના વાળ સુધી તેને પોતાના શરીરને ભારત અને ઇંગ્લેન્ડના રાષ્ટ્રધ્વજ વડે ચિત્રત કર્યું હતું. આમ, અરુને બંને દેશ વચ્ચે ફ્રેન્ડશીપનો સંદેશો આપ્યો હતો. અરુને કહ્યું હતું કે, તે અગાઉ પણ જ્યારે અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ અહીં આવ્યાં હતા, ત્યારે આ સ્ટેડિયમમાં આવી ચૂક્યો છે, ત્યારે આ સ્ટેડિયમ ખીચોખીચ ભરેલું હતું. તેણે ત્યારે પણ ભારત અને અમેરિકન રાષ્ટ્રધ્વજ વડે પોતાનું શરીર ચિત્રિત કર્યું હતું.
મેચ વિશે શું કહ્યું અરુને ?
અરુને મેચ વિશે કહ્યું હતું કે, તે આવી રીતે તૈયાર થઈને ભારતીય ટીમનો ઉત્સાહ વધારવા આવે છે. રિષભ પંતે આજે ઇંગ્લેન્ડ સામે સદી ફટકારી છે, તેનાથી તે ખુશ છે. અરુને વિશ્વાસ વ્યક્ત કર્યો હતો કે, આ મેચ પણ ભારત જ જીતશે તેમજ આગામી પાંચ 20-20 મેચ પણ ભારત જ જીતશે. આ મેચનું રિઝલ્ટ ચાર દિવસમાં આવી જશે.
સી-પ્લેનના ઉદ્વઘાટનમાં પણ અરૂન પોતાના અલગ અંદાજમાં જોવા મળ્યો હતો
કોરોના કાળ દરમિયાન અરુને આવી જ રીતે ભારતના ત્રિરંગાને પોતાના શરીર પર ચિત્રિત કરીને લોકોને સતર્ક, સાવધાન અને ઘરમાં રહેવા સંદેશો આપ્યો હતો. આ ઉપરાંત અમદાવાદમાં સી-પ્લેનના ઉદ્વઘાટનમાં પણ અરૂન પોતાના અલગ અંદાજમાં જોવા મળ્યો હતો. 26 જાન્યુઆરીના રોજ તે દિલ્હીમાં પરેડ જોવા પણ પોતાના જ અંદાજમાં પહોંચ્યો હતો અને લોકોનું આકર્ષણનું કેન્દ્ર બન્યો હતો.
હવે નવું શું કરશે અરૂન ?
અરુન સાથે સામાન્ય લોકો સહિત પોલીસ પણ સેલ્ફી લેતા જોવા મળ્યા હતા. હવે આગામી સમયમાં અરૂન સુધીર કુમાર ચૌધરીને મળીને ભારત અને ઇંગ્લેન્ડના અલગ-અલગ ધ્વજ પોતાના શરીર પર ચિત્રિત કરીને એક સાથે પ્રેક્ષક ગેલેરીમાં બેસી બંને ટીમને સપોર્ટ કરશે.
