કોરોના મહામારી દરમિયાન ઉત્તમ કાર્ય કરવા બદલ પાંચકૂવા મહાજન મંડળ દ્વારા કાલુપુર પોલિસનું સન્માન કરાયું

કોરોના વાઇરસની મહામારી અને તેમાં અપાયેલા લોકડાઉનમાં પોલીસનો એક અલગ જ ચહેરો નાગરિકોને જોવા મળ્યો હતો. એ વાતમાં કોઈ શક નથી કે,પોલીસ દ્વારા ઉત્તમ સેવાકાર્ય આ મહામારી દરમિયાન કરવામાં આવ્યું છે. ત્યારે અમદાવાદના કાલુપુર પોલીસ સ્ટેશનના પોલીસકર્મીઓની સારી કામગીરીને લઇને પાંચકૂવા મહાજન મંડળ દ્વારા પોલીસકર્મીઓનું સન્માન કરવામાં આવ્યું હતું.

અમદાવાદ: આજે પાંચકૂવા મહાજન મંડળ દ્વારા કાલુપુર પોલીસ સ્ટેશનના પોલીસ ઇન્સ્પેક્ટર આર.જી.દેસાઈ, 4 પી.એસ.આઈ.તેમજ 19 પોલીસ કર્મીઓનું કોરોનાની મહામારી દરમિયાન કાલુપુર વિસ્તારમાં કરવામાં આવેલી કામગીરી બદલ એવોર્ડ અને શીલ્ડ આપીને સન્માન કરવામાં આવ્યું હતું. આ પ્રસંગે પાંચકૂવા મહાજનના મંડળના કમિટીના સભ્યો, ગુજરાત ચેમ્બર ઓફ કોમર્સમાંથી આશિષ ઝવેરી અને પાંચ કૂવા મહાજન મંડળના પ્રમુખ કિરીટભાઈ ઉપસ્થિત રહ્યાં હતાં.

આ સમારોહમાં સોશિયલ ડિસ્ટન્સ જળવાય તેનું ખાસ ધ્યાન રાખવામાં આવ્યું હતું. આ સમગ્ર કાર્યક્રમ કાપડ મહાજન મંડળ હોલમાં, પાંચકૂવા દરવાજા ખાતે યોજવામાં આવ્યો હતો.