અમદાવાદઃ રાજ્યમાં અનલોક-1ના કારણે આર્થિક પ્રવૃત્તિઓ તબક્કાવાર શરૂ કરવામાં આવી છે, ત્યારે ગુજરાત સરકારના ગૃહવિભાગ દ્વારા કોરોના વાઇરસના સંક્રમણને લઈને કામકાજના સ્થળો પર અને જાહેર સ્થળોએ માસ્ક પહેરવું ફરજિયાત કરવામાં આવ્યું છે. જેનો ભંગ કરનારાને 200 રૂપિયાનો દંડ આપવાની જોગવાઈ છે, પરંતુ શહેરમાં ઘણા લોકો તેનો અમલ કરતા નથી. જેથી અમદાવાદ મ્યુનિસિપલ કોર્પોરેશન દ્વારા 'સેફ એન્ડ સિક્યોર અમદાવાદ(SASA)' પ્રોજેક્ટના માધ્યમથી CCTV કેમેરા દ્વારા માસ્ક અને ફેસ કવર નહીં પહેરનારા નાગરિકો સામે દંડનીય કાર્યવાહી કરવામાં આવી રહી છે.
ટ્રાફિક સિગ્નલો અને જાહેર સ્થળો પરના કેમેરા દ્વારા માસ્ક પહેર્યા વગરના નાગરિકોને ઓળખીને 200 રૂપિયાનો ઇ-મેમો ઇશ્યૂ કરવામાં આવે છે. જેમાં વાહનના નંબર પ્લેટ પરથી તેની ઓળખાણ કરીને તેના ઘરે ઇ-મેમો મોકલી આપવામાં આવે છે. જેનો દંડ નજીકની AMCની કચેરીમાં ભરવાનો હોય છે.
જો નાગરિક ઈ-મેમો ન ભરે તો કોર્પોરેશનના એસ્ટેટ વિભાગ દ્વારા તેના ઘરે જઈને દંડની રકમ વસૂલ કરવામાં આવે છે. અત્યાર સુધીમાં કુલ 280 જેટલા ઇ-મેમો ઇસ્યૂ કરી દેવામાં આવ્યા છે. જેમાં સૌથી વધુ અમદાવાદના સેન્ટ્રલ ઝોનમાં એટલે કે જૂના શહેરી વિસ્તારમાં ઇસ્યુ કરવામાં આવ્યા છે.
