હાઇકોર્ટના નિર્દેશથી દિનુ બોઘાએ પરિવારના કોરોના પોઝિટિવ સભ્યો સાથે વીડિયો કોન્ફરેન્સથી વાતચીત કરી

વર્ષ 2010 અમિત જેઠવા હત્યાકાંડ કેસના મુખ્ય આરોપી અને ભાજપના પૂર્વ સાંસદ દીનું બોઘાના પરિવારમાં 14 લોકોનો કોરોના રિપોર્ટ પોઝિટિવ આવ્યા હતા. જેના કારણે તેમણે 30 દિવસના વચગાળાના જામીન મેળવવા માટે અરજી દાખલ કરી હતી. તે મુદ્દે ગુજરાત હાઈકોર્ટે વીડિયો કોન્ફરેન્સ થકી હોમ-ક્વોરન્ટાઈન થયેલા તેમના પરિવારજનોથી વાતચીત કરી હતી.

અમદાવાદઃ હાઇકોર્ટમાં દાખલ કરવામાં આવેલી અરજીમાં રજૂઆત કરવામાં આવી હતી કે, દિનુ બોઘાના પરિવારમાંથી 14 લોકોના કોરોના રિપોર્ટ પોઝિટિવ આવ્યા છે. ત્યારે ઘરના સૌથી વધુ સભ્ય હોવાથી તેમની જરૂર છે અને માટે તેમને ત્રીસ દિવસના વચગાળાના જામીન આપવામાં આવે.

સરકારી વકીલે અરજદારની પિટિશનમાં કરવામાં આવેલા આક્ષેપનો વિરોધ કર્યો હતો. હાઈકોર્ટે સરકારી વકીલને સમગ્ર સ્થિતિનો તાગ મેળવી રિપોર્ટ રજૂ કરવાનો આદેશ કર્યો હતો. અગાઉ પણ દિનુ બોઘાને ઘણીવાર વચગાળાના જામીન ગુજરાત હાઇકોર્ટ દ્વારા આપવામાં આવ્યા છે. વર્ષ 2019માં અમદાવાદ સિટી સિવિલ અને સેશન્સ કોર્ટ RTI એક્ટિવિસ્ટ અમિત જેઠવાની હત્યા કેસમાં પૂર્વ સાંસદ દીનુ બોઘા અને અન્ય બે આરોપીઓને આજીવન કેદની સજા ફટકારી હતી. નીચલી કોર્ટના આદેશને દિનુ બોઘા દ્વારા હાઈકોર્ટમાં પડકારવામાં આવ્યો છે.આ સમગ્ર કેસની વિગત એવી છે કે, ગીર સોમનાથના RTI એક્ટિવિસ્ટ અમિત જેઠવાની વર્ષ 2010માં ગુજરાત હાઈકોર્ટના ગેટ સામે ગોળી મારીને હત્યા કરી દેવામાં આવી હતી. ત્યારબાદ પૂર્વ સાંસદનું નામ સામે આવતા તેમની ધરપકડ કરવામાં આવી હતી.