અમદાવાદ સાયન્સ સિટીમાં ગ્લોબલ રોબોટિક ગેલેરી અને દેશનું સૌથી મોટું એક્વેરિયમ આકાર પામશે : વિજય રૂપાણી

મુખ્યપ્રધાન વિજય રૂપાણી અમદાવાદમાં સાયન્સ સિટીના વિવિધ પ્રકલ્પોની કામગીરીની સમીક્ષા અને નિરીક્ષણ મુલાકાતે આવ્યા હતા. સાયન્સ સિટીમાં ટૂંક સમયમાં જ ગ્લોબલ રોબોટિક ગેલેરી અને દેશનું સૌથી મોટું એક્વેરિયમ આકાર પામવા જઈ રહ્યું છે. આગામી દિવસોમાં તે આગવું આકર્ષણ બનશે એવો વિશ્વાસ વિજય રૂપાણીએ વ્યક્ત કર્યો હતો.

• મુખ્યપ્રધાન વિજય રૂપાણીએ અમદાવાદ સાયન્સ સિટીની મુલાકાત લીધી
• વિવિધ પ્રકલ્પોની પ્રગતિ-કામગીરીનું નિરીક્ષણ કરી માહિતી મેળવી
• અમદાવાદ અને જૂનાગઢ હિસ્ટોરીકલ પ્લેસ તરીકે વિકસિત થાય તેવી કામગીરી થશે

અમદાવાદઃ મુખ્યપ્રધાન વિજય રૂપાણી અમદાવાદમાં સાયન્સ સિટીના વિવિધ પ્રકલ્પોની કામગીરીની સમીક્ષા અને નિરીક્ષણ કર્યું હતું. સાયન્સ સિટીમાં ટૂંક સમયમાં જ ગ્લોબલ રોબોટિક ગેલેરી અને દેશનું સૌથી મોટું એક્વેરિયમ આકાર પામવા જઈ રહ્યું છે. તે આવનારા દિવસોમાં આગવું આકર્ષણ બનશે એવો વિશ્વાસ રાજ્યના મુખ્યપ્રધાન વિજય રૂપાણીએ વ્યક્ત કર્યો હતો.

• રાજ્ય સરકાર વિકસાવી રહી છે નોલેજ કોરિડોર

ગુજરાત રાજ્ય એજ્યુકેશન હબ બને તે માટે સરકાર નોલેજ કોરિડોર પણ વિકસાવી રહી છે. સાયન્સ સિટીના અદ્યતન પ્રકલ્પોના માધ્યમથી રાજ્યના બાળકો વિજ્ઞાનની દુનિયામાં ગળાડૂબ બને તે માટે રાજ્ય સરકારે પ્રયાસો હાથ ધર્યા છે.

• આ પ્રકલ્પોથી બાળકો વિજ્ઞાન તરફ વધુ આકર્ષિત થશે

સરકારના સાયન્સ ટેકનોલોજી વિભાગ દ્વારા આ દિશામાં થઈ રહેલી કામગીરીની રૂપરેખા આપતાં જણાવ્યું હતું કે, સાયન્સ સિટીમાં ટૂંક સમયમાં જ ગ્લોબલ રોબોટિક ગેલેરી તેમજ દેશનું સૌથી મોટું એક્વેરિયમ પણ આકાર પામવા જઈ રહ્યું છે. જેના પગલે રાજ્યના બાળકો વિજ્ઞાનની દુનિયામાં ઓતપ્રોત થઈ શકશે. ઉપરાંત અમદાવાદ સાયન્સ સિટીમાં ટેક્સટાઇલ ટેક્નોલોજીની ગેલેરી બનશે.

• બાલાસિનોરમાં અદ્યતન ડાયનાસોર પાર્ક નિર્માણ પામશે

મુખ્યપ્રધાને રોબોટિક ગેલેરીમાં રોબોઝીયમ, રિસર્ચ એન્ડ રેસ્કયૂમાં રોબોટિકની ભૂમિકા, મેડિકલ અને આરોગ્યક્ષેત્રમાં રોબોટિક પર્ફોર્મન્સને પ્રત્યક્ષ નિહાળ્યું હતું. તેમણે બાલાસિનોરના ડાયનાસોર પાર્કના નિર્માણની વિગતો પણ આપી હતી. ઉપરાંત મોઢેરામાં સોલાર સિટી વિકાસનું આયોજન હાથ ધર્યું છે, તેની પણ માહિતી આપી હતી.

• દરેક જિલ્લામાં વિજ્ઞાન કેન્દ્રો અને રાજ્યમાં ચાર સ્થળોએ પ્રાદેશિક મ્યુઝીયમ વિકસાવવામાં આવી રહ્યા છે

રાજ્યના દરેક જિલ્લામાં વિજ્ઞાન કેન્દ્રો અને ચાર સ્થળોએ પ્રાદેશિક મ્યુઝીયમ વિકસાવવામાં આવી રહ્યા છે. આમ મુખ્યપ્રધાન વિજય રૂપાણીએ સાયન્સ સિટી ખાતે પ્રગતિમાં રહેલા કાર્યોની સર્વગ્રહી સમીક્ષા કરી હતી. સાયન્સ સિટી દ્વારા તૈયાર કરવામાં આવેલા "અવર સાઈટ્સ અગેઈન્સ્ટ કોવિડ-19" પુસ્તિકા અંગે સાયન્સ સીટીની માહિતી સાથેની પેન ડ્રાઇવનું વિમોચન પણ કર્યું હતું. 3D પ્રિન્ટર દ્વારા તૈયાર થતી રેપ્લિકાના મશીનની પણ તેમણે રૂબરૂ જાણકારી મેળવી હતી.

• સાયન્સ સિટીમાં અન્ય નઝરાણા પણ આવી રહ્યા છે

સાયન્સ એન્ડ ટેકનોલોજી ડિપાર્ટમેન્ટના સચિવ હરિત શુક્લાએ સાયન્સ સિટીમાં તૈયાર થઇ રહેલા અને પ્રગતિમાં રહેલા મ્યુઝિકલ ફાઉન્ટેન, નવા થિયેટર, પ્લેનેટ અર્થ વિભાગ, એનર્જી પાર્ક, લાઈફ સાયન્સ વિભાગ અંગેની જાણકારી મુખ્યપ્રધાનને આપી હતી.