અમદાવાદ: વૃદ્ધે પોતાની હત્યા થશે તેવી દહેશતમાં કરી લીધી આત્મહત્યા

શહેરના રામોલ વિસ્તારમાં એક વૃદ્ધે કોઈ વેપારીને ઉછીના પૈસા આપ્યાં હતાં. જે પૈસા વેપારીએ પાછા નહોતા આપ્યાં અને વૃદ્ધને ધમકી આપતો હતો. જેથી વૃદ્ધને એવું હતું કે વેપારી તેમની હત્યા કરાવી દેશે જેની દહેશતને પગલે વૃદ્ધે ગળેફાંસો ખાઈ આપઘાત કરી લીધો હતો. જે મામલે રામોલ પોલીસે સ્યૂસાઈડ નોટના આધારે ગુનો નોધીને તપાસ શરુ કરી છે.

અમદાવાદ: શહેરમાં દિલીપભાઈ શર્મા વટવા પોલીસ ચોકી સામે દુકાન ધરાવી વેપાર કરે છે. આ દુકાન પહેલાં તેમના કાકા નારાયણભાઈ શર્મા ચલાવતાં હતાં. આ નારાયણભાઈના વર્ષો પહેલાં છૂટાછેડાં થઈ જતાં ભત્રીજા દિલીપભાઈને પંદરેક વર્ષ પહેલા દત્તક લીધો હતો. દિલીપભાઈ તેમના કાકાની સાથે જ રહેતા અને તેમના કાકા નારાયણભાઈ વટવામાં ભાડે દુકાન રાખી સોપારીનો વેપાર કરતાં હતાં. તેઓ અવારનવાર કહેતાં કે રાજકુમાર અગ્રવાલ નામના વેપારી પાસે તેમના ઘણાં પૈસા ફસાયાં છે જે પૈસા પરત પણ નથી આપતો અને ધમકી આપે છે.

વૃદ્ધે પોતાની હત્યા થશે તેવી દહેશતમાં કરી લીધી આત્મહત્યા

બાદમાં ગત 16 ઓગસ્ટના રોજ નારાયણભાઈ તેમના પરિવાર સાથે બેઠાં હતાં. ત્યારે અચાનક તેઓ રડવા લાગ્યાં હતાં. જેથી પરિવારજનોએ પૂછતાં તેઓએ કઈ કહ્યું નહીં અને મારું દુઃખ મારી પાસે રહેવા દે તેમ કહી પરિવારજનોને સૂવા જવા કહ્યું હતું. બાદમાં 17મીએ સવારે બધા ઊઠ્યાં અને મેઈન હોલમાં આવ્યાં ત્યારે નારાયણભાઈએ દોરી વડે ફાંસો ખાઈ લીધો હતો જે અંગે દિલીપભાઈએ ઘરના સભ્યોને જાણ કરી હતી.આ અંગે પોલીસે કાર્યવાહી શરૂ કરી હતી અને ઓશિકા નીચેથી બે સ્યુસાઇડ નોટ મળી આવી હતી. જેમાં રાજકુમાર અગ્રવાલ, તેનો પુત્ર મેનિશ અગ્રવાલ તથા ભાઈ વિષ્ણુ અગ્રવાલના નામનો ઉલ્લેખ કર્યો હતો. તેમાં જણાવ્યું હતું કે, આ લોકોએ નારાયણભાઈ પાસેથી 1.26 કરોડ રૂપિયા લીધાં છે પણ ચૂકવ્યાં નથી. તેઓના ડરથી તેઓ આપઘાત કરે છે. એટલું જ નહીં એ ત્રણેય પાંચ હજારમાં યુપીથી ગુંડાઓ બોલાવી મર્ડર કરાવી શકે છે તેવી દહેશત પણ ચિઠ્ઠીમાં વ્યક્ત કરી હતી. સમગ્ર મામલે સ્યૂસાઇડ નોટના પુરાવા આધારે રામોલ પોલીસે ત્રણ લોકો સામે આઇપીસીની કલમ 306, 114 મુજબ ગુનો નોંધી તપાસ હાથ ધરી છે.