ત્રીજી લહેર પહેલા સિવિલમાં તૈયારીઓ શરૂ, એક મિનિટમાં 600 લિટર ઓક્સિજન સપ્લાય કરી શકે તેવો નાખવામાં આવ્યો પ્લાન્ટ

દેશ અને રાજ્યમાં બીજી લહેર અત્યંત ઘાતક સાબિત થઈ છે, ત્યારે ત્રીજી લહેરને લઈ નિષ્ણાત ડૉક્ટર અને વૈજ્ઞાનિકો ચિંતામાં જોવા મળી રહ્યા છે. જો કે, ત્રીજી લહેરના ભાગરૂપે ગુજરાતમાં આવેલી એશિયાની સૌથી મોટી હોસ્પિટલમાં તૈયારીઓ આરંભી દેવામાં આવી છે.

• અમદાવાદ સિવિલમાં નાખવામાં આવ્યો ઓક્સિજન પ્લાન્ટ
• એક મિનિટમાં 600 લિટર કરે છે ઓક્સિજન સપ્લાય
• ત્રીજી લહેરના ભાગરૂપે પૂર્વ તૈયારીઓ કરવામાં આવી શરૂ

અમદાવાદઃ સમગ્ર ભારત કોરોનાની બીજી લહેરનો સામનો કરી રહ્યું છે, ત્યારે એલ.એન્ડ ટી. કંપની દ્વારા એશિયાની સૌથી મોટી હોસ્પિટલમાં ઓક્સિજન જનરેટ યુનિટ નાખવાનું નક્કી કર્યું હતું. જે અંતર્ગત સિવિલમાં ઓક્સિજન પ્લાન્ટ નાખવામાં આવ્યો છે. 'આત્મનિર્ભર ભારત'ના સૂત્રને સાકાર કરતા એલ.એન્ડ.ટી કંપનીએ યુધ્ધના ધોરણે વિશ્વના વિવિધ દેશોમાંથી જરૂરી ચીજવસ્તુઓ મેળવીને હવામાંથી ઓક્સિજન ઉત્પન્ન કરનારા 22 ઓક્સિજન જનરેટર યુનિટોનું નિર્માણ કંપનીના પ્લાન્ટ ખાતે કરવામાં આવી રહ્યું છે. જે પૈકી તૈયાર થયેલા યુનિટને આજે રવિવારે સિવિલમાં પ્લાન્ટ મુકવામાં આવ્યો છે. એક ઓક્સિજન યુનિટ પ્રતિ મિનિટે 600 લિટર ઓક્સિજન ઉત્પન્ન કરવાની ક્ષમતા ધરાવે છે. જેથી આગામી સમયમાં હોસ્પિટલમાં જાતે જ ઓક્સિજન ઉત્પન્ન થવાથી ઓક્સિજનની જરૂરિયાતને પહોંચી શકાશે, જ્યારે અન્ય યુનિટ ગુજરાત તથા અન્ય રાજ્યોની હોસ્પિટલોને ડોનેટ કરાશે. પ્રત્યેક ઓક્સિજન જનરેશન યુનિટ કમ્પ્રેસર, એર ઇન્ટેક વેસલ, ડ્રાયર, ઓક્સિજન જનરેટર અને ઓક્સિજન સ્ટોરેજ ટેંક ધરાવે છે. જો કે, પ્લગ અને પ્લેની ખાસિયત ધરાવતા આ યુનિટ એક વાર ઇન્સ્ટોલ થઈ ગયાં પછી તેના કમ્પ્રેસરમાં વાતાવરણની હવા નિશ્ચિત પ્રેશરથી ગણતરીની મિનિટોમાં પસાર થાય છે. ત્યારબાદ પાઈપ વાટે ઓક્સિજનનું પમ્પીંગ શરૂ થઈ જાય છે.

ત્રીજી લહેર પહેલા સિવિલમાં તૈયારીઓ શરૂ

આ પણ વાંચોઃ જામનગરના હાપા રેલવે સ્ટેશનથી ઓક્સિજન એક્સપ્રેસ મારફતે ગુડગાવ ઓક્સિજન મોકલાયો