અમદાવાદઃ જિલ્લાના ગ્રામ્ય વિસ્તારમાં આવેલા સાણંદ અને બાવળામાં ગત કેટલાક સમયથી યુવકો નશાકારક સીરપનું સેવન કરી રહ્યા હોવાની માહિતી ડીજી સ્કોડને મળી હતી. જેના આધારે પોલીસે કાર્યવાહી હાથ ધરી હતી. જેમાં બાવળા તાલુકાના ચિયાડા ગામમાં રહેતા કિરણસિંહ ચૌહાણના ત્યાં પોલીસે દરોડા પાડ્યા હતા. આ દરોડામાં કિરણસિંહવા ગોડાઉનમાંથી 1,28,000નો મુદ્દામાલ મળી આવ્યો છે. જેથી પોલીસે ગુનો નોંધી આગળની તપાસ હાથ ધરી છે.
મળતી માહિતી મુજબ, કિરણસિંહ ગેરકાયદે સીરપનું વેચાણ કરી રહ્યો હોવાની માહિતી પોલીસને મળી હતી. જેથી પોલીસે કિરણસિંહના ગોડાઉનમાં દરોડા પાડતાં phosphate યુક્ત rexogent અને apdyl-tનો કુલ 1,28,000 રૂપિયાનો મુદ્દામાલ મળી આવ્યો હતો.
આ સાથે જ પોલીસે બાવળામાં મિહિર પટેલ નામના વ્યક્તિના ઘરે ફૂડ અને ડ્રગ વિભાગને સાથે રાખી કાર્યવાહી કરી હતી. ત્યારે પણ પોલીસને 4,44,000નો મુદ્દામાલ મળી આવ્યો હતો. જેથી પોલીસે બન્ને વિરુદ્ધ NDPS એક્ટ હેઠળ ગુનો દાખલ કરી આગળની કાર્યવાહી હાથ ધરી છે.
પોલીસ તપાસમાં સામે આવ્યું કે, આરોપી કિરણસિંહ ગત 1 વર્ષથી આ ધંધો કરી રહ્યો છે અને આરોપી મિહિર પટેલ પહેલા મેડિકલ સ્ટોર ચલાવતો હતો અને તેના પર કેસ થતા લાઇસન્સ રદ થઈ ગયું હતું. ત્યારબાદ મિહિર પટેલે આવી રીતે ગેરકાયદે સીરપ વેચવાનું શરૂ કર્યું હતું.
પોલીસની તપાસમાં વધુ જાણવા મળ્યું કે, આરોપી અમદાવાદના ભરત ચૌધરી પાસેથી આ સીરપની ખરીદી કરતા હતા.
