મુંબઈ : ચાલુ સપ્તાહની શરુઆતથી જ બજારમાં રિકવરીનું વલણ હતું. જેને આજે બ્રેક લાગી છે. ભારતીય શેરબજારના બંને મુખ્ય સૂચકાંક BSE Sensex અને NSE Nifty આજે અનુક્રમે 610 અને 193 પોઈન્ટ તૂટીને નીચા મથાળે લાલ રંગમાં બંધ થયા હતા. જોકે, આજે બંને ઈન્ડેક્સ વધારા સાથે ખુલ્યા હતા. પરંતુ ત્યારબાદ બજાર સતત ઘટતું રહ્યું હતું. ઉલ્લેખનિય છે કે, આવતી કાલે સપ્તાહનો છેલ્લો ટ્રેડિંગ દિવસ છે. ત્યારબાદ સદદ ત્રણ દિવસ ભારતીય શેરબજાર બંધ રહેશે, આથી રોકાણકારોએ સલામત કારોબાર કર્યો હોવાનો અંદાજ છે.
BSE Sensex : આજે 28 સપ્ટેમ્બર ગુરુવારના રોજ BSE Sensex ગતરોજના 66,118 બંધની સામે 288 પોઈન્ટ વધીને 66,406 ના મથાળે ખુલ્યો હતો. બજારની સારી શરુઆતમાં જ ડે હાઈ બનાવી BSE Sensex સતત વેચવાલીના પગલે નીચે તરફ ઘટતો રહ્યો હતો. જેમાં સતત નબળા વલણના પરિણામે આશરે 983 પોઈન્ટ તૂટીને 65,423 પોઈન્ટ ડાઉન ગયો હતો. એશિયાઈ માર્કેટ ખુલતાની સાથે ભારતીય માર્કેટના સેન્ટિમેન્ટને નેગેટિવ અસર થઈ હતી. જોકે, DII ના ટેકારુપી બાઈંગ સાથે આખરે હળવી રિકવરી બાદ BSE Sensex ઈન્ડેક્સ 610 પોઈન્ટ તૂટીને 65,508 ના મથાળે બંધ રહ્યો હતો. જે 0.92 ટકાનો ઘટાડો દર્શાવે છે.
NSE Nifty : આજના ટ્રેડિંગ સેશનના અંતે NSE Nifty ઈનડેક્સ લગભગ 193 પોઈન્ટ (0.98 %) ઘટીને 19,523 પોઈન્ટ પર બંધ થયો હતો. ઉલ્લેખનિય છે કે, NSE Nifty ઈનડેક્સ આજે 45 પોઈન્ટ વધીને 19,761 ના મથાળે ખુલ્યો હતો. ત્યારબાદ શરુઆતમાં NSE Nifty 19,766 પોઈન્ટની ડે હાઈ બનાવી હતી. પરંતુ ત્યારબાદ સતત વેચવાલીના પગલે 19,492 પોઈન્ટ સુધી ડાઉન ગયો હતો. દિવસ દરમિયાન વિદેશી ફંડના સેલિંગ પ્રેશર વચ્ચે ઈન્ડેક્સ સતત નીચે રહ્યો હતો. ઉલ્લેખનિય છે કે, ગતરોજ NSE Nifty 19,716 ના મથાળે બંધ રહ્યો હતો.
બજારમાં કડાકાના કારણ : આજે ભારતીય શેરબજારમાં ધોવાણના મુખ્ય કારણોમાં વૈશ્વિક અને સ્થાનિક વેચવાલી છે. ઉપરાંત યુએસ બોન્ડ યીલ્ડ અને ડોલર ઇન્ડેક્સમાં થયેલા વધારાની પણ અસર ભારતીય બજાર પર થઈ હોઈ શકે. બીજી તરફ કાચા તેલના ભાવમાં સતત વધારો થઈ રહ્યો છે. જેની સામે વૈશ્વિક બજારમાં નરમાઈ અને સ્થાનિક હેવીવેઇટ શેરોમાં વેચવાલીના પગલે અચાનક બજારમાં કડાકો બોલ્યો છે. આવનાર ત્રણ દિવસ ભારતીય શેરબજાર બંધ રહેશે ત્યારે રોકાણકારોએ સલામત કારોબાર કર્યો હોવાનો અંદાજ છે.
ટોપ ગેઈનર શેર : સૌથી વધુ ઊંચકાયેલા શેરમાં લાર્સન (1.69 %), પાવર ગ્રીડ કોર્પો (0.73 %), ભારતી એરટેલ (0.59 %), એક્સિસ બેંક (0.39 %) અને SBI (0.08 %)નો સમાવેશ થાય છે.
ટોપ લુઝર શેર : જ્યારે સૌથી વધુ ગગડેલા શેરોમાં ટેક મહિન્દ્રા (-4.59 %), એશિયન પેઇન્ટ્સ (-3.97 %), વિપ્રો (-2.36 %), એમ એન્ડ એમ (-2.10 %) અને ઇન્ફોસીસ (-1.91 %)નો સમાવેશ થાય છે.
ADR : આજે શેરબજારનો એડવાન્સ ડેકલાઈન રેશિયો નેગેટિવ રહ્યો હતો. આજે નેશનલ સ્ટોક એક્સચેન્જમાં 716 શેરના ભાવ વધ્યા હતા. જેની સામે 1327 શેરના ભાવ ઘટ્યા હતા. જોકે, BSE સેન્સેક્સમાં સૌથી વધુ એક્ટિવ શેરમાં ટીસીએસ, રિલાયન્સ, HDFC બેંક અને કોટક મહિન્દ્રાના સ્ટોક રહ્યા હતા.
