શેરબજારમાં સાત દિવસમાં સેન્સેક્સમાં 1300 પોઈન્ટનો કડાકો, વિશ્વના સ્ટોક માર્કેટ પણ તૂટયા

મુંબઈ: અમેરિકા અને ચીન વચ્ચે ચાલી રહેલ ટ્રેડવૉરને પગલે શેરબજારમાં સતત ત્રીજા દિવસે ગાબડું પડ્યું હતું. આમ જોવા જઈએ તો શેરબજાર સતત સાત દિવસથી ગબડી રહ્યું છે. વિશ્વના તમામ સ્ટોક માર્કેટ પણ તૂટ્યા હતા. પરિણામે ભારતીય શેરબજારનું સેન્ટિમેન્ટ વધુ ખરડાયું હતું. આજે ત્રીજા દિવસે શેરબજાર ખુલતાની સાથે શેરોની જાતે-જાતમાં ભારે વેચવાલી ફરી વળી હતી, અને રીલાયન્સની આગેવાની હેઠળ શેરોના ભાવ ઝડપી ઘટ્યા હતા. ટ્રેડિંગ સેશનને અંતે બીએસઈ સેન્સેક્સ 230.22(0.61 ટકા) તૂટી 37,558.91 બંધ થયો હતો. તેમજ એનએસઈ નિફટી ઈન્ડેક્સ 57.65(0.51 ટકા) ગબડી 11,301.80 બંધ રહ્યો હતો. સાત દિવસમાં સેન્સેક્સમાં 1300 પોઈન્ટનો કડાકો બોલી ગયો છે.

અમેરિકાના રાષ્ટ્રપતિ ડોનાલ્ડ ટ્રમ્પે ચીનના 200 અબજ ડૉલરના મુલ્યના ઉત્પાદકો પર આયાત ડ્યૂટી લાદવાની ચેતવણી આપી છે, જે ટ્રમ્પના ટ્વીટ પછી વિશ્વના તમામ સ્ટોક માર્કેટ ત્રણ દિવસથી સતત તૂટી રહ્યા છે. એક અંદાજ મુજબ વૈશ્વિક બજારોના 1.36 લાખ કરોડ ડૉલર ડુબી ગયા છે.

અમેરિકન સ્ટોક માર્કેટ પાછળ એશિયાઈ સ્ટોક માર્કેટ આજે નીચા મથાળે ગેપમાં જ ખુલ્યા હતા. જેનો ગભરાટ હતો, ભારતીય શેરોમાં તેજીવાળા ખેલાડીઓએ લેણના પોટલા છોડ્યા હતા. એફઆઈઆઈ છેલ્લા 10 દિવસથી નેટ સેલર છે, આજે પણ એફઆઈઆઈએ વેચવાલી કાઢી હતી. જો કે સામે સ્થાનિક નાણા સંસ્થાઓની ટેકારૂપી લેવાલી હતી, પણ તેની કોઈ માર્કેટ પર અસર જોવા મળી ન હતી.

આજે રીલાયન્સ(3.41 ટકા), કૉલ ઈન્ડિયા(2.53 ટકા), એનટીપીસી(2.33 ટકા), એશિયન પેઈન્ટ(2.29 ટકા) અને ભારતી એરટેલ(1.64 ટકા) સૌથી વધુ ગબડ્યા હતા.

જો કે આજે યશ બેંક 5.94 ટકા ઉછળી રૂ.170.30 બંધ રહ્યો હતો. તેની સાથે બજાજ ફાઈનાન્સ(1.64 ટકા), હીરો મોટો(1.17 ટકા), હિન્દુસ્તાન યુનીલીવર(0.87 ટકા) અને ટીસીએસ(0.75 ટકા) સૌથી વધુ ઊંચકાયા હતા.