દિલ્હી: ભારતીય સંસદનું શિયાળુ સત્ર આજથી શરૂ થઈ રહ્યું છે. 26 ડિસેમ્બર સુધી આ સત્ર ચાલશે. વડાપ્રધાન મોદીએ શિયાળુ સત્ર 2022ની શરૂઆત પહેલા વિપક્ષને હોબાળો ન કરવા અપીલ કરી હતી. તેમણે જણાવ્યું હતું શિયાળુ સત્રનો આજે પહેલો દિવસ છે. સંસદમાં ચર્ચા થવી લોકતંત્ર માટે ખૂબ જ જરૂરી છે. યુવા સાંસદો વધુ ચર્ચામાં ભાગ લે તે મહત્વનું છે. આ સત્રમાં મહત્વના નિર્ણયો લેવામાં આવશે. 15 ઓગસ્ટે આઝાદીના 75 વર્ષ પૂર્ણ થયા અને આપણે આઝાદીના અમૃતમાં આગળ વધી રહ્યા છીએ. આપણે એવા સમયે મળી રહ્યા છીએ જ્યારે ભારતને G20ની અધ્યક્ષતાની તક મળી છે.
16 નવા બિલ રજૂ થશે: સરકાર આ અવસર પર ઘણા મહત્વપૂર્ણ બિલ રજૂ કરવા જઈ રહી છે. આ સાથે નેશનલ નર્સિંગ કમિશન સંબંધિત બિલ પણ રજૂ કરવામાં આવે તેવી શક્યતા છે. જેમાં નેશનલ નર્સિંગ કમિશન (NNMC) ની સ્થાપના કરવા અને ઇન્ડિયન નર્સિંગ કાઉન્સિલ એક્ટ, 1947ને રદ કરવાનો પ્રસ્તાવ છે. બહુ-રાજ્ય સહકારી મંડળીઓ (સુધારા) બિલ, 2022 સહકારી સંસ્થાઓમાં શાસનને મજબૂત બનાવવા, પારદર્શિતા અને જવાબદારી વધારવા અને ચૂંટણી પ્રક્રિયામાં સુધારો કરવાના ઉદ્દેશ્ય સાથે રજૂ કરવામાં આવી રહ્યું છે.
આરક્ષણ, સરહદ મુદ્દાઓ પર ચર્ચાની માંગ: વિપક્ષ દ્વારા લાંબી યાદી તૈયાર કરવામાં આવી છે. ઘણા મુદ્દાઓ પર ચર્ચાની તૈયારી ચાલી રહી હોવાનું સ્પષ્ટ દેખાઈ રહ્યું છે. અત્યારે કોંગ્રેસ કહી રહી છે કે તે ગૃહને ખોરવી નહીં નાખે અને ચર્ચા પર ભાર મુકશે, જ્યારે સરકાર પણ સ્પીકર દ્વારા મંજૂર કરાયેલા દરેક મુદ્દા પર ચર્ચા કરવા તૈયાર છે. કોંગ્રેસે નિર્ણય લીધો છે કે તે સંસદ 2022 ના શિયાળુ સત્ર દરમિયાન સરહદ પરની સ્થિતિ, અર્થવ્યવસ્થાની સ્થિતિ અને લોકોના આર્થિક રીતે નબળા વર્ગો માટે અનામત અંગે ચર્ચા કરશે.
બહુ-રાજ્ય સહકારી મંડળીઓ (સુધારા) બિલ, 2022 ખૂબ મહત્વ ધરાવે છે. આ બિલ દ્વારા ઘણા જૂના કાયદાઓને નાબૂદ કરવાની તૈયારી છે. તો વળી બીજું ટ્રેડ માર્ક્સ એમેન્ડમેન્ટ બિલ, 2022 પણ હેડલાઇન્સમાં રહેવાનું છે. જો આ બિલ પાસ થઈ જાય છે, તો અરજી પછી જ ટ્રેડ માર્ક આપી શકાશે. આ સિવાય આ બિલ દ્વારા ટ્રેડ માર્કની અરજીઓની પ્રક્રિયાને ઝડપી બનાવવા પર પણ ભાર મૂકવામાં આવશે.
