ચંદીગઢઃ પંજાબ પોલીસે આખરે 36 દિવસ બાદ ખાલિસ્તાન સમર્થક અમૃતપાલ સિંહની ધરપકડ કરી લીધી છે. પ્રેસ કોન્ફરન્સમાં પંજાબ પોલીસના આઈજી સુખચૈન સિંહ ગિલે માહિતી આપી કે અમૃતપાલની આજે સવારે મોગાના રોડે ગામમાંથી ધરપકડ કરવામાં આવી છે. આઈજી સુખચૈન સિંહે કહ્યું કે પંજાબ પોલીસની તમામ પાંખો સાથે મળીને કામ કરી રહી છે. NSA હેઠળ અમૃતપાલ સિંહ વિરુદ્ધ ધરપકડ વોરંટ જારી કરવામાં આવ્યું હતું.
ગુરુદ્વારાની ગરિમાને ધ્યાનમાં રાખી ધરપકડ: તેમણે જણાવ્યું કે અમૃતપાલની આજે સવારે 6.45 વાગ્યે મોગા જિલ્લાના રોડે ગામમાંથી ધરપકડ કરવામાં આવી છે. આઈજીએ જણાવ્યું કે પોલીસને બાતમી મળી હતી કે અમૃતપાલ ગુરુદ્વારાની અંદર હાજર છે, ત્યારબાદ પંજાબ પોલીસ અને ગુપ્તચર એજન્સીઓએ સમગ્ર ગામને કોર્ડન કરી લીધું હતું. ગુરુદ્વારાની ગરિમાને ધ્યાનમાં રાખીને પોલીસે આ કામગીરી હાથ ધરી છે.
આ પણ વાંચો: Amritpal Video: ધરપકડ પહેલા અમૃતપાલે મોગાના ગુરુદ્વારામાં આપ્યો ઉપદેશ, સામે આવ્યો વીડિયો
ધરપકડ અથવા શરણાગતિ: સુખચૈન ગિલને પૂછવામાં આવ્યું કે શું એવા અહેવાલો છે કે અમૃતપાલે આત્મસમર્પણ કર્યું છે અથવા તેની ધરપકડ કરવામાં આવી છે. તેના પર આઈજી ગિલે કહ્યું કે અમૃતપાલ પાસે બીજો કોઈ વિકલ્પ નહોતો. આઈજીએ કહ્યું કે અમૃતપાલે આત્મસમર્પણ કર્યું નથી, પરંતુ પોલીસને ઈનપુટ મળ્યું હતું કે તે ગુરુદ્વારામાં હાજર હતો, જેના પછી પોલીસે કેન્દ્રીય એજન્સીઓ સાથે મળીને અમૃતપાલની ધરપકડ કરી હતી. ગુરુદ્વારાની ગરિમાને ધ્યાનમાં રાખીને પોલીસે આ સમગ્ર ઓપરેશન પાર પાડ્યું છે.
આ પણ વાંચો: Amritpal Arrested: કોણ છે આ અમૃતપાલ સિંહ, દુબઈ ક્નેક્શન સામે આવ્યા બાદ બન્યો વોન્ટેડ
અમૃતપાલને ડિબ્રુગઢ જેલમાં મોકલાયો: આઈજી સુખચૈન સિંહે કહ્યું કે અમૃતપાલને આસામની ડિબ્રુગઢ જેલમાં મોકલી દેવામાં આવ્યો છે. કેટલાક તોફાની લોકો પંજાબનું વાતાવરણ બગાડવા માંગે છે. આવી સ્થિતિમાં પોલીસ દ્વારા ચેતવણી આપવામાં આવી છે કે તેઓ આવું ન કરે નહીં તો કડક કાર્યવાહી કરવામાં આવશે.
