સુપ્રીમકોર્ટે ફગાવી ચંદા કોચરની ICICI બેંક માંથી સેવાનિવૃત્તિનો લાભ માંગવાની અરજી

ICICI બેંકના પૂર્વ મેનેજિંગ ડિરેક્ટર ચંદા કોચરને સુપ્રીમ કોર્ટમાંથી રાહત મળી નથી. સર્વોચ્ચ અદાલતે બેંકમાંથી સેવાનિવૃત્તિ લાભ મેળવવાની તેમની અરજીને ફગાવી દીધી છે. મહત્વપૂર્ણ છે કે, કોચરે બોમ્બે હાઈકોર્ટના 3 મેના એ આદેશને પડકાર્યો હતો, જેમાં તેમની અરજી એવું કહીને ફગાવી દેવામાં આવી હતી કે, તેમને કોઈપણ વચગાળાની રાહત આપવાથી બેંકને ભરપાઈ ન થઈ શકે તેવું નુકસાન થશે. હાઈકોર્ટના આ આદેશને કોચરે સુપ્રીમમાં પડકાર્યો હતો જોકે, સુપ્રીમકોર્ટમાંથી પણ કોચરને કોઈ લાભ મળ્યો નથી.

નવી દિલ્હી: સુપ્રીમ કોર્ટે શુક્રવારે ICICI બેંકના ભૂતપૂર્વ મેનેજિંગ ડિરેક્ટર અને CEO ચંદા કોચરની બેંકમાંથી નિવૃત્તિ લાભ મેળવવાની અરજીને ફગાવી દીધી હતી. જસ્ટિસ સંજીવ ખન્ના અને જસ્ટિસ એસવીએન ભટ્ટીની ખંડપીઠે કહ્યું, આ કોઈ દખલગીરીનો કેસ જ નથી, અમે હાઈકોર્ટના આદેશમાં દખલ કરવા ઈચ્છતા નથી તેથી સ્પેશિયલ લીવ પિટિશન ફગાવી દેવામાં આવે છે. જ્યારે કોચર તરફથી હાજર રહેલા વરિષ્ઠ વકીલ હરીશ સાલ્વેએ જણાવ્યું હતું કે, હાઈકોર્ટે કોઈપણ ચર્ચા કે નિષ્કર્ષ વિના જ અરજીને ફગાવી દીધી. બેન્ચે કહ્યું હતું કે તેમણે સામેલ તથ્યોને જોયા છે અને આ મામલે કોઈ દખલ કરવાની જરૂર લાગતી નથી. કોચરે બોમ્બે હાઈકોર્ટના 3 મેના એ આદેશને પડકાર્યો હતો, જેમાં તેમની અરજી એવું કહીને ફગાવી દેવામાં આવી હતી કે, તેમને કોઈપણ વચગાળાની રાહત આપવાથી બેંકને ભરપાઈ ન થઈ શકે તેવું નુકસાન થશે.

કોર્ટનું તારણ: દરમિયાન, ન્યાયમૂર્તિ બેલા એમ ત્રિવેદીની આગેવાની હેઠળની સર્વોચ્ચ અદાલતની બીજી બેન્ચે કોચરના વચગાળાના જામીનને પડકારતી CBIની અરજી પર સુનાવણી સ્થગિત રાખી હતી. તપાસ એજન્સીની અરજી પર હવે 11 ડિસેમ્બરે સુનાવણી થશે. ICICI બેંકમાંથી સેવાનિવૃત્તિના લાભની માંગ કરતા કોચરે તેમની અરજીમાં વિવિધ દસ્તાવેજો અને કોર્ટના આદેશોને ટાંક્યા હતા અને કહ્યું હતું કે, બેંક દ્વારા દાખલ કરવામાં આવેલા વાદમાં પ્રથમ દૃષ્ટિએ કોઈ કેસ જણાયો નથી.

ચંદા કોચર સામે શું છે મામલો: હાઈકોર્ટની સિંગલ જજની બેન્ચે કોચરને નિર્દેશ આપ્યો હતો કે, તે 2018માં ખરીદેલી રૂ. 6.90 લાખની બેન્ક સિક્યોરિટીઝનો સોદો ન કરે. અરજીમાં કહેવામાં આવ્યું હતું કે બેંક એવા વ્યક્તિને બરતરફ કરી શકે નહીં જે પહેલાથી જ સેવાનિવૃત્ત થઈ ચૂક્યા છે. તેમને બિનશરતી રીતે આપવામાં આવેલા લાભોમાં કર્મચારી સ્ટોક વિકલ્પોનો સમાવેશ હતો જે 2028 સુધી ઉપયોગ યુક્ત હતાં. આ સમગ્ર ઘટનાક્રમમાં મે 2018 માં, બેંકે વીડિયોકોન જૂથને નિયમોથી ઉપરવટ જઈને 3,250 કરોડ રૂપિયાની લોન આપવામાં તેમની કથિત ભૂમિકા વિશેની ફરિયાદ બાદ ચંદા કોચર વિરૂધ્ધ તપાસ શરૂ કરવામાં આવી હતી. જેમા ચંદાના પતિ દીપક કોચરને ફાયદો થયો હતો, ત્યાર બાદ કોચર રજા ઉપર ઉતરી ગયા હતાં અને ત્યાર બાદ તેઓ સમય મર્યાદા પહેલાં સેવાનિવૃતિ માટે અરજી કરી જેનો સ્વીકાર કરી લેવામાં આવ્યો.

બેંકે ત્યાર બાદ આ 'સંબંધિત કારણ માટે બરતરફી' તરીકે ગણ્યું હતું અને તેમની નિયુક્તિને સમાપ્ત કરવા માટે ભારતીય રિઝર્વ બેંક પાસેથી નિયમનકારી મંજૂરી માંગી હતી, કારણ કે આરબીઆઈ એક્ટની જોગવાઈઓ હેઠળ તે જરૂરી હતું