જયપુરઃ ભારતીય જનતા પાર્ટીના યુવા અને ફાયર બ્રાન્ડ નેતા છે બાબા બાલકનાથ. બાબા અલવર બેઠક પરથી લોકસભાના સાંસદ સભ્ય છે. 2019ની લોકસભા ચૂંટણીમાં તેમણે પૂર્વ કેન્દ્રીય પ્રધાન અને દિગ્ગજ કૉંગ્રેસ લીડર જિતેન્દ્ર સિંઘને હરાવી દીધા હતા.
આ વખતે ભાજપે આ નેતામાં વિશ્વાસ મુક્યો અને તિજારા બેઠક પરથી ટિકિટ આપી છે. આ બેઠક પર બાબાનો મુકાબલો કૉંગ્રેસ ઉમેદવાર ઈમરાન ખાન સામે હતો. આજે મતગણતરીમાં મધ્યાહને બાબા ઈમરાન ખાનથી 13,000 વોટ આગળ હતા.
રાજસ્થાનના આગામી મુખ્ય પ્રધાન બનવાના લિસ્ટમાં બાબા બાલકનાથનો સમાવેશ થાય છે. રાજસ્થાનમાં ભાજપે કૉંગ્રેસ પાસેથી સત્તા આંચકી લીધી છે.
બાબા બાલકનાથ કોહરાણા ગામમાં જન્મ્યા હતા. તેમણે અલવરમાં ખૂબ જ કામ કર્યુ. તેમના પિતા સુભાષ યાદવને બાબા ખેનાથમાં ખૂબ જ શ્રદ્ધા હતી. તેથી બાબા બાલકનાથમાં પણ નાનપણથી જ દિવ્યતા અને ધાર્મિક ગુણો ઉતર્યા હતા. તેમણે પોતાનું ઘર સાડા છ વર્ષની ઉંમરે છોડી દીધું હતું. તેમણે અત્યાર સુધીનું જીવન આશ્રમમાં વીતાવ્યું હતું.
અલવર બેઠક પરના સાંસદ અને બાબા બાલકનાથના ગુરુ મહંત ચંદનાથના પ્રયાસોથી બાલકનાથ રાજકારણમાં પ્રવેશ્યા. તેઓ રોહતકની બાબ માશનાથ યુનિવર્સિટીના ચાન્સેલર છે. તેઓ હરિયાણાના બાબા માશનાથ મઠના મહંત પણ છે.
બાબા બાલકનાથ ટિજારા બેઠક માટે આઉટસાઈડર છે જો કે તેમણે ધારદાર ચૂંટણી પ્રચાર કર્યો હતો. 2016માં તેમના ધાર્મિક જીવનમાં વળાંક આવ્યો. જ્યારે તેઓ અસ્થલ બોહના 8મા મહંત બન્યા. જે નાથ સંપ્રદાયનો સૌથી વિશાળ મઠ છે.
બાબા બાલકનાથની રાજકીય કારકિર્દીમાં નવો વળાંક આવશે કે નહિ તે ભાજપનું શીર્ષ નેતૃત્વ નક્કી કરશે.
