નવી દિલ્હી: વડા પ્રધાન નરેન્દ્ર મોદીએ સંસદના નવા બિલ્ડિંગનું ઉદ્ઘાટન કર્યા પછી, કોંગ્રેસના ભૂતપૂર્વ અધ્યક્ષ રાહુલ ગાંધીએ રવિવારે દાવો કર્યો હતો કે વડા પ્રધાન સંસદ ભવનનું ઉદ્ઘાટન રાજ્યાભિષેક તરીકે વિચારી રહ્યા છે. તેમણે ટ્વીટ કર્યું કે સંસદ જનતાનો અવાજ છે. વડાપ્રધાન સંસદ ભવનનાં ઉદ્ઘાટનને રાજ્યાભિષેક તરીકે ગણી રહ્યાં છે. વડાપ્રધાન મોદીએ રવિવારે નવા સંસદ ભવનનું ઉદ્ઘાટન કર્યું અને લોકસભા અધ્યક્ષની બેઠક પાસે ઐતિહાસિક રાજદંડ 'સેંગોલ' સ્થાપિત કર્યો.
વડાપ્રધાન પર રાહુલનો આક્ષેપ : કોંગ્રેસના વરિષ્ઠ નેતા જયરામ રમેશે નવા સંસદ ભવનનું ઉદ્ઘાટન કર્યા પછી વડા પ્રધાન નરેન્દ્ર મોદી પર કટાક્ષ કર્યો હતો અને કહ્યું હતું કે ઉદ્ઘાટન સંસદીય પરંપરાઓને નફરત કરનારા "નાર્સિસ્ટિક સરમુખત્યાર વડા પ્રધાન" દ્વારા કરવામાં આવ્યું હતું. જયરામ રમેશે એવો પણ આક્ષેપ કર્યો હતો કે રાષ્ટ્રપતિ પદ સંભાળનાર પ્રથમ આદિવાસી દ્રૌપદી મુર્મુને તેમની બંધારણીય ફરજ નિભાવવા દેવામાં આવી નથી. કોંગ્રેસના વરિષ્ઠ નેતા પ્રમોદ તિવારીએ કહ્યું કે ફોટામાં ફક્ત એક જ ફ્રેમ હોવી જોઈએ, ફક્ત એક જ નામ હોવું જોઈએ, મોદીજીની બધી ઇચ્છાઓ આજે પૂર્ણ થઈ ગઈ છે.
વડાપ્રધાનએ નવિ સંસદનું ઉદધાટન કર્યું : પરંપરાગત પોશાકમાં સજ્જ વડાપ્રધાન મોદી ગેટ નંબર-1થી સંસદ ભવન સંકુલમાં પ્રવેશ્યા હતા. લોકસભા સ્પીકર ઓમ બિરલાએ તેમનું સ્વાગત કર્યું. આ પછી મોદી અને બિરલાએ મહાત્મા ગાંધીની પ્રતિમાને પુષ્પાંજલિ અર્પણ કરી હતી. વડા પ્રધાને નવા સંસદભવનના ઉદ્ઘાટન સમયે ભગવાનના આશીર્વાદ મેળવવા કર્ણાટકમાં શૃંગેરી મઠના પૂજારીઓ દ્વારા વૈદિક મંત્રોચ્ચાર વચ્ચે 'ગણપતિ હોમમ' વિધિ કરી હતી.
સેંગોલને પ્રણામ: વડાપ્રધાને 'સેંગોલ' (રાજદંડ)ને પ્રણામ કર્યા અને હાથમાં પવિત્ર રાજદંડ સાથે તમિલનાડુના વિવિધ અધ્યાનમના પૂજારીઓના આશીર્વાદ લીધા. આ પછી, 'નાદસ્વરમ'ની ધૂન વચ્ચે, વડા પ્રધાન મોદી સેંગોલને નવા સંસદ ભવન લઈ ગયા અને લોકસભા ચેમ્બરમાં સ્પીકરની બેઠકની જમણી બાજુએ એક વિશેષ સ્થાને સ્થાપિત કર્યું.
