નવી દિલ્હી: ભારતીય જનતા પાર્ટીએ રાષ્ટ્રપતિ ચૂંટણી 2022 (Presidential Election 2022) માટે NDA વતી પોતાના ઉમેદવારના નામની જાહેરાત કરી દીધી છે. ઝારખંડના પૂર્વ રાજ્યપાલ દ્રૌપદી મુર્મુને (Draupadi Murmu Declared Presidential Candidate) રાષ્ટ્રપતિ પદના ઉમેદવાર જાહેર કરવામાં આવ્યા છે. અગાઉ, ભાજપની સર્વોચ્ચ નીતિ-નિર્માણ સંસ્થા, સંસદીય બોર્ડની એક બેઠક મંગળવારે અહીં પક્ષના મુખ્યાલયમાં ભાજપના નેતૃત્વ હેઠળના રાષ્ટ્રીય લોકતાંત્રિક ગઠબંધન (એનડીએ) ઉમેદવારના નામ પર વિચારમંથન કરવા માટે યોજાઈ હતી.
આ પણ વાંચો: Presidential election 2022 : એનડીએ તરફથી રાષ્ટ્રપતિ પદના ઉમેદવારની કરાઇ જાહેરાત...
દેશના 15મા રાષ્ટ્રપતિ : નવીનતમ માહિતી અનુસાર, કેન્દ્રએ આજથી રાષ્ટ્રપતિ પદના ઉમેદવાર દ્રૌપદી મુર્મુને ઝેડ પ્લસ કેટેગરીની સુરક્ષા પૂરી પાડી છે. બેઠક પછી, બીજેપી અધ્યક્ષ જેપી નડ્ડાએ કહ્યું કે, સંસદીય બોર્ડની બેઠકમાં, બધા મત પર આવ્યા કે, એનડીએ તેના તમામ ઘટક પક્ષો સાથે તેના ઉમેદવારની જાહેરાત કરે. એનડીએ તરફથી રાષ્ટ્રપતિ પદના ઉમેદવાર તરીકે દ્રૌપદી મુર્મુ હશે. દ્રૌપદી મુર્મુની જીત નિશ્ચિત માનવામાં આવી રહી છે, જો તે જીતશે તો તે દેશના પ્રથમ આદિવાસી મહિલા રાષ્ટ્રપતિ બનશે અને દેશના 15મા રાષ્ટ્રપતિ તરીકે શપથ લેશે.
દેશના કેટલાક રાષ્ટ્રપતિઓ : આ સંબંધમાં આજે અમે તમને જણાવીશું કે દેશમાં અત્યાર સુધીમાં કેટલા એવા રાષ્ટ્રપતિ બન્યા છે જેઓ પહેલા રાજ્યપાલનું પદ સંભાળી ચૂક્યા છે.
વીવી ગિરી (10 ઑગસ્ટ 1894 - 24 જૂન 1980) : વીવી ગિરી ભારતના ચોથા રાષ્ટ્રપતિ હતા. તેમનો જન્મ 10 ઓગસ્ટ 1894ના રોજ બ્રહ્મપુર, મદ્રાસ પ્રેસિડેન્સીમાં થયો હતો. જે હવે ઓડિશાનો ભાગ છે. તેમના પિતાનું નામ શ્રી જોગીહ પંતુલુ હતું અને તેઓ વ્યવસાયે વકીલ હતા. 1937-39 અને 1946-47 ની વચ્ચે, તેઓ મદ્રાસ સરકારમાં શ્રમ, ઉદ્યોગ, સહકાર અને વાણિજ્ય વિભાગોમાં પ્રધાન હતા. ગિરીએ 1 જુલાઈ 1960ના રોજ કેરળના બીજા રાજ્યપાલ તરીકે શપથ લીધા હતા. તેઓ (1960-1965) 5 વર્ષ સુધી કેરળના રાજ્યપાલ હતા. તે પછી ભારતના ત્રીજા ઉપરાષ્ટ્રપતિ તરીકે તેમણે 13 મે 1967ના રોજ શપથ લીધા હતા. તેઓ 3 મે 1969 સુધી દેશના ઉપરાષ્ટ્રપતિ હતા. 1969ની રાષ્ટ્રપતિની ચૂંટણીમાં, તેમણે સ્વતંત્ર ઉમેદવાર તરીકે રાષ્ટ્રપતિની ચૂંટણી લડી અને ભારતના પ્રથમ સ્વતંત્ર અને દેશના ચોથા રાષ્ટ્રપતિ બન્યા હતા.
શંકર દયાલ શર્મા (19 ઓગસ્ટ 1918 – 26 ડિસેમ્બર 1999) : શંકર દયાલ શર્મા દેશના 9મા રાષ્ટ્રપતિ હતા. તેમનો જન્મ 19 ઓગસ્ટ 1918ના રોજ થયો હતો. 26 ડિસેમ્બર 1999ના રોજ તેમનું અવસાન થયું. તેઓ ભારતના 8મા ઉપરાષ્ટ્રપતિ હતા. તેમનો જન્મ મધ્યપ્રદેશની રાજધાની ભોપાલ પાસેના અમોન ગામમાં થયો હતો. તેઓ 25 જુલાઈ 1992 થી 25 જુલાઈ 1997 સુધી દેશના રાષ્ટ્રપતિ હતા. તેઓ 29 ઓગસ્ટ 1984 થી 26 નવેમ્બર 1985 સુધી આંધ્ર પ્રદેશના રાજ્યપાલ હતા. આ પહેલા તેઓ 26 નવેમ્બર 1985 થી 2 એપ્રિલ 1986 સુધી પંજાબના રાજ્યપાલ હતા. તેઓ 1952 થી 1956 સુધી ભોપાલના (હાલ મધ્યપ્રદેશ) મુખ્યપ્રધાન હતા. આ દરમિયાન તેમણે શિક્ષણ, કાયદા વગેરે વિભાગોમાં ઘણું કામ કર્યું. તેઓ 1974 થી 1977 સુધી દેશના કેન્દ્રીય સંચાર પ્રધાન પણ હતા.
પ્રતિભા દેવી સિંહ પાટીલ (19 ડિસેમ્બર 1934- વર્તમાન) : પ્રતિભા દેવી સિંહ પાટીલ દેશના 12મા પ્રથમ મહિલા રાષ્ટ્રપતિ હતા. તેમનો જન્મ 19 ડિસેમ્બર 1934ના રોજ થયો હતો. તેમનો કાર્યકાળ 25 જુલાઈ 2007 થી જુલાઈ 2012 સુધીનો હતો. તે કોંગ્રેસ પાર્ટીના સભ્ય હતા. ભારતના રાષ્ટ્રપતિ બનતા પહેલા પ્રતિભા દેવી સિંહ પાટીલ રાજસ્થાનના 17મા રાજ્યપાલ હતા. તે 8 નવેમ્બર 2004 થી 23 જૂન 2007 સુધી રાજસ્થાનના રાજ્યપાલ હતા. પ્રતિભા સિંહ દેવી પાટીલ 27 વર્ષની વયે 1962માં જલગાંવ વિધાનસભા મતવિસ્તારમાંથી પ્રથમ વખત ધારાસભ્ય તરીકે ચૂંટાયા હતા. 1985માં રાજ્યસભાના સભ્ય બન્યા ત્યાં સુધી તેઓ ધારાસભ્ય હતા. તે 1991 થી 1996 સુધી અમરાવતીથી લોકસભાના સભ્ય પણ હતા. તેમની બે દાયકાથી વધુની રાજકીય કારકિર્દીમાં, પ્રતિભા દેવી સિંહ પાટીલ મહારાષ્ટ્રની રાજ્ય સરકારમાં અનેક મહત્વપૂર્ણ હોદ્દા પર હતા.
આ પણ વાંચો: TMCના સૂત્રોનો દાવો, યશવંત સિંહા રાષ્ટ્રપતિની ચૂંટણીમાં વિપક્ષના સંયુક્ત ઉમેદવાર હશે
રામ નાથ કોવિંદ (1 ઓક્ટોબર 1945-હાલ) : રામનાથ કોવિંદ દેશના 14મા રાષ્ટ્રપતિ છે. તેમનો જન્મ 1 ઓક્ટોબર 1945ના રોજ થયો હતો. તેમણે 25 જુલાઈ 2017ના રોજ દેશના 14મા રાષ્ટ્રપતિ તરીકે શપથ લીધા હતા. તેમનો કાર્યકાળ 25 જુલાઈ, 2022 ના રોજ સમાપ્ત થાય છે. તેઓ ભારતીય જનતા પાર્ટીના સભ્ય હતા. તેઓ 16 ઓગસ્ટ 2015 થી 20 જૂન 2017 સુધી બિહારના 26મા રાજ્યપાલ હતા. તેઓ ઉત્તર પ્રદેશમાંથી ભારતના રાષ્ટ્રપતિ બનનાર પ્રથમ વ્યક્તિ છે. અગાઉ 3 એપ્રિલ 1994થી 2 એપ્રિલ 2006 સુધી તેઓ રાજ્યસભાના સભ્ય રહી ચૂક્યા છે. રાજકારણમાં આવતા પહેલા તેમણે 16 વર્ષ સુધી દિલ્હી હાઈકોર્ટ અને દેશની સુપ્રીમ કોર્ટમાં પ્રેક્ટિસ પણ કરી છે.
