RRR wins Oscar: RRRએ રચ્યો ઈતિહાસ, 'નાટુ-નાટુ' ગીતે જીત્યો ઓસ્કાર એવોર્ડ, સોશિયલ મીડિયા પર મચી ધૂમ

Oscars Awards 2023 : એસએસ રાજામૌલીની ફિલ્મ RRR એ ઓસ્કરમાં ઈતિહાસ રચ્યો છે. ફિલ્મના હિટ ગીત નાટુ-નાટુએ આંતરરાષ્ટ્રીય સ્તરે 7 એવોર્ડ જીત્યા બાદ ઓસ્કાર એવોર્ડ પણ જીત્યો છે.

લોસ એન્જલસઃ ભારત જેની રાહ જોઈ રહ્યું હતું તે જીત પૂરી થઈ ગઈ છે. હા, સાઉથ ફિલ્મ ઈન્ડસ્ટ્રીની મેગા બ્લોકબસ્ટર ફિલ્મ 'RRR'નું હિટ ટ્રેક 'નાટુ-નાટુ' ભારતની અપેક્ષાઓ પર ખરું ઉતર્યું છે અને તેણે ઓસ્કાર એવોર્ડ જીત્યો છે. આ જીતથી સમગ્ર દેશમાં ખુશીની લહેર છે. સોશિયલ મીડિયા પર RRRની ટીમને અભિનંદનનો ધસારો થયો છે. અહીં એસએસ રાજામૌલી, રામ ચરણ અને જુનિયર એનટીઆર સહિતની આખી ટીમ ખુશખુશાલ છે. ઓસ્કાર સમારોહમાં RRRની જીતનો મોટો જશ્ન જોવા મળી રહ્યો છે.

દેશ માટે બીજો ઓસ્કાર: અપેક્ષા મુજબ, ફિલ્મ નિર્દેશક એસએસ રાજામૌલીની ફિલ્મ RRR ના ગીત 'નાટુ-નાટુ'એ દેશ માટે બીજો ઓસ્કાર જીત્યો. તેને 'બેસ્ટ ઓરિજિનલ સોંગ' કેટેગરીમાં ઓસ્કાર એવોર્ડ મળ્યો હતો. તમને જણાવી દઈએ કે 'નાટુ-નાટુ' ભારતના સિનેમા જગતના ફિલ્મ પ્રોડક્શનમાં રચાયેલું પહેલું એવું ગીત છે, જેણે 95માં ઓસ્કરમાં પોતાની સફળતાનો ઝંડો ઊંચક્યો છે. આના થોડા સમય પહેલા જ ભારતની 'ધ એલિફન્ટ વ્હીસ્પર્સ' એ બેસ્ટ ડોક્યુમેન્ટરી શોર્ટ ફિલ્મનો ઓસ્કાર એવોર્ડ જીતીને ભારતની બેગમાં વધુ એક ઓસ્કાર મુક્યો હતો.

સ્ટેજ પર નાટુ-નાટુ ગીત: આ દરમિયાન સ્ટેજ પર નાટુ-નાટુ ગીત રજૂ પણ કરવામાં આવ્યું હતું, જેને શ્રોતાઓએ જોરદાર તાળીઓથી વધાવી હતી. વિશ્વભરમાંથી ઉપસ્થિત કલાકારો તેમજ ત્યાં હાજર પ્રેક્ષકો દ્વારા તેની ખૂબ પ્રશંસા કરવામાં આવી હતી. તમને જણાવી દઈએ કે, ઓસ્કારના સ્ટેજ પર નાટુ-નાટુ ગીત રજૂ કરવામાં આવ્યું હતું, જેને સ્ટેન્ડિંગ ઓવેશન મળ્યું હતું.હવે સોશિયલ મીડિયા પર ઉજવણીનો માહોલ છે અને RRRની ટીમને અભિનંદન આપવામાં આવી રહ્યા છે.

નાટુ નાટુ ગીતને એવોર્ડ: તાજેતરમાં જ ફિલ્મ RRR એ હોલીવુડ ક્રિટીક્સ એસોસિએશન ફિલ્મ એવોર્ડ્સ જીત્યા હતા. જેમાં બેસ્ટ ઈન્ટરનેશનલ ફિલ્મ, બેસ્ટ સોંગ 'નાટુ નાટુ', બેસ્ટ સ્ટંટ, બેસ્ટ એક્શન મૂવી અને HCA સ્પોટલાઈટ એવોર્ડનો સમાવેશ થાય છે. આવી સ્થિતિમાં હવે ગીત 'નાટુ નાટુ' માટે ઓસ્કાર જીતવાની આશા વધી રહી છે. આ ગીતને દુનિયાભરમાં ઘણો પ્રેમ મળ્યો છે.