પટના: બુધવાર તારીખ 4 ઓક્ટોબરે, RJD સુપ્રીમો લાલુ પ્રસાદ યાદવ , ભૂતપૂર્વ મુખ્ય પ્રધાન રાબડી દેવી અને નાયબ મુખ્ય પ્રધાન તેજસ્વી યાદવ સહિત 17 આરોપીઓ રેલવેમાં જમીનના બદલામાં નોકરી આપવાના કેસમાં દિલ્હીની રાઉઝ એવન્યુ કોર્ટમાં હાજર થશે. આ પહેલા સીબીઆઈએ કોર્ટમાં સપ્લીમેન્ટરી ચાર્જશીટ દાખલ કરી હતી. ત્યારબાદ તમામ આરોપીઓને સમન્સ પાઠવવામાં આવ્યા હતા.
કોર્ટનો ચુકાદો: તારીખ 3 જુલાઈ, 2023ના રોજ સીબીઆઈએ નોકરી માટે જમીન કૌભાંડ કેસમાં નવી ચાર્જશીટ દાખલ કરી હતી. આ ચાર્જશીટમાં લાલુ યાદવના નાના પુત્ર અને ડેપ્યુટી સીએમ તેજસ્વી યાદવને પહેલીવાર આરોપી બનાવવામાં આવ્યા છે. કાયદાકીય નિષ્ણાતોનું કહેવું છે કે લાલુ પરિવાર વિરુદ્ધ ચાર્જશીટ પર સુનાવણી થશે. બંને પક્ષો તેમની દલીલો રજૂ કરશે અને ત્યારબાદ કોર્ટ ચુકાદો આપશે. આ પછી બધાને જામીન લેવા પડશે.લાલુ યાદવ યુપીએ સરકારમાં 2004-2009માં રેલ્વે પ્રધાન હતા. લાલુ પર રેલ્વે પ્રધાન હોવા પર જમીનના બદલામાં રેલ્વેમાં ગ્રુપ ડીના ઉમેદવારોને નોકરી આપવાનો આરોપ હતો. લાલુ પ્રસાદ યાદવ સહિત ત્રણ અધિકારીઓ સામે કેસ ચલાવવા માટે કેન્દ્રીય મંત્રાલય તરફથી મંજૂરી મળી ગઈ છે.
ઉમેદવારોના પરિવારો પાસેથી જમીન: સીબીઆઈના જણાવ્યા અનુસાર સાત ઉમેદવારોના પરિવારો પાસેથી જમીન લેવામાં આવી હતી. તેમને રેલવેમાં ગ્રુપ ડીની નોકરી આપવામાં આવી હતી. આરોપ છે કે લાલુ પરિવારે આ તમામ પાસેથી લગભગ 1.05 લાખ ચોરસ ફૂટ જમીન લીધી હતી. આ જમીન ખૂબ જ ઓછી કિંમતે વેચવામાં આવી હતી. આ સાત ઉમેદવારોમાંથી પાંચે લાલુ પરિવારને જમીન વેચી હતી. જ્યારે બે ઉમેદવારોએ જમીન ભેટમાં આપી હતી. પટનાના રહેવાસી કિશુન દેવ, રાજ કુમાર, અજય કુમાર અને મિથિલેશ કુમારનો સમાવેશ થાય છે, જેમને મુંબઈમાં ગ્રુપ ડીમાં નોકરી મળી હતી. તેવી જ રીતે જમીનના બદલામાં અલગ-અલગ શહેરોમાં નોકરી મેળવનાર વધુ બે લોકો સાથે ડીલ કરવામાં આવી હતી.
તેજસ્વી યાદવ પર શું છે આરોપ? : સીબીઆઈના જણાવ્યા અનુસાર, વર્ષ 2007માં એક જમીન ખરીદવામાં આવી હતી, જમીનની કિંમત લગભગ 10.83 લાખ રૂપિયા હતી. બીજી જમીન ખરીદી હતી, બંને જમીન એકે ઈન્ફોસિસ્ટમના નામે લેવામાં આવી હતી. પરંતુ થોડા સમય બાદ આ બંને જમીનની માલિકી માત્ર એક લાખમાં તેજસ્વી અને રાબડી દેવીના નામે ટ્રાન્સફર થઈ ગઈ હતી. જ્યારે જમીનનો બજાર ભાવ ઘણો વધારે હતો.
