મધ્ય પ્રદેશમાં સરકારી માન્યતા પ્રાપ્ત પત્રકારોને ફ્રન્ટલાઈન વોરિયર્સ ગણવામાં આવશે

મધ્ય પ્રદેશ સરકારે જનસંપર્ક વિભાગ પાસેથી અધિમાન્યતા પ્રાપ્ત પત્રકારોને ફ્રન્ટલાઈન વોરિયર્સની શ્રેણીમાં શામેલ કર્યા છે.

• મધ્ય પ્રદેશના મુખ્ય પ્રધાન શિવરાજ સિંહ ચૌહાણે કરી જાહેરાત
• સરકારી માન્યતા ધરાવતા પત્રકારો હવે ફ્રન્ટલાઈન વોરિયર્સ
• તમામ લાભો અને ફાયદાઓ આપવામાં આવશે

ભોપાલ: વૈશ્વિક કોરોના મહામારીમાં એક તરફ સમગ્ર દુનિયા પોતાના ઘરોમાં બંધ થઈ ગઈ છે. જ્યારે બીજી બાજુ કોરોના વોરિયર્સ તમામ લોકોની સુરક્ષા માટે ખુદને આગળ લાવી રહ્યા છે. જોકે, ખુશીની વાત એ છે કે, મધ્ય પ્રદેશમાં હવે પત્રકારોને પણ ફ્રન્ટલાઈન વર્કર્સ તરીકે માનવામાં આવશે.

પત્રકારો જીવને જોખમમાં બજાવી રહ્યા છે ફરજ

મધ્ય પ્રદેશના મુખ્યપ્રધાન શિવરાજ સિંહ ચૌહાણે જણાવ્યું હતું કે, પત્રકારો કોરોનાના આ કપરા સમયમાં પોતાનો જીવ જોખમમાં મૂકીને કામ કરી રહ્યા છે. જેના માટે સરકારે જનસંપર્ક વિભાગ પાસેથી અધિમાન્યતા પ્રાપ્ત પત્રકારોને ફ્રન્ટલાઈન વોરિયર્સની શ્રેણીમાં શામેલ કર્યા છે. હવે તેમનું સંપૂર્ણપણે ધ્યાન પણ રાખવામાં આવશે અને તેમની ચિંતા પણ કરવામાં આવશે.

પત્રકારોને મળશે રાહત

સ્વાસ્થ્ય કર્મીઓ, પોલીસ અને બીજા અન્ય વિભાગોના કર્મચારીઓની જેમ પત્રકારોને પણ ઘણા લાંબા સમયથી ફ્રન્ટલાઈન વોરિયર્સ તરીકે ઘોષિત કરવાની માગ ઉઠી હતી. થોડા દિવસો અગાઉ પૂર્વ મુખ્યપ્રધાન કમલનાથે ટ્વીટ કરીને આ અંગે માગ કરી હતી. જ્યારબાદ મુખ્યપ્રધાને પત્રકારોને ફ્રન્ટલાઈન વોરિયર્સ ઘોષિત કર્યા હતા.

પૂર્વ મુખ્યપ્રધાન કમલનાથે કર્યું ટ્વીટ

મુખ્યપ્રધાન શિવરાજ સિંહ ચૌહાણની જાહેરાત બાદ પૂર્વ મુખ્યપ્રધાન કમલનાથે ફરી એક વખત ટ્વીટ કરીને કહ્યું કે, "સરકારી માન્યતા ધરાવતા પત્રકારોને ફ્રન્ટલાઈન વોરિયર્સ તરીકે જાહેર કરવામાં આવ્યા છે. મારુ માનવું છે કે, ફિલ્ડમાં કામ કરનારા મોટાભાગના પત્રકારો પાસે માન્યતા નથી. આ લોકો કોરોનાકાળમાં રોજ ફિલ્ડમાં રહીને પોતાનો જીવ જોખમમાં મૂકીને કામ કરી રહ્યા છે."