ભુવનેશ્વર: FIH મેન્સ હોકી વર્લ્ડ કપ ચેમ્પિયનશિપ આજે ભુવનેશ્વરના કલિંગા સ્ટેડિયમ અને ઓડિશાના રાઉરકેલામાં નવનિર્મિત બિરસા મુંડા ઇન્ટરનેશનલ હોકી સ્ટેડિયમ ખાતે શરૂ થવાની તૈયારીમાં છે. આર્જેન્ટિના અને દક્ષિણ આફ્રિકા વચ્ચે ટૂર્નામેન્ટની પ્રથમ મેચ ભુવનેશ્વરના કલિંગા સ્ટેડિયમમાં રમાશે.
ભારતની ટીમ સજ્જ: હરમનપ્રીત સિંહની આગેવાની હેઠળની ભારતીય હોકી ટીમ આજે રાઉરકેલા ખાતે ગ્રુપ ડીની પોતાની શરૂઆતની રમતમાં સ્પેન સામે મેદાનમાં ઉતરશે. ભારત Vs સ્પેન હોકી વર્લ્ડ કપ ગ્રુપ Dની રમત સાંજે 7:00 વાગ્યે ઓડિશાના રાઉરકેલાના બિરસા મુંડા ઇન્ટરનેશનલ હોકી સ્ટેડિયમમાં થશે. 13 જાન્યુઆરીએ સ્પેન સામે તેમના અભિયાનની શરૂઆત કર્યા પછી, મેન ઇન બ્લુ 15 જાન્યુઆરીએ ઇંગ્લેન્ડ અને 19 જાન્યુઆરીએ વેલ્સ સામે ટકરાશે.
કુલ 16 ટીમ લઇ રહી છે ભાગ: વર્લ્ડ કપની 15મી આવૃત્તિમાં કુલ 16 ટીમો ભાગ લઈ રહી છે. 44 મેચો રમાશે જેમાંથી 20 મેચ રાઉરકેલામાં રમાશે અને 24 મેચ ભુવનેશ્વરના કલિંગા સ્ટેડિયમમાં રમાશે. ઓડિશા સતત બીજી વખત વર્લ્ડ કપનું આયોજન કરી રહ્યું છે. ભારત 2018માં પણ વર્લ્ડ કપનું યજમાન. ભારત અને સ્પેન વચ્ચે 1948થી હોકી મેચ રમાઈ રહી છે. 1973 સુધી ભારતે 4માંથી 3 મેચમાં સ્પેનને હરાવ્યું અને એક ડ્રો ગઈ, પરંતુ 1973 પછી સ્પેને જોરદાર પરત ફર્યું. 1978થી રમાયેલી 26 મેચમાંથી 10માં ભારતની તરફેણમાં પરિણામ આવ્યું છે. જ્યારે સ્પેને 11 જીત મેળવી છે. આ દરમિયાન બંને ટીમે રમેલી મેચમાંથી 5 મેચ ડ્રો ગઈ છે.
આ પણ વાંચો Hockey World Cup Opening Ceremony: હોકીના મહાકુંભની રંગારંગ શરૂઆત, આ સ્ટાર્સ મચાવશે ધૂમ
વર્લ્ડ કપમાં સ્પેનનો દબદબો: હોકી વર્લ્ડ કપમાં બંને ટીમ વચ્ચે 6 મેચ રમાઈ હતી, જેમાંથી સ્પેને 3 અને ભારતે 2માં જીત મેળવી છે. એક મેચ ડ્રો રહી હતી. બંને વચ્ચે વર્લ્ડ કપમાં છેલ્લી મેચ 2014માં રમાઈ હતી, જે 1-1થી ડ્રો રહી હતી.
આ પણ વાંચો Hockey World Cup 2023: ઓપનિંગ સેરેમનીમાં લોકોએ સ્ટાર્સ સાથે ડાન્સ કર્યો
લોકોમાં ભારે ઉત્સાહ: રાઉરકેલા ખાતે ભારત-સ્પેન મેચ પહેલાં ગુરુવારે રાત્રે ભીડ ખૂબ ઉત્સાહમાં હતી. ઘણા ચાહકો તેમના ખેલાડીઓને પ્રેક્ટિસ કરતા જોવા માટે સ્ટેડિયમ પહોંચ્યા હતા. સ્ટેડિયમની બહાર પહોંચેલા અનિલ કુમારે કહ્યું હતું કે અમે વર્લ્ડ કપને લઈને ખૂબ જ ઉત્સાહિત છીએ. તેણે ટીમ ઈન્ડિયાને સપોર્ટ કરવા માટે મેચની ટિકિટ ખરીદી છે.
