નવી દિલ્હી: એક તરફ ભારતીય નૌસેનાએ અરબી સમુદ્રમાં વિદેશી જહાજને હાઇજેક કરવાનો પ્રયાસ નિષ્ફળ બનાવ્યો હતો, તો બીજી તરફ સોમાલિયાના દરિયાકાંઠાની નજીક ચાંચિયાઓએ એક માલવાહક જહાજનું હાઇજેક કર્યું હતું. કાર્ગો જહાજની ઓળખ 'એમવી લીલા નોરફોક' તરીકે કરવામાં આવી છે. ગુરુવારે મોડી સાંજે સોમાલિયાના દરિયાકાંઠા નજીક તેનું અપહરણ કરવામાં આવ્યું હતું. ભારતીય નૌકાદળ તેના પર ચાંપતી નજર રાખી રહ્યું છે. સેનાએ એમવી લીલા નોરફોક તરફ ક્રુઝર આઈએનએસ મોકલ્યું છે. જેમની પાસે આવા મામલાઓને હેન્ડલ કરવામાં કુશળતા છે. મળતી માહિતી મુજબ, અપહરણ કરાયેલા કાર્ગો જહાજમાં 15 ભારતીયો સવાર હતા. આ જહાજના ક્રૂ સાથે સંપર્ક સ્થાપિત કરવામાં આવ્યો છે.
સૈન્ય અધિકારીઓના જણાવ્યા અનુસાર, ગુરુવારે સાંજે સોમાલિયાના દરિયાકાંઠે જહાજના અપહરણની માહિતી મળી હતી. ભારતીય નૌકાદળના વિમાનો જહાજ પર નજર રાખી રહ્યા છે. તેમજ ભારતીય નૌકાદળનું ક્રૂઝર INS ચેન્નાઈ પરિસ્થિતિનો સામનો કરવા માટે અપહરણ કરાયેલા જહાજ તરફ આગળ વધી રહ્યું છે.
ભારતીય નૌકાદળના નિવેદનમાં કહેવામાં આવ્યું છે કે જહાજે યુનાઇટેડ કિંગડમ મેરીટાઇમ ટ્રેડ ઓપરેશન્સ પોર્ટલને સંદેશ મોકલ્યો હતો. એવું કહેવાય છે કે 4 જાન્યુઆરીની સાંજે પાંચથી છ અજાણ્યા હુમલાખોરો વહાણમાં ચઢી ગયા હતા. નિવેદનમાં જણાવાયું છે કે ભારતીય ક્રુઝર INS ચેન્નાઈને ડાયવર્ટ કરવામાં આવ્યું હતું અને જહાજની મદદ માટે તૈનાત કરવામાં આવ્યું હતું.
નૌકાદળના એક વિમાને શુક્રવારે હાઇજેક કરાયેલા જહાજ ઉપરથી ઉડાન ભરી અને તેની સાથે સંપર્ક સ્થાપિત કર્યો. નૌકાદળના એક અધિકારીએ ન્યૂઝ એજન્સીને જણાવ્યું કે, નેવીના વિમાન હિલચાલ પર નજર રાખી રહ્યા છે. INS ચેન્નાઈ સહાય પૂરી પાડવા માટે જહાજને ઘેરી લેવાનો પ્રયાસ કરી રહી છે.
સેના દ્વારા જારી કરવામાં આવેલા નિવેદનમાં કહેવામાં આવ્યું છે કે વિસ્તારની અન્ય એજન્સીઓ સાથે સંકલન કરીને સમગ્ર પરિસ્થિતિ પર નજીકથી નજર રાખવામાં આવી રહી છે. ભારતીય નૌકાદળ આંતરરાષ્ટ્રીય ભાગીદારો અને મિત્ર દેશો સાથે આ ક્ષેત્રમાં વેપારી શિપિંગની સુરક્ષા સુનિશ્ચિત કરવા માટે પ્રતિબદ્ધ છે. આ ક્ષેત્રમાં થયેલા તાજેતરના હુમલા બાદ ભારતીય નૌકાદળે અરબી સમુદ્રમાં તેની દેખરેખ વધારી દીધી છે.
