મુંબઈ (મહારાષ્ટ્ર): બોમ્બે હાઈકોર્ટે શુક્રવારે ભીમા કોરેગાંવ કેસમાં આનંદ તેલતુમ્બડેને જામીન આપ્યા છે. એક લાખ રૂપિયાના બોન્ડ પર તેલતુમ્બડેને આ જામીન આપવામાં આવ્યા છે. સુપ્રીમ કોર્ટમાં અપીલ કરવાની નેશનલ ઈન્વેસ્ટિગેશન એજન્સીની વિનંતી પર કોર્ટે એક સપ્તાહ માટે આદેશ પર સ્ટે આપ્યો હતો. (Bombay High Court grants bail to Bhima Koregaon)1 જાન્યુઆરી, 2018ના રોજ, ભીમા-કોરેગાંવ યુદ્ધના 200 વર્ષ પૂરા થવા પર આયોજિત એક કાર્યક્રમમાં હિંસા ફાટી નીકળી હતી. જેમાં એકનું મોત થયું હતું અને 10 પોલીસકર્મીઓ સહિત ઘણા લોકો ઈજાગ્રસ્ત થયા હતા. ભીમા-કોરેગાંવ અથડામણ બાદ જાન્યુઆરીમાં રાજ્યવ્યાપી બંધ દરમિયાન, પોલીસે 162 લોકો સામે 58 કેસ નોંધ્યા હતા.
નજરકેદ કરવાની મંજૂરી: આ પહેલા સુપ્રીમ કોર્ટે આ કેસમાં 82 વર્ષીય સામાજિક કાર્યકર પી વરવરા રાવને જામીન આપ્યા હતા. સુપ્રીમ કોર્ટે ગુરુવારે એક વચગાળાના આદેશમાં ભીમા કોરેગાંવના અન્ય આરોપી ગૌતમ નવલખાને તેમની તબિયત અને વૃદ્ધાવસ્થાને ધ્યાનમાં રાખીને એક મહિના માટે નજરકેદ કરવાની મંજૂરી આપી હતી. જસ્ટિસ કેએમ જોસેફ અને હૃષિકેશ રોયની બેન્ચે નવલખાને જ્યારે તેઓ નજરકેદમાં હોય ત્યારે તેમના સુરક્ષા કવચના ખર્ચ તરીકે રૂ. 2.4 લાખ જમા કરાવવાનો આદેશ આપ્યો હતો.
2.4 લાખનો ડિમાન્ડ ડ્રાફ્ટ : તેણે પોલીસ કમિશનર, નવી મુંબઈની તરફેણમાં રૂપિયા 2.4 લાખનો ડિમાન્ડ ડ્રાફ્ટ સબમિટ કરવાનો રહેશે. બેન્ચે સુનાવણી દરમિયાન કહ્યું હતું કે, તેમની ઉંમરને જોતા અમે તેમને નજરકેદ કરવા યોગ્ય માનીએ છીએ. નવલખાએ સુપ્રીમ કોર્ટમાં અરજી કરી હતી કે મહારાષ્ટ્રની તલોજા જેલમાં ન્યાયિક કસ્ટડીને બદલે તેને નજરકેદમાં રાખવામાં આવે.
