- પાર્ટીના બિહાર એકમે ચૂંટણી દરમિયાન કુલ 28 કરોડ રૂપિયા ખર્ચ કર્યા હતા
- ચાર્ટર્ડ પ્લેન પર રૂપિયા 24.07 કરોડનો ખર્ચ કરવામાં આવ્યો હતો
- કોઈપણ રાજકીય પક્ષ દ્વારા કરવામાં આવતા ખર્ચની કોઈ મર્યાદા નથી
ન્યુ દિલ્હી: બીજેપીએ વર્ષ 2020માં બિહાર વિધાનસભાની ચૂંટણીમાં તેના કેન્દ્રિય મુખ્યાલયના ખાતામાંથી આશરે રૂપિયા 26.7કરોડ ખર્ચ કર્યા હતા, જેમાં પાર્ટી અધ્યક્ષ જે પી નડ્ડા, રાજનાથ સિંહ અને યોગી આદિત્યનાથ જેવા સ્ટાર પ્રચારકોની મુલાકાત લેવા માટે ચાર્ટર્ડ પ્લેન પર રૂપિયા 24.07 કરોડનો ખર્ચ કરવામાં આવ્યો હતો.
આ પણ વાંચોઃ બિહારની ચૂંટણી માટે ભાજપે 27 ઉમેદવારોના નામની પ્રથમ યાદી કરી જાહેર
ઉમેદવારોને આર્થિક સહાય તરીકે 16.5 કરોડ ખર્ચ કર્યા હતા
ચૂંટણી પંચને સુપરત કરવામાં આવેલા ખર્ચ અંગે ભાજપ દ્વારા અપાયેલા નિવેદનમાં કહેવામાં આવ્યું છે કે, પાર્ટીના બિહાર એકમે ચૂંટણી દરમિયાન કુલ 28 કરોડ રૂપિયા ખર્ચ કર્યા હતા, જ્યારે ઉમેદવારોને આર્થિક સહાય તરીકે 16.5 કરોડ ખર્ચ કર્યા હતા.
પક્ષના તમામ ઉમેદવારોને 15-15 લાખ રૂપિયા આપવામાં આવ્યા હતા
આ મુજબ પક્ષના તમામ ઉમેદવારોને 15-15 લાખ રૂપિયા આપવામાં આવ્યા હતા. ચુંટણીની ઘોષણાથી માંડીને સમાપ્તિ સુધી પાર્ટીના કેન્દ્રીય મુખ્યાલય અને રાજ્ય એકમ દ્વારા કરવામાં આવતો સમગ્ર ખર્ચ લગભગ 71.73 કરોડ જેટલા થાય છે, જ્યારે આ સમયગાળા દરમિયાન કુલ સ્વીકૃતિ આશરે 35.83 કરોડ રહી હતી.
ચૂંટણી બાદ બાકીની થાપણ 2279.96 કરોડ રૂપિયા હતી
ચૂંટણીની જાહેરાત પૂર્વે પાર્ટીના કેન્દ્રીય મુખ્યાલય અને રાજ્ય એકમના ખાતામાં પ્રારંભિક થાપણની રકમ રૂપિયા 2376.90 કરોડ હતી અને ચૂંટણી બાદ બાકીની થાપણ 2279.96 કરોડ રૂપિયા હતી. પક્ષે માર્ચ મહિનામાં ખર્ચની આ વિગતો જમા કરી હતી, જે શુક્રવારે આયોગે જાહેર કરી હતી.
45.6 લાખ રૂપિયા અન્ય નેતાઓની ટ્રેન અને ટેક્સીના પ્રવાસ પાછળ ખર્ચવામાં આવ્યા હતા
ભાજપના રાજ્ય એકમ સુશીલ કુમાર મોદી, દેવેન્દ્ર ફડણવીસ અને શાહનવાઝ હુસેન જેવા સ્ટાર પ્રચારકો માટે વિમાન અને ટેક્સીઓના ઉપયોગ પર 1.5 કરોડ રૂપિયા ખર્ચ કર્યા છે. 45.6 લાખ રૂપિયા અન્ય નેતાઓની ટ્રેન અને ટેક્સીના પ્રવાસ પાછળ ખર્ચવામાં આવ્યા હતા.
આ પણ વાંચોઃ બિહારની ચૂંટણી: નિર્મલા સીતારમણે આજે ભાજપનો મેનિફેસ્ટો જાહેર કર્યો
ગૂગલ ઈન્ડિયાને આપવામાં આવેલા 1.59 કરોડ રૂપિયા પણ શામેલ છે
બિહારના એકમે મીડિયાના વિવિધ માધ્યમો દ્વારા જાહેરાતો માટે રૂપિયા 16 કરોડથી વધુનો ખર્ચ કર્યો છે, જેમાં ગૂગલ ઈન્ડિયાને આપવામાં આવેલા 1.59 કરોડ રૂપિયા પણ શામેલ છે. આયોગ દ્વારા નિર્ધારિત મર્યાદા અનુસાર, બિહાર જેવા રાજ્યમાં ઉમેદવાર વિધાનસભાની ચૂંટણીમાં 30.8 લાખ રૂપિયા સુધીનો ખર્ચ કરી શકે છે. જો કે, કોઈપણ રાજકીય પક્ષ દ્વારા કરવામાં આવતા ખર્ચની કોઈ મર્યાદા નથી.
