નવી દિલ્હીઃ સુપ્રીમ કોર્ટે શુક્રવારે ઓટોમોબાઈલ ડિલરોના એક સંગઠનની અરજી નકારી કાઢી છે. આ અરજી BS-4 એન્જિન ધરાવતા વાહનોના વેચાણના સમય મર્યાદામાં વધારો કરવા બાબતે હતી. આ સમય મર્યાદા 1 એપ્રિલ, 2020 સુધીની છે.
કેન્દ્ર સરકારે 2016માં જાહેરાત કરી હતી કે, ભારત 2020માં BS-4 બાદ સીધુ BS-6 ધોરણ લાગુ કરશે. 1 એપ્રિલ, 2020 બાદ ભારતમાં BS-4 એન્જિન ધરાવતા વાહનોનું વેચાણ કે રજીસ્ટ્રેશન ન કરવા સુપ્રીમ કોર્ટે 24, ઓક્ટોબર, 2018ના રોજ આદેશ કર્યો હતો.
ઉલ્લેખનીય છે કે, ભારત સ્ટેજ એક પ્રદૂષણ નિયંત્રણ ધોરણ છે. જેને ભારત સરકારે મોટર વાહનો દ્વારા થતા પ્રદૂષણ રોકવા માટે આ ધોરણ લાગુ કર્યું છે. ભારત સ્ટેજ-4 ધોરણ એપ્રીલ, 2017માં સમગ્ર ભારતમાં લાગુ કરવામાં આવ્યું હતું.
