આવી રીતે ચૂંટણી લડતા પરિવારમાં સૌથી હાઈ પ્રોફાઈલ મુંડે પરિવાર છે. આ પરિવારમાંથી બે સભ્યો એક જ સીટ પર એકબીજાની સામ-સામે ચૂંટણી લડી રહ્યા છે. બીડ વિધાનસભામાંથી લડી રહેલા આ બંને ઉમેદવારોની ટક્કર થશે. આ સીટ દિવંગત નેતા અને પૂર્વ કેન્દ્રીય પ્રધાન ગોપીનાથ મુંડેનો ગઢ છે.
તેમની દિકરી અને ગ્રામિણ વિકાસ પ્રધાન પંકજા મુંડે પરલી સીટ પરથી ભાજપમાંથી ચૂંટણી લડી રહ્યા છે. પંકજાની સામે તેમના કાકાના દિકરા વિધાન પરિષદમાં વિપક્ષના નેતા એમએલસી ધનંજય મુંડે છે. તેઓ એનસીપીના ઉમેદવાર છે. આપને જણાવી દઈએ કે, 2014માં પંકજા ધનંજયને હરાવી ચૂક્યા છે.
બીજી સીટ બીડ જિલ્લામાં બીડ વિધાનસભા વિસ્તારમાં છે. અહીં પણ કાકા-ભત્રીજા એક બીજાની સામે ટક્કર આપી રહ્યા છે. આ સીટ પરથી જયદત્ત ક્ષીરસાગર પોતાના ભત્રીજા સંદીપ ક્ષીરસાગર વિરુદ્ધ ચૂંટણી મેદાનમાં છે.
ગેવરાઈમાં પણ એક પંડિત પરિવાર સાથે સંબંધ ધરાવતા કાકા-ભત્રીજા એક બીજાની વિરુદ્ધ ચૂંટણી લડી રહ્યા છે. એનસીપીએ અમરસિંહ પંડિતને મેદાનમાં ઉતાર્યા છે. જ્યારે તેમના કાકા બાદામરાવ પંડિત અપક્ષમાંથી ચૂંટણી લડી રહ્યા છે.
લાતૂરમાં નિલંગા સીટ પર એક જ પરિવારના સભ્યો લડાઈ લડી રહ્યા છે. અહીં પૂર્વ મુખ્યપ્રધાન શિવાજીરાવ નિલંગેકર પાટિલના દિકરા અશોક નિલંગેકર પાટિલ કોંગ્રેસની ટિકિટ પર પોતાના ભત્રીજા અને રાજ્ય પ્રધાન સંભાજીરાવ નિલંગેકર પાટિલ વિરુદ્ધ ચૂંટણી લડી રહ્યા છે. સંભાજીરાવ ભાજપના ઉમેદવાર છે.
તેમની સાથે નક્સલ પ્રભાવિત ગઢચિરૌલી જિલ્લામાં એનસીપીના ધર્મરાવ બાબા અત્રમ અને તેમના ભત્રીજા અને પ્રધાન અંબરીશરાવ અત્રમ (ભાજપ)ની વચ્ચે ચૂંટણીમાં ટક્કર થશે.
પુસદ(યવતમાલ)માં દિવંગત વસંતરાવ નાઈકના પૌત્ર ઈન્દ્રનીલ નાઈક કોંગ્રેસ તરફથી અને ભત્રીજા નિલય નાઈક ભાજપ તરફથી ચૂંટણી લડી રહ્યા છે.
આ ઉપરાંત મહારાષ્ટ્રના લાતૂર જિલ્લામાં પૂર્વ મુખ્યપ્રધાન વિલાસરાવ દેશમુખના બંને દિકરા અમિત અને ધીરજ કોંગ્રેસની ટિકિટ પરથી ચૂંટણી લડી રહ્યા છે. બંને ભાઈઓની સીટ એકબીજાથી અલગ થઈ છે. લાતૂર શહેરમાંથી અમિત અને ધીરજ લાતૂર ગ્રામિણમાંથી પહેલી ચૂંટણી મેદાનમાં ઉતર્યા છે. આ બંને નેતા બોલીવૂડ અભિનેતા રિતેશ દેશમુખના ભાઈ છે. રિતેશ પણ બંને ભાઈઓ માટે પ્રચારમાં જોડાઈ ગયો છે.
