બેંગલુરુ: NIAએ ઇસ્લામિક રાજ્ય ખુરાસાન પ્રાંત(આઈએસકેપી) કેસમાં ડો.અબ્દુલ રહેમાનની ધરપકડ કરી છે. ડો.રહેમાનની બેંગલુરુના બસાવનગુડીથી ધરપકડ કરવામાં આવી હતી. અબ્દુલ રહેમાન એમએસ રામૈયા મેડિકલ કોલેજમાં નેત્ર ચિકિત્સક તરીકે કામ કરતો હતો.
દિલ્હી પોલીસના સ્પેશિયલ સેલ દ્વારા માર્ચ 2020માં દિલ્હીના જામલા નગર, ઓખલા વિહારથી કાશ્મીરી દંપતી જહાંજૈબ સામી વાની અને તેની પત્ની હિના બશીર બેગની ધરપકડ બાદ દિલ્હી પોલીસના વિશેષ સેલ દ્વારા કેસ નોંધવામાં આવ્યો હતો. આ દંપતી આઈએસઆઈએસ (ઈસ્લામિક સ્ટેટનું ખોરાસન મોડ્યુલ) સાથે સંકળાયેલું હતું અને તે દેશ વિરોધી પ્રવૃત્તિઓમાં સામેલ હોવાનું જાણવા મળ્યું હતું.
આ દંપતી અબ્દુલ્લા બસીથ સાથે પણ સંપર્કમાં હતું. જે પહેલાથી જ આઈએસઆઈએસ અબુધાબી મોડ્યુલ કેસમાં તિહાર જેલમાં બંધ છે. એનઆઈએ આ મામલે તપાસ કરી રહી છે. પૂછપરછ દરમિયાન ધરપકડ કરાયેલા આરોપી અબ્દુલ રહેમાને કબૂલાત કરી છે કે, તે આરોપી જહાંજૈબ સામી અને સીરિયા સ્થિત અન્ય આઇએસઆઈએસ ઓપરેટરો સાથે આઇએસઆઇએસની ગતિવિધિઓ આગળ વધારવા સલામત મેસેજિંગ પ્લેટફોર્મ પર કાવતરું ઘડી રહ્યો હતો. તે સંઘર્ષના વિસ્તારોમાં ઘાયલ આઈએસઆઈએસ કેડરની મદદ માટે તબીબી એપ્લિકેશન તેમજ આઇએસઆઈએસ લોકોના લાભ માટે શસ્ત્ર સંબંધિત એપ્લિકેશન પણ વિકસાવી રહ્યો હતો. આઈએસઆઈએસના આતંકવાદીઓની સારવાર માટે અબ્દુલ રહેમાન 2014માં સીરિયાના મેડિકલ કેમ્પમાં ગયો હતો. તે ત્યાં 10 દિવસ રોકાઈને ભારત પરત આવ્યો હતો.
અબ્દુલ રહેમાનની ધરપકડ કર્યા પછી, NIAએ કર્ણાટક પોલીસે સાથે મળીને બેંગલુરુમાં ત્રણ સ્થળોની તલાશી લીધી હતી. જ્યાંથી કેટલાક ડિજિટલ ઉપકરણો, મોબાઇલ ફોન, લેપટોપ કબજે કરવામાં આવ્યા હતા. પકડાયેલા આરોપીને નવી દિલ્હીની સ્પેશિયલ એનઆઈએ કોર્ટમાં રજૂ કરવામાં આવશે. અગાઉ એનઆઈએએ વધુ બે આરોપીઓ સાદિયા અનવર શેખ અને નબિલ સિદ્દીકી ખત્રીની ધરપકડ કરી હતી. બંને આરોપીઓએ ભારતમાં આઈએસઆઈએસ / આઈએસકેપી પ્રવૃત્તિઓ કરવા અને નાગરિકતા સુધારણા અધિનિયમ (સીએએ)ના વિરોધમાં, તેમજ વિરોધ પ્રદર્શનની વિરુદ્ધમાં વિધ્વંસક પ્રવૃત્તિઓ ઘડવાનું કાવતરું ઘડ્યું હતું.
