નવી દિલ્હી: ગૃહપ્રધાન અમિત શાહે એક ન્યૂઝ એજન્સી સાથે વાતચીત દરમિયાન આપેલું નિવેદનએ ચર્ચાનું કેન્દ્ર બન્યું હતું. કોરોનાને ધ્યાનમાં રાખી દિલ્હીની પરિસ્થિતિ અંગે કેન્દ્રની ભૂમિકાનો ઉલ્લેખ કરતાં અમિત શાહે મનીષ સિસોદિયાના નિવેદનોનો ઉલ્લેખ કર્યો, જેમાં તેમણે કહ્યું હતું કે, જુલાઈના અંત સુધીમાં કોરોનાના સાડા પાંચ લાખ કેસ થશે.
અમિત શાહે કહ્યું કે, નાયબ મુખ્યપ્રધાન મનીષ સિસોદિયાના આ નિવેદનથી દિલ્હીની જનતા ડરી હતી, પરંતુ અમે તેમના માટે ચિંતિત હતા. ગૃહપ્રધાનના આ નિવેદન અંગે નાયબ મુખ્યપ્રધાન મનીષ સિસોદિયાની પ્રતિક્રિયા આપતા કહ્યું કે, અમારા મુખ્યપ્રધાન અરવિંદ કેજરીવાલે દિલ્હીમાં કોરોના સામેની લડત લડવા તમામ એજન્સીઓ પાસે મદદ અને સહકાર માગ્યા હતા.
સિસોદિયાએ કહ્યું કે, કેન્દ્ર સરકાર, ધાર્મિક સંગઠનો, રાધા સ્વામી સત્સંગ, અક્ષરધામ મંદિર ટ્રસ્ટ, તિરૂપતિ, વિવિધ હોટલો, બેંકવેટ હોલ, ખાનગી હોસ્પિટલો અને ડોક્ટર વગેરે જેવા બિન સરકારી સંગઠનોથી ઘણું સમર્થન મળ્યું છે. તેમણે કહ્યું કે જૂનના પહેલા અઠવાડિયામાં કોરોના કેસમાં અચાનક વધારો થયો હતો. ત્યારબાદ ખબર પડી કે, બેડ અને તપાસની વ્યવસ્થા ન હતી. મુખ્યપ્રધાનએ તરત જ કોરોના દર્દીઓ માટેની કેટલીક મોટી હોસ્પિટલોમાં 40 ટકા બેડ સુરક્ષિત કરવાનાં પગલાં લીધાં અને જીટીબી જેવી મોટી હોસ્પિટલોને કોવિડ હોસ્પિટલ જાહેર કરી હતી.
આ ઉપરાંત, હોટલને હોસ્પિટલમાં ફેરવવામાં આવી હતી અને બેડની અછતને જોતા આ હોટલમાં 3,500 જેટલા બેડ તૈયાર કરાયા હતા. દિલ્હીમાં આજે બેડની અછત નથી. તપાસનો વિસ્તાર વધારતા અમે કેન્દ્ર સરકારની મદદ માગી અને તેઓએ ઝડપી પરીક્ષણો કરવા કિટ આપીને અમારી મદદ કરી. ત્યારથી, પરીક્ષણમાં 4 ગણો વધારો થયો છે. કેન્દ્ર સરકારે અમને ઓક્સિજન સિલિન્ડર પણ આપ્યા છે. રાધા સ્વામી કોવિડ સેન્ટર માટે આઇટીબીપીના ડોકટર અને નર્સ પણ ફાળવવામાં આવ્યા અને નિષ્ણાંતો દ્વારા માર્ગદર્શન પણ આપ્યું.
નાયબ મુખ્યપ્રધાને એમ પણ કહ્યું કે, મુખ્યપ્રધાન માને છે કે, કોરોના સામેની લડાઈ ખૂબ મોટી છે અને કોઈ પણ વ્યક્તિ અથવા એજન્સી તેની સાથે એકલા લડી શકે નહીં. આ ભાવનાથી મુખ્યપ્રધાન દરેકને સાથે રાખવા માગે છે અને આવા પ્રયાસોને પણ સફળતા મળી રહી છે. રિકવરી રેટનો ઉલ્લેખ કરતાં સિસોદિયાએ કહ્યું છે કે, તે વધીને 62 ટકા થઈ ગયો છે અને આજે સ્વસ્થ થતા દર્દીઓની સંખ્યા દિલ્હીમાં બીમાર લોકો કરતાં વધારે છે. મૃત્યુની સંખ્યામાં ઘટાડો થઈ રહ્યો છે અને એક્ટિવ કેસનો દર ઝડપથી ઘટી રહ્યો છે.
