વારાણસીના યુવાને બનાવેલી "લિપસ્ટીક ગન" મહિલાઓની સુરક્ષા માટે બનશે સંકટમોચન

વારાણસી: મહિલાઓ માટેના સોંદર્ય પ્રસાધનોમાં લિપસ્ટીકનું એક ખાસ સ્થાન છે. દુનિયામાં ભાગ્યે જ કોઇ એવી સ્ત્રી હશે જેણે લિપસ્ટીકનો ઉપયોગ ન કર્યો હોય. પરંતુ સોંદર્યવર્ધન માટે વપરાતી આ વસ્તુ એક હથિયારનું કામ પણ કરી શકે છે તે સાબિત કરી બતાવ્યું છે વારાણસીના શ્યામ ચૌરસિયાએ. કાશીના આ વૈજ્ઞાનિકે લિપસ્ટિક દ્વારા એક અનોખું ડિવાઇસ તૈયાર કર્યું છે, જેમાથી બંદૂકની જેમ ગોળી પણ છૂટશે અને પોલીસને પણ ફોન થઇ શકશે. આવો જાણીએ તેની વિશેષતા.

આ લિપસ્ટિક ગન વિશે માહિતી આપતા યુવા વૈજ્ઞાનિક શ્યામ ચૌરસિયા કહે છે કે, આ યંત્રને ખાસ કરીને મહિલાઓ માટેના સલામતીના સાધન તરીકે વિકસાવવામાં આવ્યું છે. જેનાથી મહિલાઓને પોતાનું રક્ષણ કરી શકશે. તેની વિશેષતા એ છે કે, તેની અંદર એક બંદૂક છે, તેમ જ કોલિંગ સિસ્ટમ પણ છે. જેની ચાંપ દબાવવાથી 112 પોલીસને એકસાથે મદદ માટે ફોન જતો રહેશે. આ માટે તેમણે પોતાના મોબાઇલમાં લાસ્ટ ડાયલ તરીકે 112 નંબર લગાવી રાખવાનો રહેશે. ત્યારબાદ આ યંત્ર પરની ચાંપ દબાવતા ફોનની લોક સ્ક્રીનમાંથી સીધા પોલીસ કંટ્રોલરૂમને કોલ લાગી જશે.

એટલું જ નહી, આ નાનકડી લિપિસ્ટિક ગનથી ફાયરિંગ કરતા જોરદાર ધમાકા સાથે અવાજ આવશે, જે લગભગ એક કિલોમીટર દૂર સુધી સંભળાશે. અને આજુબાજુના લોકો સહાય માટે સરળતાથી પહોંચી શકશે. આ લિપસ્ટિકને ચાર્જ પણ કરી શકાય છે અને તે સંપૂર્ણપણે બ્લૂટૂથથી કનેક્ટ થઇ શકે છે. લગભગ એક મહિનામાં તૈયાર થયેલી આ લિપસ્ટિકની કિંમત 500 થી 600 રૂપિયા છે. તેને 20-25 દિવસમાં એકવાર ચાર્જ કરી શકાશે.