ન્યૂઝડેસ્ક :ઇન્ફ્લુએન્ઝા વાયરસ (એનવેલપ્ડ વાયરસ)નો 100% નાશ કરવામાં કોટિંગની સિદ્ધ થયેલી કાર્યક્ષમતા દર્શાવે છે કે કોટિંગ અન્ય એનવેલપ્ડ વાયરસ COVID 19નો નાશ કરવામાં પણ અસરકારક હોઇ શકે છે.
આ ટેક્નોલોજી ખુબ જ સરળ છે માટે તેના વિકાસ માટે વધુ કુશળ કર્મચારીઓની જરૂર રહેતી નથી. આ ટેક્નોલોજીનો કોવિડ 19 સામે પરીક્ષણ કરવાનું શરૂ થઇ ગયું છે.
જો આ ટેક્નોલોજી સફળ જણાશે તો ડોક્ટરો અને નર્સો દ્વારા ઉપયોગમાં લેવાતા માસ્ક, ગાઉન, ગ્લોવ્ઝ, ફેસ શીલ્ડ જેવા અનેક PPE પર આ વિશેષ કોટિંગ કરીને તેમને વધુ સુરક્ષા અને સલામતી પ્રદાન કરી શકાશે. આ કોટિંગ તેમને કોવિડ 19 સામેનું યુદ્ધ વધુ અસરકારક રીતે લડવામાં મદદ કરશે.
વિજ્ઞાન અને ટેક્નોલોજી વિભાગના સચિવ પ્રોફેસર આસુતોષ શર્માએ જણાવ્યું હતું કે, “મને ખુબ જ ખુશી થાય છે કે મૂળભૂત વિજ્ઞાનમાં પોતાની ઊંડી ક્ષમતા માટે વિશ્વભરમાં પ્રખ્યાત આપણી સંશોધન સંસ્થાઓ હવે તેમના જ્ઞાનને પડકારજનક અને ઉપયોગી ઍપ્લિકેશન્સમાં ફેરવી રહી છે. JNCASRની આ પ્રોડક્ટ તેનું જીવંત ઉદાહરણ છે. મને વિશ્વાસ છે કે ઉત્પાદનમાં ઉદ્યોગો દ્વારા યોગ્ય મદદ સાથે આપણે વધુ સફળ ઉદાહરણો આપી શકીશું.”
આ ટેક્નોલોજી JNCASRના પ્રોફેસર જયંત હલદરના જૂથે વિકસાવી છે જેમાં શ્રેયન ઘોષ, ડૉ. રિયા મુખરજી અને ડૉ. દેબજ્યોતી બસકનો સમાવેશ થાય છે.
આ કોટિંગ માટે વૈજ્ઞાનિકોએ સંશ્લેષિત કરેલા સંયોજનો મોટા ભાગના દ્રાવકોમાં દ્રાવ્ય છે, જેમકે:-
પાણી
ઇથેનોલ
મિથેનોલ
ક્લોરોફોર્મ.
આ સંયોજનના જલીય અથવા ઓર્ગેનિક દ્રાવણોનો તબીબી ક્ષેત્રે ઉપયોગમાં લેવાતી કાપડ, પ્લાસ્ટિક, PVC, પોલીયુરેથેન, પોલીસ્ટાયરીન જેવી મહત્વની સામગ્રીઓ અને રોજબરોજની વિવિધ વસ્તુઓ પર સરળતાથી ઉપયોગ કરી શકાય છે.
આ કોટિંગ ઇન્ફ્લુએન્ઝા વાયરસ સામે અદભૂત એન્ટિવાયરલ એક્ટિવિટી દર્શાવે છે. તે 30 મિનિટની અંદર ઇન્ફ્લુએન્ઝા વાયરસનો ખાતમો બોલાવી દે છે. તે રોગ પેદા કરતા જીવાણુઓ (એટલે કે બેક્ટેરિયા)ના પડદાઓને વેરવિખેર કરી દે છે અને તેમનો અંત લાવે છે.
સંશોધન દરમિયાન કોટિંગ કરેલી સપાટીઓએ દવા સામે પ્રતિરોધક શક્તિ ધરાવતા વિવિધ બેક્ટેરિયા અને ફૂગનો 30થી 45 મિનિટમાં સંપૂર્ણપણે નાશ કર્યો હતો જેમાં મેથિસિલિન પ્રતિરોધક S. aureus (MRSA) અને ફ્લુકોનાઝોલ પ્રતિરોધક C. albicans sppનો સમાવેશ થાય છે.
આ સંયોજનથી કોટ કરવામાં આવેલી સુતરાઉ ચાદરે બેક્ટેરિયાના દસ લાખથી વધુ કોષોનો નાશ થતો દર્શાવ્યો છે.
વિવિધ દ્વાવકોમાં મહત્તમ દ્રાવ્યતા હાંસલ કરવા માટે પરમાણુઓ ડિઝાઇન કરવામાં આવ્યા છે. ખર્ચ અસરકારક ત્રણથી ચાર ઉત્પાદન તબક્કા સાથે તે વધુ શુદ્ધ અને ઉચ્ચ ગુણવત્તામાં હાસલ કરી શકાય છે.
આ ઉપરાંત આ કોટિંગને વિવિધ સપાટીઓ પર ખુબ જ સરળતાથી ફેબ્રિકેટ કરી શકાય છે. ટેક્નોલોજીની સાદાઇ તેના વિકાસમાં કુશળ કર્મચારીઓની જરૂરિયાતને દૂર કરે છે.
